ភាព​ទាល់ច្រក​នៃ​ការ​បញ្ចប់​ជម្លោះ​ព្រំដែន​កម្ពុជា-​ថៃ​នៅ​តំបន់​ប្រាសាទ​ព្រះវិហារ

ការ​​បន្ត​ជាប់​គាំង​​ដែល​មិន​អាច​ឈាន​ទៅ​រក​ការ​បញ្ចប់​ជម្លោះ​​នៅ​តាម​ព្រំដែន​កម្ពុជា-​ថៃ ជា​ពិសេស​នៅ​តំបន់​ប្រាសាទ​ព្រះវិហារ បាន​បន្ត​​អូស​បន្លាយ​អស់​រយៈ​ពេល​ជិត ៥​ឆ្នាំ​មក​ហើយ ចាប់​ពី​ខែ​កក្កដា ឆ្នាំ​២០០៨។
ដោយ ម៉ម មុនីរតន៍
2013-02-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ទេសចរ​នៅ​លើ​ប្រាសាទ​ព្រះវិហារ គោបុរៈ​ទី​៤។ រូបថត​ថ្ងៃ​ទី​១២ កុម្ភៈ ឆ្នាំ​២០១៣
ទេសចរ​នៅ​លើ​ប្រាសាទ​ព្រះវិហារ គោបុរៈ​ទី​៤។ រូបថត​ថ្ងៃ​ទី​១២ កុម្ភៈ ឆ្នាំ​២០១៣
RFA/Morm Moniroth

ការ​ផ្ទុះ​សង្គ្រាម​ព្រំដែន​កម្ពុជា-​ថៃ កើត​ឡើង​ក្រោយ​ពី​ប្រាសាទ​ដែល​មាន​អាយុកាល​ជាង ១​ពាន់​ឆ្នាំ​មួយ​នេះ ត្រូវ​ដាក់​បញ្ចូល​ទៅ​​ជា​សម្បត្តិ​បេតិកភណ្ឌ​ពិភពលោក​សម្រាប់​មនុស្ស​ជាតិ​រួច​មក។ ការ​មិន​​អាច​ទម្លាយ​ភាព​ទាល់​ច្រក​នេះ​បាន​នោះ ក៏​ព្រោះ​តែ​ភាគី​ថៃ សំអាង​លើ​ផែនទី​ជា​ឯកតោភាគី​ថា មាន​តំបន់ ៤.៦ ក្បែរ​​ប្រាសាទ​ព្រះវិហារ គឺ​ជា​ទីតាំង​ដែល​​ខ្លួន​ត្រូវ​គ្រប់គ្រង។ ប៉ុន្តែ​ភាគី​កម្ពុជា ពុំ​ទទួល​ស្គាល់​ថា មាន​តំបន់ ៤.៦ ក្បែរ​​ប្រាសាទ​ព្រះវិហារ​ខ្មែរ​នោះ​ទេ។

មន្ត្រី​រដ្ឋាភិបាល​កម្ពុជា និយាយ​ថា អ្វី​ដែល​រដ្ឋាភិបាល​ថៃ បង្កើត​តំបន់ ៤.៦​គីឡូម៉ែត្រ​ការ៉េ នៅ​លើ​តំបន់​ឆ្លង​កាត់​របស់​ខ្មែរ​ទៅ​កាន់​ប្រាសាទ​នេះ ក៏​ព្រោះ​តែ​ភាគី​ថៃ មើល​ឃើញ​ថា ប្រសិន​បើ​គម្រោង ៤.៦ នេះ ខ្លួន​ទាក់ទាញ​ការ​ជឿ​ទុកចិត្ត​បាន​ពី​អន្តរជាតិ បាន​ន័យ​ថា គឺ​ជា​ជោគជ័យ​មួយ​ដ៏​ធំ​ក្នុង​ការ​កាត់​ផ្ដាច់​ទាំង​ស្រុង​លើ​​ផ្នែក​យោធា និង​សេដ្ឋកិច្ច​របស់​កម្ពុជា។

