កម្ពុជាទទួលជោគជ័យក្នុងការរៀបចំកិច្ចប្រជុំអាស៊ានស្ដីពីកិច្ចការគ្រឿងញៀន

ដោយ មឿង ទុម

2009-10-04

អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនទទួលបានជោគជ័យធ្វើជាម្ចាស់ផ្ទះក្នុងការរៀបចំកិច្ចប្រជុំប្រចាំឆ្នាំលើកទី៣០របស់មន្ត្រីជាន់ខ្ពស់នៃប្រទេសសមាជិកសមាគមអាស៊ានស្តីពីកិច្ចការគ្រឿងញៀន កាលពីពេលថ្មីៗនេះ។

កិច្ចប្រជុំនោះត្រូវបានគេរៀបចំឡើងកាលពីថ្ងៃទី២៩ ខែកញ្ញា ដល់ថ្ងៃទី១ ខែតុលា ឆ្នាំ២០០៩ ក្នុងសប្តាហ៍នេះនៅឯសណ្ឋាគារ NAGA WORLD នៅទីក្រុងភ្នំពេញ។

លោកឧត្តមសេនីយ៍ទោ ភន បូរ៉ាមី ប្រធាននាយកដ្ឋានសហប្រតិបត្តិការអន្តរជាតិនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ឲ្យវិទ្យុអាស៊ីសេរីថា មន្ត្រីជាន់ខ្ពស់អន្តរជាតិពីប្រទេសសមាជិកសមាគមអាស៊ាន អ្នកដែលកាន់កិច្ចការគ្រឿងញៀន បានចូលរួមទាំងអស់៧៨នាក់។ ចំណែកប្រតិភូខ្មែរចំនួន៣០នាក់ក៏បានចូលរួមដែរ។

កិច្ចប្រជុំនោះធ្វើឡើងក្រោមអធិបតីភាពរបស់លោកឧបនាយករដ្ឋមន្រ្តី កែ គឹមយ៉ាន ដែលលោកក៏ជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនផងដែរ។

ចំណែកលោកឧត្តមសេនីយ៍ឯក មឹក តារា អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនជាអ្នកដឹកនាំកិច្ចប្រជុំនោះផ្ទាល់។

លោកឧត្តមសេនីយ៍ទោ ភន បូរ៉ាមី បញ្ជាក់បន្ថែមអំពីកិច្ចប្រជុំនិងលទ្ធផល ៖ «នៅក្នុងកិច្ចប្រជុំមន្ត្រីជាន់ខ្ពស់អាស៊ាននេះ គឺយើងបានប្រជុំទៅតាមរបៀបវារៈជាច្រើន ហើយនៅក្នុងនោះយើងសំដៅទៅលើកិច្ចការជាគោលចំនួន៥ ដែលក្នុងនោះយើងសំដៅទៅលើការងារអប់រំបង្ការនិងការងារព្យាបាលនិងស្ដារនីតិសម្បទា ការងារអនុវត្តច្បាប់ ការងារស្រាវជ្រាវ និងការកែប្រែដំណាំជំនួស ហើយនៅក្នុងកិច្ចប្រជុំនោះគឺតាមរបៀបវារៈនីមួយៗ គឺប្រទេសនីមួយៗបានធ្វើនូវរបាយការណ៍រាយការណ៍អំពីលទ្ធផលនៃការអនុវត្តរបស់ប្រទេសនីមួយៗក្នុងរយៈពេលមួយឆ្នាំកន្លងមក។ ជារួមលទ្ធផលនៃកិច្ចប្រជុំអន្តរជាតិរបស់យើងនេះ យើងទទួលបាននូវចំណុចដៅសំខាន់ៗមួយចំនួន ទី១ បង្កើនបាននូវកិច្ចសហប្រតិបត្តិការរបស់អាស៊ានទាំងអស់ និងបណ្ដាអង្គការអន្តរជាតិពិភពលោកមួយចំនួន ដែលក្នុងនោះយើងទទួលបាន ឃើញថា មានកិច្ចសហប្រតិបត្តិការជាមួយនឹងអង្គការ UNBBC ជាមួយនឹងបណ្ដាប្រទេសចិន ជប៉ុន កូរ៉េ ឥណ្ឌា និងប៉ាគីស្ថាន ដែលប្រទេសទាំងអស់នេះយើងគិតថាជាប្រទេសដែលមានអាទិភាពក្នុងការផ្ដល់ជំនួយជួយដល់បណ្ដាប្រទេសនៅអាស៊ានរបស់យើង»។

