ចៅសង្កាត់អូរឫស្សី១ ខណ្ឌ៧មករា ពីគណបក្សប្រជាជនកម្ពុជា លោក ជា សុភិន ថ្លែងថា បោះឆ្នោតថ្ងៃនេះនឹងរើសយកក្រុមប្រឹក្សាជាង៣២០០នាក់សម្រាប់ជួយការងាររដ្ឋបាលរបស់រាជធានី ខេត្ត ក្រុង ស្រុក ខណ្ឌ។
លោក ជា សុភិន បានឲ្យដឹងថា ៖ «សង្គមជាតិយើងគឺមានរចនាសម្ព័ន្ធមួយទៀតសម្រាប់ជួយដឹកនាំ»។
សមាជិកក្រុមប្រឹក្សាសង្កាត់អូរឫស្សី២ ខណ្ឌ៧មករា ពីគណបក្សប្រជាជនកម្ពុជាដែរ លោក សូ សុភ័ក្រ្តា បន្ថែមថា ៖ «នេះគឺជាការអនុវត្តនយោបាយវិមជ្ឈការមួយដើម្បីផ្ដល់អំណាចមកថ្នាក់មូលដ្ឋាន។ ពីមុនអំណាចយើងគឺនៅតែថ្នាក់កណ្ដាល អត់បានដល់មូលដ្ឋានទេ»។
សមាជិកក្រុមប្រឹក្សាសង្កាត់ផ្សារដេប៉ូ១ ខណ្ឌទួលគោក លោក ម៉ៅ ប៊ុនរី ពីគណបក្សសមរង្ស៊ី ថ្លែងថា បោះឆ្នោតថ្ងៃនេះជាការពង្រីកលទ្ធិប្រជាធិបតេយ្យមូលដ្ឋាននៅកម្ពុជា។
ចៅសង្កាត់រងទី២នៃសង្កាត់អូរឫស្សី២ លោក ប្លុង សេងហាប់ អះអាងថា បោះឆ្នោតថ្ងៃនេះផ្តល់សិទ្ធិគណបក្សសមរង្ស៊ីមានមន្រ្តីចូលធ្វើការនៅរាជធានី ខេត្ត ក្រុង ស្រុក ខណ្ឌ ដែលមិនធ្លាប់មានពីមុន។
លោក ប្លុង សេងហាប់ បានមានប្រសាសន៍ថា ៖ «ដែលអាចជួយការងារខ្ញុំជាចៅសង្កាត់អីហ្នឹង។ ជឿថាគណបក្សខ្ញុំនឹងមានការរីកចម្រើន»។
ប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី មានប្រសាសន៍ថា សកម្មភាពព្រឹកកំពុងបោះឆ្នោតគ្មានហិង្សាកើតមានទេ។
លោកថាចំនួនក្រុមប្រឹក្សាជាង១ម៉ឺននាក់នោះមានសិទ្ធិបោះឆ្នោតថ្ងៃនេះមានមួយចំនួនជាប់ពន្ធនាគារនិងមួយចំនួនមានជំងឺ ប៉ុន្តែសិទ្ធិបោះឆ្នោតពួកគេនៅមាន។
លោកថា ពួកគេត្រូវតែមានអ្នកជួយនាំមកឲ្យបោះឆ្នោតដោយហិបឆ្នោតមិនអាចដឹកទៅឲ្យគេបោះបានទេ ប៉ុន្តែលោកមិនទាន់មានតួលេខសរុបចំនួនអ្នកដែលអវត្តមានដែលមិនបានបោះឆ្នោតនៅឡើយទេ។
លោក អ៊ឹម សួស្ដី បានបញ្ជាក់ថា ៖ «នៅខេត្តកំពតក៏ដូចជាខេត្តកំពង់ធំមានសមាជិកក្រុមប្រឹក្សាខ្លះដែលជាប់ពន្ធនាគារ ប៉ុន្តែសាលក្រមមិនទាន់ចេញជាស្ថាពរទេ ដូច្នេះគាត់មានសិទ្ធិបោះឆ្នោត។ គាត់មានឈ្មោះហើយ ប៉ុន្តែត្រូវតែឲ្យខាងពន្ធនាគារហ្នឹងបញ្ជូនគាត់មកបោះឆ្នោតនៅតាមការិយាល័យនោះ»។
តំណាងរាស្រ្តគណបក្សសមរង្ស៊ី លោក សុន ឆ័យ អះអាងថា របាយការណ៍បណ្តោះអាសន្ននៅក្រុងភ្នំពេញ ចំពោះក្រុមប្រឹក្សាគណបក្សនេះបានទៅបោះឆ្នោត មិនមានអវត្តមានទេ ប៉ុន្តែគណបក្សសមរង្ស៊ីបានបាត់សំឡេងឆ្នោតជាង២៦សំឡេង ទំនងជាក្រុមប្រឹក្សាសង្កាត់បោះឆ្នោតឲ្យគណបក្សផ្សេង។
ឯអគ្គលេខាធិការរងគណបក្ស នរោត្ដម រណឫទ្ធិ លោក សៅ រ៉ានី ថ្លែងថា អ្នកមានសិទ្ធិបោះឆ្នោតក្នុងគណបក្សនោះបានទៅបោះឆ្នោតទាំងអស់គ្នា ហើយគ្មានហិង្សាមកលើមន្ត្រីគណបក្សនោះឡើយ។
ចំណែកប្រធានគណបក្សហ៊្វុនស៊ិនប៉ិច លោក កែវ ពុទ្ធរស្មី មិនបានលើកទូរស័ព្ទឡើយ។ រីឯតំណាងឬអ្នកនាំពាក្យគណបក្សនោះមិនអាចទាក់ទងសុំយោបល់បានដែរ៕