ក៏​ប៉ុន្តែ​អ្នក​ស្រាវជ្រាវ​ផ្នែក​ប្រវត្តិសាស្ត្រ និង​ជា​អ្នក​និពន្ធ​សៀវភៅ​ជនជាតិ​អាមេរិកាំង លោក ចន បើកហ្គេស (John Burgess) ដែល​បាន​តាមដាន​យ៉ាង​ដិត​ដល់​លើ​ដំណើរ​ការ​ក្ដី​ប្រាសាទ​ព្រះវិហារ មាន​ប្រសាសន៍​កាល​ពី​ថ្ងៃ​ទី​១៣ កុម្ភៈ ថា ពុំ​មាន​អ្វី​ដែល​ត្រូវ​សង្ស័យ​ទៀត​នោះ​ឡើយ ថា​ប្រាសាទ​ព្រះវិហារ​ជា​របស់​ខ្មែរ​នោះ។

ក្នុង​ន័យ​នេះ​លោក​បញ្ជាក់​ថា ពិត​ណាស់ ផ្អែក​តាម​សាលដីកា​ឆ្នាំ​១៩៦២ ប្រាសាទ​ព្រះវិហារ គឺ​ជា​របស់​កម្ពុជា យ៉ាង​ពិត​ប្រាកដ៖ «នៅ​ឆ្នាំ​១៩៦២ បន្ទាប់​ការ​ជំនុំជម្រះ​អស់​រយៈពេល​ដ៏​យូរ ICJ បាន​សម្រេច​ថា ប្រាសាទ​ព្រះ​វិហារ​ស្ថិត​ក្រោម​អធិបតេយ្យ​របស់​កម្ពុជា។ ការ​តវ៉ា​ជា​ច្រើន​ត្រូវ​បាន​គេ​ដាក់​ជូន​តុលាការ រួម​មាន​ការ​តវ៉ា​របស់​ថៃ អំពី​ដែនដី​ពិសិដ្ឋ និង​ការ​តវ៉ា​របស់​កម្ពុជា អំពី​កេរមរតក។ ប៉ុន្តែ​នៅ​ទី​បំផុត អ្វី​ដែល ICJ ផ្ដោត​ការ​យក​ចិត្ត​ទុក​ដាក់​នោះ គឺ​ផែនទី​ដែល​ផលិត​នៅ​​ឆ្នាំ​១៩០៧»

នៅ​មុន​ការ​បកស្រាយ​សាលដីកា​ឆ្នាំ​១៩៦២ ឡើង​វិញ ដែល​នឹង​ត្រូវ​ចាប់​ផ្ដើម​ក្នុង​ខែ​មេសា ឆ្នាំ​២០១៣ ខាង​មុខ មជ្ឈដ្ឋាន​នានា​មាន​ជំនឿ​ថា សាលដីកា​នេះ​នឹង​នាំ​ឲ្យ​កម្ពុជា មាន​ប្រៀប​ផ្នែក​ផ្លូវ​ច្បាប់​រួច​ជា​ស្រេច​លើ​ភាគី​ជម្លោះ។

យោធា​ថៃ និង​កម្ពុជា ប្រាំ​បូក​ប្រាំ (5+5) ដែល​ប្រចាំ​ការ​នៅ​វាល​សំបុកឃ្មុំ ស្ថិត​នៅ​ខាង​មុខ​ប្រាសាទ​ព្រះវិហារ ឲ្យ​ដឹង​ថា ខ្លួន​ពិត​ជា​ពុំ​មាន​ចេតនា​ក្នុង​ការ​បង្ក​ឲ្យ​មាន​ការ​បង្ហូរ​ឈាម​ក្នុង​ជម្លោះ​ប្រាសាទ​ព្រះវិហារ​នោះ​ទេ។

ពួក​គេ​បន្ត​ថា៖ «រាល់​ថ្ងៃ​កង​កម្លាំង​ខ្មែរ​និង​ថៃ ដែល​មាន​ចំនួន​ម្ខាង ៥​នាក់ តែង​តែ​ជួប​ប្រជុំ​ជាមួយ​គ្នា ហើយ​មិន​មាន​ការ​ប្រើ​កម្លាំង​ណា​មួយ​ដើម្បី​តទល់​គ្នា​ទេ។ ខ្ញុំ​ដឹង​ថា ប្រាសាទ​ព្រះវិហារ​ជា​មរតក​របស់​ពិភពលោក​ហើយ។ យើង​មិន​ចង់​មាន​ការ​វាយ​ប្រយុទ្ធ​គ្នា​ពាក់ព័ន្ធ​នឹង​បញ្ហា​ព្រំដែន​នេះ​ទេ»

