លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ មានប្រសាសន៍ថា កម្ពុជាបានត្រៀមរៀបចំធ្វើជាម្ចាស់ផ្ទះសម្រាប់ផែនការលំហាត់ហ្វឹកហ្វឺនប្រតិបត្តិការសន្តិភាពពហុសាសន៍ឆ្នាំ២០១០ ដែលក្នុងនោះលំហាត់ហ្វឹកហ្វឺនទ្រង់ទ្រាយធំនេះ វិញ្ញាសាចំនួន៦ត្រូវយកមកហ្វឹកហ្វឺន ដូចជាការសិក្សាពីផែនទីសង្គ្រាមនិងលំហាត់ដោះមីនជាដើម។
លោកមានប្រសាសន៍ដូច្នេះនៅក្នុងពិធីបញ្ចុះបឋមសិលាសាងសង់ទីលានហ្វឹកហ្វឺនកងកម្លាំងរក្សាសន្តិភាពពហុសាសន៍ ឬហៅកាត់ជាភាសាអង់គ្លេសថា GPOI 2010 នៅរសៀលថ្ងៃទី២ ខែធ្នូ នាទីបញ្ជាការដ្ឋានកងរថក្រោះខេត្តកំពង់ស្ពឺ។
លោក ទៀ បាញ់ មានប្រសាសន៍ដូច្នេះ ៖ «ខាងបច្ចេកទេស ខ្ញុំគ្រាន់តែនិយាយត្រួសៗថា វាអាចមានពី៦ទៅ៧លំហាត់ដែលគេបានរៀបចំនៅទីនេះ។ និយាមដំបូងអាចមានតែ៦ តែយើងនៅទីនេះ ខាងយើងហ្នឹងអាចបន្ថែមមួយទៀត គឺជំនាញខាងដោះមីន»។
លោក ទៀ បាញ់ បន្តថា លំហាត់ហ្វឹកហ្វឺនលើកទី១នៅកម្ពុជានេះ នឹងមានកម្លាំងប្រដាប់អាវុធពីគ្រប់ប្រទេសទំនងជាមិនតិចជាង២.០០០នាក់នោះទេចូលរួម ដែលទទួលបានការសហការឧបត្ថម្ភបច្ចេកទេស សម្ភារៈនិងថវិការបស់កងទ័ពសហរដ្ឋអាមេរិក សម្រាប់ការងាររក្សាសន្តិភាពនេះ។
លោកស្រី ខារ៉ល រ៉ដលី (Carol A. Rodley) ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា បានថ្លែងក្នុងពិធីនោះដែរថា ការបើកធ្វើលំហាត់ហ្វឹកហ្វឺនប្រតិបត្តិការរក្សាសន្តិភាពពហុសាសន៍នៅឆ្នាំ២០១០ នៅកម្ពុជា ឬឲ្យឈ្មោះថា«ឆ្មាំអង្គរ» គាំទ្រដោយសហរដ្ឋអាមេរិក គឺជាផ្នែកមួយនៃកិច្ចសហប្រតិបត្តិការរវាងអាមេរិកនិងកម្ពុជា សម្រាប់បម្រើឲ្យគោលដៅប្រតិបត្តិការរក្សាសន្តិភាពរបស់អង្គការសហប្រជាជាតិ។
លោកស្រី ខារ៉ល រ៉ដលី បន្តឲ្យដឹងថា លំហាត់ហ្វឹកហ្វឺនទ្រង់ទ្រាយធំនៅកម្ពុជានៅឆ្នាំ២០១០ ក្រៅអំពីហ្វឹកហ្វឺនថែរក្សាសន្តិភាព កងកម្លាំងប្រដាប់អាវុធចម្រុះដែលមានសមាសភាពមកពីច្រើនប្រទេស នឹងរួមគ្នាប្រយុទ្ធប្រឆាំងនឹងភេរវកម្ម ពង្រឹងសន្តិសុខព្រំដែន សន្តិសុខដែនសមុទ្រ និងដើរតួនាទីសកម្មក្នុងដំណើរការត្រួតពិនិត្យជាយុទ្ធសាស្ត្រឡើងវិញរបស់ក្រសួងការបរទេសអាមេរិកផងដែរ។
តាមលោកស្រី ខារ៉ល រ៉ដលី លំហាត់សមយុទ្ធយោធាមិនធ្លាប់មានក្នុងប្រទេសកម្ពុជា នៅឆ្នាំ២០១០ ដែលមានឈ្មោះថា«ឆ្មាំអង្គរ» អាចមានការចូលរួមរហូតដល់២៣ប្រទេសនៅលើពិភពលោក។
នៅក្នុងក្របខ័ណ្ឌគំនិតផ្តួចផ្តើមប្រតិបត្តិការរក្សាសន្តិភាពជាសកលក ឬហៅកាត់ជាភាសាអង់គ្លេសថា GPOI ដោយមានការលើកទឹកចិត្តពីរដ្ឋាភិបាលសហរដ្ឋអាមេរិក ប្រទេសកម្ពុជាក៏ធ្លាប់បានបញ្ជូនកងកម្លាំងប្រដាប់អាវុធរបស់ខ្លួនទៅចូលរួមក្នុងលំហាត់ហ្វឹកហ្វឺនប្រតិបត្តិការរក្សាសន្តិភាពពហុសាសន៍នៅប្រទេសម៉ុងហ្គោលី ប្រទេសបង់ក្លាដេស និងនៅប្រទេសឥណ្ឌូនេស៊ី ជាច្រើនលើកមកហើយ ដែលពេលនេះកម្ពុជា ត្រូវបានលើកទឹកចិត្តនិងឧបត្ថម្ភដោយរដ្ឋាភិបាលសហរដ្ឋអាមេរិក បើកធ្វើជាម្ចាស់ផ្ទះម្តងនៅឆ្នាំ២០១០ ខាងមុខ៕