បុគ្គលិកអង្គការ The United Communities Southeast Philadelphia ក្នុងរដ្ឋផេនស៊ីលវានៀ (Pennsylvania) សហរដ្ឋអាមេរិក លោក សេង ដេវីដ (Seng David) បានឲ្យដឹងថា ក្រុមរបស់លោក រួមនឹងតំណាងសហគមន៍ខ្មែរក្នុងរដ្ឋនេះ បានដាក់សំណើទៅលោកនាកយរដ្ឋមន្រ្តី ហ៊ុន សែន តាមរយៈក្រុមមន្ត្រីការទូតរបស់កម្ពុជា ដើម្បីជំរុញឲ្យរដ្ឋាភិបាលទីក្រុងភ្នំពេញ រកយុទ្ធសាស្ត្រថ្មី ធ្វើការចរចាកែប្រែគោលការណ៍បញ្ជូនជនអន្តោប្រវេសន្តខ្មែរចេញពីសហរដ្ឋអាមេរិក។
លោក សេង ដេវីដ មានប្រសាសន៍បន្ថែមថា ៖ «ហើយបានបញ្ជូនទៅឲ្យលោក អ៊ុជ បូរិទ្ធ និងស្ថានទូតខ្មែរប្រចាំក្នុងទីក្រុងវ៉ាស៊ីនតុន (Washington)។ ពួកគាត់បានទទួល ហើយថាបានយល់ព្រមនឹងពិនិត្យមើលនូវសំណុំរឿង និងឯកសារដែលខ្ញុំបានបញ្ជូនទៅឲ្យគាត់ហ្នឹង គាត់នឹងយកទៅឲ្យសម្តេចនាយកដើម្បីឲ្យលោកពិចារណាសាថ្មីឡើងវិញ អំពីរឿងយកប្រជាជនខ្មែរយើងពីសហរដ្ឋអាមេរិកនេះទៅ»។
ឯកអគ្គរាជទូតខ្មែរប្រចាំសហរដ្ឋអាមេរិក លោក ហែម ហេង មានប្រសាសន៍ថា លោកបានទទួលរបាយការណ៍ស្នើសុំអន្តរាគមន៍ពីសហគមន៍ខ្មែរក្នុងទីក្រុងហ្វីឡាឌែលហ្វីយ៉ា (Philadelphia) ហើយព្រមទាំងបានបញ្ជូនពាក្យស្នើនោះទៅឲ្យលោកនាយករដ្ឋមន្ត្រី ហ៊ុន សែន រួចរាល់ដែរ ប៉ុន្តែលោកនៅមិនទាន់ដឹងអំពីចម្លើយយ៉ាងណានោះនៅឡើយទេ។
លោក ហែម ហេង មានប្រសាសន៍ដូច្នេះ ៖ «ខ្ញុំបានបញ្ជូនទៅភ្នំពេញហើយ ព្រោះគេបានសរសេរទៅសម្តេច។ ខ្ញុំអត់មានយោបល់ទេអាហ្នឹង ទាល់តែចាំរាជរដ្ឋាភិបាលពិនិត្យនិងសម្រេច។ ឯកឧត្តម អ៊ុជ បូរិទ្ធ ឲ្យខ្ញុំផ្ញើលិខិតហ្នឹងទៅ ប៉ុន្តែអត់ទាន់មានយោបល់យ៉ាងម៉េចទេ។ មិនដឹងទេអាហ្នឹង ប្រសិនបើយល់ឃើញថា អាហ្នឹងធ្វើទៅវាខាតបង់ អាហ្នឹងគេអាចធ្វើវិសោធនកម្មទៅណា។ ប៉ុន្តែខ្ញុំអាស្រ័យទៅលើរដ្ឋាភិបាលជាអ្នកសម្រេច»។
ចាប់តាំងពីឆ្នាំ២០០២ ក្រោយពេលរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក ចុះកិច្ចព្រមព្រៀងលើអនុស្សរណៈយោគយល់គ្នាក្នុងការទទួលយកជនអន្តោប្រវេសន៍ខ្មែរ ដែលធ្លាប់ប្រព្រឹត្តបទល្មើសនៅសហរដ្ឋអាមេរិកទៅកម្ពុជាវិញនោះមក មានមនុស្សចំនួន ២៣៦នាក់ហើយត្រូវគេបញ្ជូនមកកម្ពុជា។