លោក ចន បើកហ្គេស គិត​ថា រដ្ឋាភិបាល​ទីក្រុង​បាងកក គួរ​ប្រើប្រាស់​សិទ្ធិ​របស់​ខ្លួន​ក្នុង​ការ​ទាមទារ​ការ​កាន់​កាប់​ប្រាសាទ​ព្រះវិហារ ក្រោយ​ពី​មាន​សេចក្ដី​សម្រេច​ភ្លាមៗ របស់ ICJ ក្នុង​ឆ្នាំ​១៩៦២។លោក​បន្ត​ថា គេ​​ពុំ​គួរ​ជំទាស់​ចំពោះ​សេចក្ដី​សម្រេច​របស់ ICJ នៅ​ពេល​នេះ​នោះ​ទេ។ បើ​តាម​លោក ចន បើកហ្គេស គេ​ហាក់​ពុំ​​ឃើញ​មាន​ឯកសារ​ណា​មួយ ដែល​មាន​និយាយ​អំពី​តំបន់ ៤.៦ នោះ​ឡើយ។

លោក ចន បើកហ្គេស៖ «អស់​រយៈពេល​ជា​ច្រើន​ឆ្នាំ ថៃ​មិន​ដែល​ជំទាស់​នឹង​ផែនទី​​នេះ​ទេ។ ការ​ពិត​ថៃ ទទួល​ស្គាល់​ផែនទី​ដែល​បង្ហាញ​ថា ប្រាសាទ​ព្រះ​វិហារ​ស្ថិត​នៅ​ក្នុង​ទឹកដី​កម្ពុជា។ នៅ​ឆ្នាំ​១៩៦២ តុលាការ​យុត្តិធម៌​អន្តរជាតិ ICJ បាន​សម្រេច​រឿង​ក្ដី​ប្រាសាទ​ព្រះវិហារ​ ហើយ​ប្រទេស​ថៃ បាន​ទទួល​ស្គាល់​ថា ប្រាសាទ​ព្រះវិហារ មិន​មែន​ស្ថិត​នៅ​ក្នុង​ទឹក​ដី​ថៃ​នោះ​ទេ។ ដូច្នេះ​វា​ហួស​អាជ្ញា​អាយុកាល​ក្នុង​ការ​សើរើ​រឿង​ក្ដី​​នេះ​ហើយ»

ប្រាសាទ​ព្រះវិហារ​ដែល​មាន​អាយុកាល​ជាង ១​ពាន់​ឆ្នាំ​មួយ​នេះ ត្រូវ​ខ្ទេចខ្ទាំ​ដោយ​ការ​បាញ់​រះ​របស់​យោធា​ថៃ និង​ក្លាយ​ទៅ​ជា​សមរភូមិ​ប្រយុទ្ធ​ដ៏​តានតឹង ក្រោយ​ពី​ប្រាសាទ​ព្រះវិហារ ត្រូវ​បាន​ដាក់​បញ្ចូល​ជា​សម្បត្តិ​បេតិកភណ្ឌ​ពិភពលោក​កាល​ពី​ថ្ងៃ​ទី​៧ ខែ​កក្កដា ឆ្នាំ​២០០៨។

កាល​ពី​ថ្ងៃ​ទី​១៨ កក្កដា ឆ្នាំ​២០១១ តុលាការ​យុត្តិធម៌​​អន្តរជាតិ​ទីក្រុង​ឡាអេ ICJ បាន​ចេញ​បទ​បញ្ជា​បន្ទាន់​មួយ តម្រូវ​ឲ្យ​កម្ពុជា និង​ថៃ ដក​កងទ័ព​ចេញ​ពី​តំបន់​គ្មាន​យោធា​បណ្ដោះអាសន្ន​លើ​ទំហំ​ដី ១៧​គីឡូម៉ែត្រ​ក្រឡា។ អ្វី​ដែល ICJទាមទារ​ឲ្យ​ភាគី​​ជម្លោះ​ទាំង​ពីរ​ដក​ខ្លួន​ចេញ​ពី​ទីតាំង​ប្រាសាទ​ដ៏​ចំណាស់​មួយ​នេះ នោះ​ក៏​ព្រោះ​តែ​ដើម្បី​សង្គ្រោះ​ប្រាសាទ​ព្រះវិហារ​ពី​ការ​​ប្រឈម​មុខ​ដាក់​គ្នា​ដោយ​សព្វាវុធ។ នេះ​គឺ​ជា​ការ​ឆ្លើយតប​នូវ​សំណើ​របស់​កម្ពុជា ជា​ថ្មី​ម្ដង​ទៀត ដែល​ស្នើ​សុំ​​ឲ្យ​មាន​កិច្ច​អន្តរាគមន៍​បន្ទាន់​មួយ​ពី​តុលាការ​យុត្តិធម៌​អន្តរជាតិ​មួយ​នេះ កាល​ពី​ខែ​មេសា ឆ្នាំ​២០១១។

