លោក ម៉ាន់ ឈឿន ជាអភិបាលរងរាជធានីភ្នំពេញ បានមានប្រសាសន៍ប្រាប់វិទ្យុអាស៊ីសេរីថា ៖ «យើងរៀបហ្នឹងរៀបយកល្អតែម្ដង ជាកិត្តិយសរបស់យើង មោទនភាពជាតិរបស់យើងផង ហើយយើងនឹងធ្វើពិធីបួងសួងមួយដ៏ធំទៀតដើម្បីឲ្យទសបារមីឬក៏បុព្វបុរសយើងគាត់សណ្ឋិតមក ឲ្យព្រលឹងខ្មែរយើងរស់ឡើងវិញកាន់តែខ្លាំងក្លាជាងមុនថែមទៀត»។
ប្រភពបានឲ្យដឹងថា ពិធីដ៏ធំនោះគេនឹងប្រារព្ធនៅឯរមណីយដ្ឋានវត្តភ្នំនៅក្នុងទីក្រុងភ្នំពេញ ដែលគេរំពឹងទុកថានឹងមានប្រជាពលរដ្ឋខែ្មរជាច្រើនពាន់នាក់ចូលរួមហើយក៏មានការប្រគុំតន្រ្តីផងដែរ។
លោក ទូច ណារ៉ុថ ស្នងការនគរបាលរាជធានីភ្នំពេញ បានមានប្រសាសន៍អំពីការពង្រឹងសន្តិសុខសម្រាប់ពិធីនោះដូច្នេះថា ៖ «យើងត្រូវតែរឹតបន្តឹងសន្តិសុខហើយ ធានាសុវត្ថិភាពជូនថ្ងៃហ្នឹង យើងត្រៀមកម្លាំងដើម្បីការពារសុវត្ថិភាព»។
លោកនាយករដ្ឋមន្រ្តី ហ៊ុន សែន កាលពីសប្តាហ៍មុននេះក៏បានប្រកាសសុំឲ្យវាយជួងបន្លឺនៅគ្រប់សាលារៀន ហើយព្រះសង្ឃនៅតាមវត្តអារាមនានានៅទូទាំងប្រទេសកម្ពុជាក៏ត្រូវទូងស្គរនៅវេលាម៉ោង១១ព្រឹក ចំថៃ្ងទី៧ ខែកក្កដា ដើម្បីរំឭកខួបមួយឆ្នាំនៃការដាក់ប្រាសាទព្រះវិហារជាបេតិភណ្ឌពិភពលោកនោះ។
ព្រះសង្ឃ យឿង សឹង ជាព្រះចៅអធិការនៃវត្តសាមគ្គីរង្សីនៅក្នុងទីក្រុងភ្នំពេញ និងជាប្រធានសមាគមព្រះសង្ឃខែ្មរកម្ពុជាក្រោមប្រចាំនៅក្នុងប្រទេសកម្ពុជា បានមានពុទ្ធដីកាថា ព្រះអង្គនឹងចូលរួមទូងស្គរនៅវត្តរបស់ព្រះអង្គនិងសូត្រធម៌ផងដែរ។
ព្រះតេជគុណ យឿង សឹង បានមានពុទ្ធដីកាថា ៖ «ទោះបីខ្មែរកម្ពុជាក្រោមមិនទទួលបានថាជាខ្មែរត្រឹមត្រូវទេ ប៉ុន្តែអាត្មាមានមោទនភាពតើ! យើងចូលរួមអបអរសាទរមិនជាបញ្ហាអីទេ»។
លោក យឹម សុវណ្ណ តំណាងរាស្រ្តគណបក្សសមរង្ស៊ី និងជាអ្នកនាំពាក្យរបស់គណបក្សផងដែរនោះ បានមានប្រសាសន៍អត្ថាធិប្បាយថា ៖ «រឿងមិនទាន់ចប់នៅឡើយទេ បញ្ហាព្រំដែននៅតែកើតមានឡើង យើងត្រូវតែពង្រឹងការការពារព្រំដែនឲ្យបានខ្លាំងក្លាឲ្យមែនទែនដើម្បីទប់ស្កាត់ការឈ្លានពានពីបរទេស»។
ប្រាសាទព្រះវិហារដែលប្រទេសកម្ពុជាបានឈ្នះក្តីជាមួយនឹងប្រទេសថៃនៅឯតុលាការអន្តរជាតិក្រុងទ្បាអេ កាលពីថៃ្ងទី១៥ ខែមិថុនា ឆ្នាំ១៩៦២កន្លងទៅនោះ ត្រូវបានគណៈកម្មការបេតិភណ្ឌពិភពលោកបានសម្រេចចុះក្នុងបញ្ជីបេតិភណ្ឌពិភពលោកកាលពីថៃ្ងទី៧ ខែកក្កដា ឆ្នាំ២០០៨កន្លងទៅ នៅក្នុងកិច្ចប្រជុំមួយនៅក្នុងទីក្រុងកេបិច ប្រទេសកាណាដា។
ទោះបីជាយ៉ាងណាក៏ដោយប្រទេសថៃនៅតែប៉ុនប៉ងជាបន្តបន្ទាប់ឲ្យអង្គការ UNESCO សើររើដកប្រាសាទព្រះវិហារនេះចេញពីបញ្ជីបេតិភណ្ឌពិភពលោកនោះវិញ ក៏ប៉ុន្តែកាលពីថៃ្ងទី២០ ខែមិថុនាកន្លងទៅថ្មីៗនេះ ក្រសួងការបរទេសកម្ពុជាបានសម្ដែងប្រតិកម្មយ៉ាងខ្លាំងក្លាដោយលោកឧបនាយករដ្ឋមន្រ្តី ហោ ណាំហុង ជារដ្ឋមន្រ្តីក្រសួងការបរទេសកម្ពុជា បានបញ្ជាក់ប្រាប់អ្នកកាសែតកាលពីថៃ្ងទី២៥ ខែមិថុនា ថា ក្នុងកិច្ចប្រជុំមួយនៅប្រទេសអេស្ប៉ាញ គឺសំណើរបស់ថៃត្រូវបានអង្គការ UNESCO បដិសេធចោល៕