ក្រោយពីកិច្ចប្រជុំរយៈពេល២ថ្ងៃ ដែលហាមប្រាមមិនឲ្យអ្នកសារព័ត៌មានស្តាប់ផងនោះ រដ្ឋលេខាធិការក្រសួងការបរទេសនៃប្រទេសកម្ពុជា និងជាប្រធានក្រុមមន្រ្តីជាន់ខ្ពស់ក្នុងគណៈកម្មការចម្រុះនៃកិច្ចប្រជុំលើកទី១១ កម្ពុជា-វៀតណាម នៅខេត្តព្រះសីហនុ លោក អ៊ុង សៀន បានថ្លែងថា កម្ពុជានិងវៀតណាមដែលមានរដ្ឋមន្ត្រីការបរទេសវៀតណាម លោក ផាម ហ្កាយឃៀម (Pham Gia Khiem) បានចុះហត្ថលេខារួមគ្នាជាមួយកម្ពុជាលើពិធីសារកិច្ចសហប្រតិបត្តិការក្នុងគោលដៅចំនួន២៦ចំណុច។
លោក អ៊ុង សៀន បានថ្លែងដូច្នេះ ៖ «យើងកំពុងខិតខំធ្វើយ៉ាងណារកដីឲ្យបានគ្រប់ចំនួន១សែនហិកតាតាមសំណើរបស់វៀតណាម។ សំខាន់បំផុតគឺទាក់ទងទៅដល់បញ្ហាព្រំដែន ធ្វើការងារនេះ ធ្វើយ៉ាងណាកំណត់ព្រំដែនគោករវាងប្រទេសទាំងពីរនេះឲ្យបានចប់នៅឆ្នាំ២០១២។ ឧស្សាហកម្មក៏យើងមានសហប្រតិបត្តិការលើបញ្ហាធ្វើវារីអគ្គិសនីនៅតាមដងទន្លេសេសានទី២នោះ»។
លោកបន្តថា កម្ពុជាក៍បានព្រមព្រៀងផ្តល់ទិដ្ឋាការដល់ភ្ញៀវទេសចរណ៍ប្រទេសទាំងពីរកើនឡើងរហូត៣០ថ្ងៃ ដែលពីមុនមានតែរយៈពេលតែ១៤ថ្ងៃទេ និងផ្តល់ទិដ្ឋាការដល់កម្មករវៀតណាម ដែលមករកការងារធ្វើនៅកម្ពុជាមានរយៈពេលមួយឆ្នាំ ហើយក៍នៅមានចំណុចសេសសល់មួយចំនួនទៀត ដែលមិនទាន់មានការព្រមព្រៀងពេញលេញនៅឡើយ ហើយរង់ចាំកិច្ចពិភាក្សាគ្នាលើកក្រោយៗទៀត។
លោក អ៊ុង សៀន មានប្រសាសន៍បន្តដូច្នេះ ៖ «សំណើរបស់វៀតណាមដែលចង់ធ្វើការជជែកគ្នានឹងឈានទៅដល់ការចុះហត្ថលេខាលើកិច្ចព្រមព្រៀងស្ដីពីការមិនបង់ពន្ធត្រួតគ្នា ហើយយើងគ្រាន់តែកត់ត្រាទុកនូវសំណើរបស់វៀតណាមទេ»។
ការព្រមព្រៀងដូច្នេះត្រូវបានមន្ត្រីគណបក្សសិទ្ធិមនុស្សរិះគន់យ៉ាងធ្ងន់ធ្ងរ។
ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ពន្យល់ថា កម្ពុជាកំពុងបង្ហាញការយកចិត្តទុកដាក់ផ្តល់ឱកាសឲ្យប្រទេសវៀតណាមយ៉ាងខ្លាំង នៅពេលកម្ពុជាកំពុងមានបញ្ហាជាមួយប្រទេសថៃ ហើយកិច្ចសហប្រតិបត្តិការនេះភាគច្រើន គឺពិតជាប៉ះពាល់ដល់ការរស់នៅរបស់ប្រជាពលរដ្ឋកម្ពុជាច្រើនជាងការចំណេញ។
លោក កឹម សុខា មានប្រសាសន៍ដូច្នេះ ៖ «បើខ្មែរយើងអត់ទាន់មានដីគ្រប់ផង ខ្មែរយើងចេះដាំកៅស៊ូដែរ រដ្ឋាភិបាលយើងម៉េចមិនឲ្យខ្មែរដាំ ម៉េចបានចាំឲ្យយួនដាំ? បញ្ហាដែលបន្តវីសា ធ្វើវីសាឲ្យយួនចូលមកធ្វើការស្រុកខ្មែររយៈពេលវែងអ៊ីចឹងវាជាការគ្រោះថ្នាក់ដែរ ព្រោះការងារនៅស្រុកខ្មែរ យើងមើលទៅប្រទេសកម្ពុជាមិនមែនជាកន្លែងទីផ្សារការងារទេ»។
ជាមួយគ្នានឹងការរិះគន់នេះ មន្រ្តីជាន់ខ្ពស់នៃប្រទេសទាំងពីរ បានហៅការព្រមព្រៀងនេះថា ជាជោគជ័យមួយដ៏ល្អនៃកិច្ចសហប្រតិបត្តិការកម្ពុជា-វៀតណាម ហើយគេបន្តបង្កើនកិច្ចសហប្រតិបត្តិនេះជាបន្តបន្ទាប់ទៅមុខទៀត៕