លោក ផៃ ស៊ីផាន អ្នក​នាំ​ពាក្យ​ទីស្ដីការ​គណៈរដ្ឋមន្ត្រី និយាយ​កាល​ពី​ថ្ងៃ​ទី​១៣ កុម្ភៈ ថា នៅ​ក្នុង​ផែនទី​ឧបសម្ពន្ធ​ផលិត​ក្នុង​ឆ្នាំ​១៩០៨ ដែល​មាន​តម្លៃ​ជា​សកល​នោះ ពុំ​មាន​ចែង​​ក្នុង​មាត្រា​ណា​មួយ​ដែល​កំណត់​ថា មាន​តំបន់ ៤.៦​នោះ​ទេ។

លោក ផៃ ស៊ីផាន ហៅ​ការ​បង្កើត​យុទ្ធសាស្ត្រ​របស់​ថៃ​នេះ ថា​គឺ​ជា​ផែនទី​ផលិត​ដោយ​ឯកតោ​ភាគី និង​ជា​ការ​ប៉ុនប៉ង​ដើម្បី​គ្រប់គ្រង​ប្រាសាទ​ព្រះវិហារ​ខ្មែរ​​ប៉ុណ្ណោះ៖ «ក្នុង​ឆ្នាំ​១៩៦០ ហ្នឹង យើង​ឃើញ​​​ថា ថៃ​​ហ្នឹង​​បាន​គូស​ពណ៌​លឿង ហើយ​កម្ពុជា បាន​គូស​ពណ៌​ក្រហម។ ខណ្ឌ​សីមា​ពណ៌​ក្រហម​ហ្នឹង តុលាការ​យុត្តិធម៌​អន្តរជាតិ​បាន​យក​ជា​ផ្លូវការ ទាត់​ចោល​ខ្សែ​ខណ្ឌសីមា ដែល​ថៃ​​​​គូស​ដោយ​ខ្លួនឯង ជា​ឯកតោ​ភាគី​ក្នុង​ឆ្នាំ​១៩៦២។ បន្ទាប់​ពី​ហ្នឹង​បាន​យើង​ឃើញ​ក្នុង​ឆ្នាំ​២០០៨ បាន​ឃើញ​ថៃ គូស​ខ្សែ​បន្ទាត់​ពណ៌​ខ្មៅ​នេះ ខ្សែ​បន្ទាត់​ពណ៌​ខ្មៅ​នេះ ជា​ខ្សែ​បន្ទាត់​ខណ្ឌសីមា​ថ្មី ដែល​ថៃ​ផលិត​ខ្លួន​ឯង​ដោយ​កាត់​យក​តំបន់​ប្រាសាទ​ដែល​ជា​តូច​នេះ​របស់​ប្រាសាទ ដែល​ឲ្យ​ខ្មែរ​ហើយ​ទុក​រក្សា​ដី​នេះ​ហើយ។ ក៏​ប៉ុន្តែ​បើ​សិន​យើង​ពិចារណា​មើល​ពី​ចន្លោះ​ខ្សែ​ពណ៌​ខ្មៅ​ទៅ​ខ្សែ​ពណ៌​ក្រហម​នេះ អា​នេះ​ហើយ​ដែល​គេ​ថា ជា​ផែន​ដី​​ដែល ៤.៦ របស់​ថៃ ដែល​ថៃ​គេ​ទាមទារ​ដោយ​មិន​ស្រប​ច្បាប់​នេះ​ឯង»

