លោក កុយ គួង អនុរដ្ឋលេខាធិការនិងជាមន្ត្រីនាំពាក្យក្រសួងការបរទេសកម្ពុជា មានប្រសាសន៍ឲ្យវិទ្យុអាស៊ីសេរីដឹងនៅល្ងាចថ្ងៃពុធ ទី១៨ វិច្ឆិកានេះថា គិតត្រឹមថ្ងៃពុធ ទី១៨ ខែវិច្ឆិកា ក្រសួងការបរទេសកម្ពុជា នៅមិនទាន់ទទួលបានលិខិតជាផ្លូវការរបស់រដ្ឋាភិបាលថៃ ស្នើដល់កម្ពុជា ធ្វើការដោះលែងជនសង្ស័យចារកម្មដែលតុលាការកំពុងឃុំខ្លួននៅពន្ធនាគារព្រៃសនៅឡើយទេ។
លោកបញ្ជាក់ថា ក្រសួងការបរទេសកម្ពុជា បានទទួលត្រឹមតែលិខិតស្នើសួរសុខទុក្ខជនសង្ស័យចារកម្មថៃក្នុងពន្ធនាគារតែប៉ុណ្ណោះ ហើយដែលរដ្ឋាភិបាលបានអនុញ្ញាតរួចហើយដែរ។
លោក កុយ គួង មានប្រសាសន៍ដូច្នេះ ៖ «យើងអត់បានដឹងរឿងបញ្ហាសុំការដោះលែងទេ យើងដឹងតែថា យើងអនុញ្ញាតឲ្យមន្រ្តីទូតជាន់ខ្ពស់របស់ថៃនៅកម្ពុជា បានសួរសុខទុក្ខជនសង្ស័យនោះហើយ។ រឿងបញ្ហាសុំដោះលែងខ្ញុំអត់បានទទួល អត់បានដឹងឮអីទេជាផ្លូវការ ហើយរឿងបញ្ហាដោះលែង មិនដោះលែង ឥឡូវនៅក្នុងដៃតុលាការ តុលាការកំពុងធ្វើការស៊ើបអង្កេត»។
លោក កុយ គួង បន្តថា រដ្ឋាភិបាលថៃគ្មានហេតុផលណាមួយដែលមកស្នើសុំឲ្យរដ្ឋាភិបាលកម្ពុជា ធ្វើការដោះលែងជនសង្ស័យចារកម្មនេះឡើយ ព្រោះថា ជនសង្ស័យជាចារកម្មថៃរូបនេះ តុលាការនៅមិនទាន់ជំនុំជម្រះក្តីប្រកាសសាលក្រមថា មានទោសឬគ្មានទោសនៅឡើយ។ លោកបញ្ជាក់ថា សំណុំរឿងចារកម្មថៃ ដែលសមត្ថកិច្ចធ្វើការចោទប្រកាន់បច្ចុប្បន្នបាននិងកំពុងស្ថិតក្នុងដៃតុលាការកំពុងធ្វើការស៊ើបអង្កេតនៅឡើយ។
បុរសថៃឈ្មោះ ស៊ីវ៉ារ៉ាក់ ចាក់ធីពង់ អាយុ៣១ឆ្នាំ ជាបុគ្គលិករបស់ក្រុមជំនាញផ្លូវអាកាសនៅកម្ពុជា បានត្រូវចាប់ឃាត់ខ្លួនកាលពីថ្ងៃព្រហស្បតិ៍ ទី១២ ខែវិច្ឆិកា ពីបទចោទប្រកាន់ថា ផ្តល់ទៅឲ្យស្ថានទូតថៃនូវតារាងកម្មវិធីហោះហើរលម្អិតរបស់អតីត នាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ក្នុងដំណើរធ្វើទស្សនកិច្ចនៅកម្ពុជា៕