មនុស្សប្រមាណ ១.២៦៤នាក់ទៀត កំពុងស្ថិតក្នុងបញ្ជីអាជ្ញាធរអន្តោប្រវេសន៍របស់សហរដ្ឋអាមេរិក ដែលកំពុងត្រៀមបញ្ជូនទៅកាន់ប្រទេសកម្ពុជាជាបណ្តើរៗ នៅពេលខាងមុខ។
លោក សេង ដេវីដ បានសម្តែងការព្រួយបារម្ភថា ប្រសិនបើពលរដ្ឋខ្មែរត្រូវគេបញ្ជូនកាន់តែច្រើនថែមទៀតចេញពីសហរដ្ឋអាមេរិក នោះនឹងធ្វើឲ្យសំឡេងរបស់ជាតិសាសន៍ខ្មែរទន់ខ្សោយ នៅពេលណាពួកគេចង់ចូលរួមតស៊ូមតិកែប្រែគោលនយោបាយរបស់រដ្ឋាភិបាលអាមេរិកាំងណាមួយ ដែលមិនផ្តល់ប្រយោជន៍ដល់ខ្មែរនោះ។
លោក សេង ដេវីដ មានប្រសាសន៍ដូច្នេះ ៖ «បើកាលណាយើងយកប្រជាជនយើងអស់ទៅ វាអត់មានផលចំណេញទេសម្រាប់ប្រទេសកម្ពុជាសោះ ហើយបើយើងទុកខ្មែរឲ្យនៅទីនេះ យ៉ាងហោចណាស់ក្នុងម្នាក់ក៏អាចរកលុយបានផ្ញើទៅឲ្យក្រុមគ្រួសារមួយខែ ១០០ដុល្លារ ក៏អាចបន្ធូរនូវជីវភាពបានដែរ ដូច្នេះវាជារឿងមួយមានប្រយោជន៍ជាងបើសិនជាទុកខ្មែរនៅសហរដ្ឋអាមេរិកនេះ»។
ចំណែកលោក ល័ក្ខ និស្ស័យ ដែលជាអ្នកជំនាញខាងច្បាប់អន្តោប្រវេសន៍ប្រចាំទីក្រុងឡូវែល (Lowell) រដ្ឋម៉ាស្សាឈូសេត (Massachusetts) មានប្រសាសន៍ថា លោកគាំទ្រចំពោះការស្នើសុំរបស់សហគមន៍ខ្មែរប្រចាំទីក្រុងហ្វីឡាឌែលហ្វីយ៉ា ដែលជំរុញឲ្យលោកនាយករដ្ឋមន្ត្រី ហ៊ុន សែន ធ្វើការចរចាឡើងវិញជាមួយរដ្ឋាភិបាលសហរដ្ឋអាមេរិក អំពីករណីបញ្ជូនជនអន្តោប្រវេសន៍ខ្មែរដែលធ្លាប់ប្រព្រឹត្តបទល្មើសធ្ងន់ ឬស្រាលនោះ។
លោក ល័ក្ខ និស្ស័យ យល់ឃើញដូច្នេះ ៖ «គំនិតរបស់ខ្ញុំក៏យល់អ៊ីចឹងដែរ ហ៊ុន សែន ត្រូវតែមានការចរចាជាមួយស្ថានទូត ឬជាមួយរដ្ឋមន្ត្រីក្រសួងការបរទេសសហរដ្ឋអាមេរិកាំងហ្នឹង ដើម្បីឲ្យមានការកែប្រែឡើងវិញ អត់ត្រូវឲ្យមាននៅអ៊ីចឹងរហូតតទៅទៀតទេ ពីព្រោះវាអត់ត្រឹមត្រូវទេអាហ្នឹងណា។ អានេះជារឿងនៃការឈឺចាប់របស់ប្រជាជនខ្មែរយើងម្ដងទៀតហើយ វាមិនច្រើនទេ តែវាក៏មានចំនួនធំដែរ។ វាធ្វើឲ្យយើងដែលនៅជុំវិញហ្នឹងក៏មានការឈឺចាប់ដែរ»។
ក្រុមអ្នកវិភាគអំពីបញ្ហាអន្តោប្រវេសន៍បានលើកឡើងថា គោលការណ៍នៃការបញ្ជូនជនអន្តោប្រវេសន៍ទៅប្រទេសកំណើតរបស់គេវិញនោះ គួរធ្វើឡើងក្នុងលក្ខណៈមនុស្សធម៌ជាងនេះ ដោយមិនមានការបំបែកបំបាក់ប្រពន្ធកូន ឬសាច់ញាតិបងប្អូននោះឡើយ។