អាជ្ញាធរជាតិប្រយុទ្ធប្រឆាំងគ្រឿងញៀនគ្រោងធ្វើយុទ្ធនាការក្នុងអំឡុងពេលបុណ្យអុំទូក

នៅមុនកិច្ចប្រជុំនោះ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញនូវគម្រោងបើកយុទ្ធនាការថ្នាក់ជាតិក្នុងអំឡុងពេលបីថ្ងៃនៃទិវាបុណ្យអុំទូក ខែវិច្ឆិកា ឆ្នាំ២០០៩ ខាងមុខនេះ។

នៅក្នុងទិវាបុណ្យប្រពៃណីជាតិខ្មែរនោះ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនគ្រោងនឹងបើកយុទ្ធនាការផ្សព្វផ្សាយអប់រំពលរដ្ឋខ្មែរដែលមកពីគ្រប់ទិសទីអ្នកទៅចូលរួមបុណ្យអុំទូក ឲ្យបានយល់ដឹងអំពីគ្រោះថ្នាក់ពីការប្រើប្រាស់គ្រឿងញៀន កុំឲ្យពាក់ព័ន្ធនឹងការប្រើប្រាស់គ្រឿងញៀន។

លោកឧត្តមសេនីយទោ ភន បូរ៉ាមី ប្រធាននាយកដ្ឋានសហប្រតិបត្តិការអន្តរជាតិនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ឲ្យវិទ្យុអាស៊ីសេរីដឹងបន្ថែមកាលពីយប់មិញថា ៖ «ឥឡូវយើងកំពុងតែដាក់ចេញនូវយុទ្ធនាការសម្រាប់ពិធីបុណ្យអុំទូក អកអំបុករបស់យើងនៅពេលខាងមុខនេះ ហើយទាំងអស់នេះគឺជាការណែនាំនិងការចង្អុលទិសរបស់ប្រមុខនៃរដ្ឋាភិបាល ហើយជាមួយនេះផងដែរក៏ដូចជាការចង្អុលទិសណែនាំរបស់ឯកឧត្ដមនាយឧត្ដមសេនីយ៍ កែ គឹមយ៉ាន ដែលជាឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនរបស់យើង»។

លោក នាក់ យុទ្ធា ប្រធាននាយកដ្ឋាននីតិកម្ម អប់រំនិងបង្ការគ្រឿងញៀន នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍ឲ្យដឹងបន្ថែមថា គម្រោងនៃយុទ្ធនាការប្រឆាំងនឹងការប្រើប្រាស់គ្រឿងញៀនក្នុងទិវាបុណ្យអុំទូកនោះ គឺអគ្គលេខាធិការដ្ឋានគ្រោងនឹងបោះពុម្ពមួកនិងអាវយឺតរាប់ម៉ឺនសម្រាប់ដែលមានដាក់ភ្ជាប់នូវសារប្រឆាំងនឹងគ្រឿងញៀនចែកឲ្យកីឡាករអុំទូកប្រណាំងជាង៣០០ទូក ឲ្យកីឡាករពាក់ក្នុងឱកាសនោះដែរ ព្រោះអាជ្ញាធររំពឹងថានឹងមានមនុស្សចូលរួមទស្សនាមិនតិចជាង២លាននាក់ទេ។

លោកឧត្តមសេនីយ៍ទោ ភន បូរ៉ាមី បញ្ជាក់ថា គ្រឿងញៀនដែលកំពុងពេញនិយមនៅកម្ពុជានាពេលបច្ចុប្បន្នគឺគ្រឿងញៀនសំយោគអាតេអេស ដែលរួមមានមេតំហ្វេតាមីន ថៃហៅថា យ៉ាម៉ា ឬយ៉ាបា ខ្មែរហៅថា ម៉ា ឬថ្នាំឆ្កួត និងថា តាមការប៉ាន់ប្រមាណបណ្តោះអាសន្នគឺចំនួនអ្នកប្រើប្រាស់គ្រឿងញៀនសរុបនៅកម្ពុជាក្នុងឆ្នាំ២០០៩នេះអាចមានដល់ជាង៦ពាន់នាក់៕

បោះពុម្ព អ៊ីម៉េល