បើ​ទោះ​ជា​តំបន់ ៤.៦ ពុំ​មាន​ចែង​នៅ​ក្នុង​ផែនទី​ឧបសម្ពន្ធ ឆ្នាំ​១៩០៨ របស់​អន្តរជាតិ ក៏​ដូចជា​ការ​អះអាង​របស់​កម្ពុជា យ៉ាង​ណា​ក៏ដោយ តែ​គេ​នៅ​មាន​មន្ទិល​ថា តើ​មូលហេតុ​អ្វី​បាន​ជា​រដ្ឋាភិបាល​ទីក្រុង​បាងកក នៅ​បន្ត​មាន​ប្រៀប និង​អាច​គ្រប់គ្រង​តំបន់ ៤.៦ ពី​ចម្ងាយ នៅ​គ្រា​តំបន់​ដែល​គូសវាស​នេះ ស្ថិត​នៅ​ក្នុង​អធិបតេយ្យ និង​បូរណភាព​ទឹក​ដី​របស់​កម្ពុជា​នោះ។

វិទ្យុ​អាស៊ី​សេរី បាន​ស្នើ​សុំ​ការ​អត្ថាធិប្បាយ​តាម​សារ​អេឡិចត្រូនិក (Email) ពី​មន្ត្រី​ស្ថានទូត​ថៃ ប្រចាំ​កម្ពុជា​ដែរ ដើម្បី​ឲ្យ​មាន​ការ​បក​ស្រាយ​ពី​ទំហំ​ដី ៤.៦ នៅ​តំបន់​ប្រាសាទ​ព្រះវិហារ ដែល​កម្ពុជា ចាត់​ទុក​ថា ជា​ផែនទី​គូស​ដោយ​ឯកតោ​ភាគី ប៉ុន្តែ​រហូត​មក​ដល់​ពេល​នេះ នៅ​ពុំ​ទាន់​ឃើញ​មាន​ការ​ឆ្លើយ​តប​ណា​មួយ​នៅ​ឡើយ​នោះ​ទេ។

ប៉ុន្តែ​កាល​ពី​ដើម​ខែ​កុម្ភៈ តាម​រយៈ​ការ​ចុះ​ផ្សាយ​របស់​កាសែត​ក្នុង​ស្រុក​របស់​ថៃ និយាយ​ថា គណបក្ស​ភឿថៃ បាន​ជំរុញ​ឲ្យ​នាយករដ្ឋមន្ត្រី គឺ​​លោកស្រី យីងឡាក់ ស៊ីណាវ៉ាត់ (Yingluck Shinawatra) បើក​ការ​ចរចា​ជាមួយ​កម្ពុជា ដើម្បី​ស្នើ​សុំ​ឲ្យ​កម្ពុជា ពិចារណា​ក្នុង​ការ​ដក​ពាក្យ​បណ្ដឹង​របស់​ខ្លួន​ពី ICJ ដោយ​​ងាក​មក​ចរចា​ទ្វេ​ភាគី​ឡើង​វិញ និង​អភិវឌ្ឍ​រួម​គ្នា​លើ​ទំហំដី​ដែល​ថៃ អះអាង​ដោយ​ឯកតោភាគី​ថា មាន​តំបន់ ៤.៦ គីឡូម៉ែត្រ​ការ៉េ​នោះ។

អ្នក​វិភាគ​បញ្ហា​សង្គម​គិត​ថា អ្នក​នយោបាយ​​កម្ពុជា បាន​បោះបង់​ជំហរ​សិទ្ធិ​ជា​ម្ចាស់​ប្រទេស និង​ហាក់​​ដើរ​ក្រោយ​នយោបាយ​ថៃ ជា​ដរាប ក្នុង​ជម្លោះ​ព្រំដែន​កម្ពុជា-​ថៃ ជា​ពិសេស​នៅ​តំបន់​ប្រាសាទ​ព្រះវិហារ។ ការ​ចាញ់​ប្រៀប​នយោបាយ​ថៃ​នោះ មាន​ន័យ​ថា កម្ពុជា​បរាជ័យ​ចំពោះ​ការ​ទាមទារ​ដាក់​​ឲ្យ​មាន​អ្នក​សង្កេត​ការ​ឥណ្ឌូនេស៊ី នៅ​តំបន់​ដែល​មាន​ជម្លោះ និង​ពុំ​អាច​ធ្វើ​អ្វី​បាន ដូច​ជា​ការ​ធ្វើ​ផ្លូវ​ឡើង​ប្រាសាទ​ក្នុង​ទឹកដី​របស់​ខ្លួន ព្រោះ​តែ​មាន​ការ​ជំទាស់​ពី​ភាគី​ថៃ​នោះ។