លោក ត្រាវីស ផេគ័រ (Travis Packer) ជំនួយការខាងការស្រាវជ្រាវគោលនយោបាយរបស់មជ្ឈមណ្ឌលគោលនយោបាយអន្តោប្រវេសន៍ ដែលមានមូលដ្ឋានក្នុងរដ្ឋធានីវ៉ាស៊ីនតុន បានមានប្រសាសន៍ថា ដើម្បីធ្វើការបញ្ចុះបញ្ចូលឲ្យមានការកែប្រែគោលនយោបាយបញ្ជូនជនអន្តោប្រវេសន៍ទៅស្រុកកំណើតវិញ ពលរដ្ឋទាំងនោះគួរជំរុញទៅក្រុមតំណាងរាស្ត្រដែលនៅប្រចាំក្នុងរដ្ឋរបស់ពួកគេ ដើម្បីយកទៅជជែកពិភាក្សា ស្វែងរកសំឡេងគាំទ្រក្នុងការធ្វើកំណែទម្រង់។
លោក ត្រាវីស ផេគ័រ មានប្រសាសន៍ថា ៖ «សហរដ្ឋអាមេរិកកំពុងបន្តបញ្ជូនត្រឡប់ជនអន្តោប្រវេសន៍ដែលធ្លាប់មានទោសទៅកាន់ស្រុកកំណើតរបស់គេវិញ គួរធ្វើឡើងឲ្យមានការគោរពសិទ្ធិមនុស្សជាងនេះ។ ច្បាប់បញ្ជូនត្រឡប់ទៅវិញនោះ គួរធ្វើឡើងឲ្យមានលើកលែងថែមទៀតដល់មនុស្ស ឧទាហរណ៍ដូចអ្នកខ្លះមានការងារ មានគ្រួសារ ហើយអ្នកនោះធ្លាប់ប្រព្រឹត្តបទល្មើសពួកគេមិនត្រូវបញ្ជូនត្រឡប់ទៅស្រុកកំណើតវិញនោះទេ ដោយសារអ្នកទាំងនោះជាជនអន្តោប្រវេសន៍ស្របច្បាប់មានឯកសារត្រឹមត្រូវ។ ប៉ុន្តែសហរដ្ឋអាមេរិក នៅតែបញ្ជូនអ្នកទាំងនោះទៅដដែល»។
លោក ត្រាវីស មានប្រសាសន៍ថា ដើម្បីផ្លាស់ប្តូរគោលការណ៍បញ្ជូនជនអន្តោប្រវេសន៍នេះបាន លុះត្រាតែមានសមាជិកព្រឹទ្ធសភាចំនួនភាគច្រើនលើសពី ៥០នាក់ឡើងទៅ ទើបអាចធ្វើការអនុម័តកែប្រែបាន។
ជុំវិញបញ្ហានេះ ក្រុមសង្គមស៊ីវិលនៅសហរដ្ឋអាមេរិក បានអំពាវនាវឲ្យពលរដ្ឋអន្តោប្រវេសន៍ទាំងអស់ប្រញាប់ចូលសញ្ជាតិអាមេរិក ដើម្បីទប់ទល់នឹងច្បាប់អន្តោប្រវេសន៍ ដែលតម្រូវឲ្យអាជ្ញាធរចាប់បញ្ជូនទៅប្រទេសដើមនោះ។
ក្រុមអ្នកវិភាគនិយាយថា រដ្ឋបាលរបស់លោកប្រធានាធិបតី បារ៉ាក់ អូបាម៉ា (Barack Obama) ធ្វើការឃុំខ្លួន និងចាប់បញ្ជូនត្រឡប់ជនអន្តោប្រវេសន៍ទាំងឡាយណាដែលធ្លាប់ប្រព្រឹត្តបទល្មើសទាំងធ្ងន់ ទាំងស្រាលក្នុងសហរដ្ឋអាមេរិកទៅស្រុកកំណើតរបស់ពួកគេវិញមានចំនួនច្រើនជាងរដ្ឋបាលរបស់លោកអតីតប្រធានាធិបតី ចច ប៊ូស (George W. Bush) បើទោះបីជាលោកប្រធានាធិបតី អូបាម៉ា ធ្លាប់សន្យាថា នឹងជំរុញឲ្យមានការធ្វើកំណែទម្រង់ច្បាប់អន្តោប្រវេសន៍នៅក្នុងយុទ្ធនាការឃោសនារកសំឡេងឆ្នោតរបស់លោកមុនពេលលោកជាប់ជាប្រធានាធិបតីក៏ដោយ៕