អនុរដ្ឋលេខាធិការក្រសួងសុខាភិបាលលោកសាស្រ្តាចារ្យ ស៊ា ហួង បានថ្លែងតាមរយៈសុន្ទរកថាស្វាគមន៍ចំពោះភ្ញៀវជាតិអន្តរជាតិដែលចូលរួមក្នុងកិច្ចប្រជុំថា បច្ចុប្បន្ននេះឱសថក្លែងក្លាយនិងអន់គុណភាពកំពុងចោទជាបញ្ហាយ៉ាងស្មុគស្មាញ និងកំពុងតែរីករាលដាល បង្កការគំរាមកំហែងយ៉ាងធ្ងន់ធ្ងរដល់សុខុមាលភាព អាយុជីវិតរបស់មនុស្សជាតិ និងធ្វើឲ្យរេចរឹលដល់ខឿនសេដ្ឋកិច្ចសង្គម និងជីវភាពរស់នៅប្រចាំថ្ងៃរបស់ប្រជាពលរដ្ឋកម្ពុជា ក៏ដូចជាបណ្តាប្រទេសដទៃទៀត។
លោកសាស្រ្ដាចារ្យ ស៊ា ហួង បានថ្លែងដូច្នេះ ៖ «ការរាំងស្ទះនូវការកាត់បន្ថយភាពក្រីក្ររបស់ប្រជាជន និងការអភិវឌ្ឍសង្គមជាតិ»។
នាយកឃ្លាំមើលការចរាចរឱសថក្លែងក្លាយក្នុងអនុតំបន់ទន្លេមេគង្គ លោកស្រី អានលិស ស៊ូតធឺរី (Anne-lise Sauterey) ដែលបានបង្ហាញជុំវិញផលលំបាកក្នុងការទប់ស្តាត់ចរាចរណ៍ឱសថក្លែងក្លាយ និងផលប៉ះពាល់នៅក្នុងប្រទេសស្ថិតនៅអនុតំបន់ទន្លេមេគង្គ បានបង្ហាញថា នៅប្រទេសជឿនលឿន ផលប៉ះពាល់និងការខាតបង់មានប្រមាណ១%ប៉ុណ្ណោះ ចំណែកប្រទេសដែលកំពុងអភិវឌ្ឍន៍មានដល់ជាង១០%។ ដោយឡែកនៅកម្ពុជា ការសិក្សាស្រាវជ្រាវបានបង្ហាញថា ការចរាចរ ការប្រើប្រាស់ ការផលិតឱសថក្លែងក្លាយ មានប្រមាណពី៣០% ទៅ ៤០%។
លោកស្រី អានលិស ស៊ូតធឺរី មានប្រសាសន៍ដូច្នេះ ៖ "នេះគឺអ្វីមួយដែលមានគ្រោះថ្នាក់ ពីព្រោះប្រទេសកម្ពុជាចាត់ទុកថា ជាប្រទេសដែលមានទីផ្សារ មានកន្លែងផលិត និងជាកន្លែងសម្រាប់នាំចេញទៅកាន់ប្រទេសដទៃទៀត ដូច្នេះនេះជាកន្លែងមួយដែលល្អសម្រាប់អ្នកក្លែងបន្លំទាំងអស់នោះ"។
មន្រ្តីជាន់ខ្ពស់មួយរូបមកពីក្រសួងយុត្តិធម៌ប្រទេសកម្ពុជា បានប្រាប់វិទ្យុអាស៊ីសេរីក្នុងលក្ខខណ្ឌមិនឲ្យបញ្ចេញឈ្មោះថា បច្ចុប្បន្នកន្លែងលក់ថ្នាំពេទ្យមានប្រមាណជា១.០០០កន្លែងនៅទូទាំងប្រទេសដែលដំណើរការខុសច្បាប់ ហើយច្បាប់បង្រាបក៏មានលក្ខណៈគ្រប់គ្រាន់ ប៉ុន្តែការបង្រ្កាបនៅតែពុំសូវមានប្រសិទ្ធភាព ដោយសារអ្នកដែលមានមុខងារចុះអនុវត្តច្បាប់ទាំងនោះ គឺជាអ្នកបង្កើតមុខរបរនេះដោយខ្លួនឯង។
សិក្ខាសាលាថ្នាក់តំបន់ ស្តីពីការប្រយុទ្ធប្រឆាំងការផលិតឱសថក្លែងក្លាយ ដែលមានការចូលរួមពិភាក្សារកគន្លឹះដោះស្រាយនូវអ្វីជាបញ្ហាចោទធ្ងន់ធ្ងរ អង្គការសុខភាពពិភពលោក (WHO) មន្រ្តីស្ថានទូតបារាំង អ្នកជំនាញសុខុមាលភាព និងអង្គការពាក់ព័ន្ធមកពីប្រទេស៥ផ្សេងទៀត រួមមានលាវ វៀតណាម ចិន សិង្ហបុរី ដោយឡែកមន្រ្តីសុខាភិបាលថៃ អវត្តមានដោយពុំមានមូលហេតុ។ ចំណែកកម្ពុជា ក្រៅពីមន្រ្តីសុខាភិបាលក៏មានមន្រ្តីស្ថាប័នពាក់ព័ន្ធជាច្រើនទៀត ចូលរួមក្នុងសិក្ខាសាលាថ្នាក់តំបន់នេះដែរ៕