បញ្ហា​​នេះ នៅ​ក្នុង​អំឡុង​​ថ្ងៃ​ថ្វាយ​ព្រះ​ភ្លើង ព្រះ​បរម​សព ព្រះ​មហា​វីរក្សត្រ សម្ដេច​ព្រះ នរោត្តម សីហនុ កម្ពុជា​បង្ខំ​ទម្លាយ​អាង​ស្តុក​ទឹក​មួយ​កន្លែង នៅ​ក្នុង​វត្ត​កែវសិក្ខាគិរីស្វារៈ ទៅ​តាម​ការ​ទាមទារ​របស់​ភាគី​ថៃ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (6)
  • បោះពុម្ព
  • ចែករំលែក
  • អ៊ីម៉ែល

Hong

ពី Siem Reap) (Siem Reap

នៅ​ក្នុង​អំឡុង​​ថ្ងៃ​ថ្វាយ​ព្រះ​ភ្លើង ព្រះ​បរម​សព ព្រះ​មហា​វីរក្សត្រ សម្ដេច​ព្រះ នរោត្តម សីហនុ កម្ពុជា​បង្ខំ​ទម្លាយ​អាង​ស្តុក​ទឹក​មួយ​កន្លែង នៅ​ក្នុង​វត្ត​កែវសិក្ខាគិរីស្វារៈ ទៅ​តាម​ការ​ទាមទារ​របស់​ភាគី​ថៃ៕ WHY?WHY?

Mar 28, 2013 08:22 AM

កញ្ញា មាស កល្យាណ

ពី ភ្នំពេញ

ខ្មែរជាន់ដើមបានយល់ច្បាស់អំពីរឿងខ្មែរល្ងង់ បានជាលោកប្រឌិតរឿង ព្រះគោព្រះកែវ ឡើងដើម្បីប្រដៅខ្មែរកុំឲ្យចាញ់បោកសៀមទៀត ។ យើងមានប្រាក់ឌួងជាឧទាហរណ៍ស្រាប់ ។ លេងតាមកម្លាំងបាយ តាមផ្លូវច្បាប់មិនឈ្នះ ត្រូវលេងតាមផ្លូវត្រជាក់ ព្រោះខ្មែរចូលចិត្តឲ្យគេលូនក្រាបនៅចំពោះមុខខ្លួន មិនថាស្តេច មិនថានាហ្មឺន មិនថារាស្ត្រឡើយ ។ មានចិន-យួន-សៀម និងបារាំង ស្គាល់ខ្មែរយ៉ាងច្បាស់ ថាខ្មែរចូលចិត្តអំណាចនិងលុយ ។ តើពេលណាទើបខ្មែរឈប់ចាញ់បោកគេ ។

Feb 17, 2013 08:42 PM

អ្នក​អាន​អនាមិក

ហេតុអ្វីខ្មែរធ្វើតាមការទាមទារបស់សៀមច្រើនយ៉ាងនេះ? តើការប្ដឹងប្ដល់នៅទីក្រុងឡាអេអំពីប្រាសាទព្រះវិហានោះសង្ឃឹមឈ្នះឬទេ?

Feb 17, 2013 07:09 PM

អ្នក​អាន​អនាមិក

ពី Washington, USA

After than thirty years in leading Cambodia in the wrong direction (under pressure from communist and expansionnist Yuon), Hun Sen needs to get educated helping our people- Please go back to Paris Peace Agreement october 23, 1991, It will take care Border & social isuues of our beloved Cambodia and her people.

Feb 17, 2013 09:05 AM

អ្នក​អាន​អនាមិក

Thai created 4.6SK to gain access to Khmer land whereas Phay Xiphan and his Boss cede Koh Trol and lands along eastern border to VN quietly. What a wonderful leader team !!!!

Feb 17, 2013 08:53 AM

មើល​មតិ​ទាំង​អស់.

គេហទំព័រ​ទាំងមូល