អង្គភាពព័ត៌មាននិងប្រតិកម្មរហ័សរបស់ទីស្តីការគណៈរដ្ឋមន្រ្តី នៅថ្ងៃទី៥ កុម្ភៈ បានផ្ញើលិខិតមួយច្បាប់ឆ្លើយបំភ្លឺចំពោះអ្នកទទួលខុសត្រូវគេហទំព័រ Google Earth ក៏ដូចជា Copyrighters ដែលបានបញ្ចូលនិងផ្សព្វផ្សាយតាមគេហទំព័រនេះអំពីព្រំដែនកម្ពុជា-ថៃ ហើយកំណត់នៅក្នុងផែនទីដោយដាក់ប្រាសាទព្រះវិហារខ្មែរជិតពាក់កណ្តាលឲ្យស្ថិតនៅក្នុងប្រទេសថៃនោះគឺខុសទាំងស្រុង និងនាំឲ្យមានការយល់ច្រឡំយ៉ាងធ្ងន់ធ្ងរ។
ទីស្តីការគណៈរដ្ឋមន្រ្តីសូមបញ្ជាក់ថា ប្រាសាទព្រះវិហារត្រូវបានតុលាការយុត្តិធម៌អន្តរជាតិនៅទីក្រុងឡាអេ កាលពីថ្ងៃទី១៥ មិថុនា ឆ្នាំ១៩៦២ បានប្រើប្រាស់ផែនទីឧបសម្ព័ន្ធ១ ដើម្បីឈានទៅរកសេចក្តីសម្រេចរបស់ខ្លួន។ ផែនទីឧបសម្ព័ន្ធ១នេះ ភាគីថៃបានព្រមទទួលយកក្នុងឆ្នាំ១៩០៨ យោងតាមអនុសញ្ញាបារំាង-សៀម ឆ្នាំ១៩០៤។
ផែនទីឧបសម្ព័ន្ធ១នោះ តុលាការយុត្តិធម៌អន្តរជាតិបានអះអាងបញ្ជាក់ថា នៅឆ្នាំ១៩០៨-១៩០៩ ថៃពិតជាបានយល់ព្រមទទួលយកផែនទីឧបសម្ព័ន្ធ១ ថាជាលទ្ធផលនៃការងារកំណត់ព្រំដែន ដែលជាហេតុនាំឲ្យខ្លួនទទួលស្គាល់ខ្សែបន្ទាត់ព្រំដែននៅលើផែនទីនេះ ថាជាខ្សែព្រំដែនដែលអនុភាពនៃការព្រមទទួលយកនោះគឺដាក់ប្រាសាទព្រះវិហារក្នុងទឹកដីកម្ពុជា។
តុលាការនេះបានបញ្ជាក់ទៀតថា តាមរយៈសកម្មភាពរបស់ខ្លួនភាគីទាំងពីរ គឺកម្ពុជានិងថៃបានទទួលស្គាល់ខ្សែបន្ទាត់នេះ ដែលពួកគេព្រមព្រៀងនិងចាត់ទុកខ្សែបន្ទាត់នេះជាខ្សែព្រំដែន។
ដោយសំអាងលើហេតុផលនេះ តុលាការបានសន្និដ្ឋានចុងក្រោយថា ការព្រមទទួលយកផែនទីឧបសម្ព័ន្ធ១ ដោយភាគីទាំងពីរ គឺជាការបញ្ចូលផែនទីនេះទៅក្នុងដំណើរការដោះស្រាយនៃអនុសញ្ញា ហើយផែនទីដដែលនេះបានក្លាយជាផ្នែកមួយដែលមិនអាចកាត់ផ្តាច់ចេញពីដំណោះស្រាយអនុសញ្ញានេះបានឡើយ ដូច្នេះផែនទីឧបសម្ព័ន្ធ១ មានលក្ខណៈតម្រូវឲ្យអនុវត្តតាម។
លិខិតដែលចុះហត្ថលេខាដោយលោក ស្វាយ ស៊ីថា រដ្ឋលេខាធិការ និងជាប្រធានអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្រ្តីនោះ បានទាមទារឲ្យមានការដូររូបផែនទីខុសនោះចេញ និងដាក់ផែនទីត្រឹមត្រូវដែលទទួលស្គាល់ជាអន្តរជាតិជំនួសវិញ៕