លោក កុយ គួង មន្ត្រីនាំពាក្យក្រសួងការបរទេសខ្មែរ បានមានប្រសាសន៍ឲ្យដឹងនៅថ្ងៃទី៩ ខែកុម្ភៈថា រដ្ឋមន្ត្រីការបរទេសខ្មែរ លោក ហោ ណាំហុង មិនបានជួបជាមួយរដ្ឋមន្ត្រីក្រសួងការបរទេសថៃទេ កាលពីថ្ងៃទី៨ ខែកុម្ភៈនោះ ផ្ទុយទៅវិញ ឯកអគ្គរាជទូតថៃ ប្រចាំនៅកម្ពុជាទេ ដែលបានយកសំណើរបស់លោក កាស៊ីត ភិរម្យ ដើម្បីស្នើសុំចរចាទ្វេភាគីសាជាថ្មីម្ដងទៀត ប៉ុន្តែត្រូវបានលោក ហោ ណាំហុង បដិសេធ។
លោក កុយ គួង បានថ្លែងឲ្យភាគីថៃ ដឹងសាជាថ្មីម្ដងទៀតថា កម្ពុជាមិនដោះស្រាយទ្វេភាគីជាមួយភាគីថៃទៀតឡើយ ពីព្រោះថា ការដោះស្រាយទ្វេភាគីជាមួយថៃ អស់រយៈពេលពីរឆ្នាំមកហើយ ប៉ុន្តែថៃនៅតែបន្តឈ្លានពាន និងបាញ់ប្រហារមកលើកងទ័ពកម្ពុជា ជាបន្តបន្ទាប់។
លោកបន្តទៀតថា ៖ «ភាគីថៃ គ្រាន់តែទន្ទេញឲ្យគ្រាន់តែល្អស្ដាប់ដូចសេកតែប៉ុណ្ណោះ ប៉ុន្តែឆន្ទៈពិតប្រាកដគឺគ្មានទាល់តែសោះ។ មានន័យថា ដៃម្ខាងនិយាយថា ដោះស្រាយទ្វេភាគីដោយសន្តិវិធី ប៉ុន្តែដៃម្ខាងទៀតប្រើកម្លាំងកងទ័ពយោធាដឹកជញ្ជួនមកដាក់នៅតាមព្រំដែន ដោយយកលេសថា ធ្វើសមយុទ្ធ តែតាមពិតគឺយកមកឈ្លានទឹកដីកម្ពុជា»។
នៅថ្ងៃទី៩ ខែកុម្ភៈ ដដែលនេះ ក្រសួងការបរទេសខ្មែរ ក៏បានចេញសេចក្ដីថ្លែងការណ៍មួយទៀត ដោយច្រានចោលនូវការចោទប្រកាន់របស់លោក សានស៊ីន កែវខាមនីត (Sansin Keokhamnit) អ្នកនាំពាក្យកងទ័ពថៃ បាននិយាយនៅក្នុងកាសែតបាងកក ប៉ុស្តិ៍ កាលពីថ្ងៃទី៨ ខែកុម្ភៈថា កងទ័ពកម្ពុជា បានប្រើប្រាស់ប្រាសាទព្រះវិហារជាមូលដ្ឋានកងទ័ព ដើម្បីវាយប្រហារទៅលើទាហានថៃនោះ។
លោក កុយ គួង បានអះអាងថា លោកវរសេនីយ៍ឯក សានស៊ីន កែវខាមនីត បានមួលបង្កាច់កងទ័ពកម្ពុជា ដើម្បីជាលេសនៃការឈ្លានពានរបស់ភាគីថៃ មកលើទឹកដីកម្ពុជាតែប៉ុណ្ណោះ ពីព្រោះថា ប្រាសាទព្រះវិហារ គឺជាកន្លែងទីសក្ការបូជា និងជាតំបន់ទេសចរណ៍ប៉ុណ្ណោះ ហើយនៅទីនោះ មានតែភ្នាក់ងារនគរបាលមួយចំនួនតូច ដែលមានអាវុធធុនស្រាល ដើម្បីការពារសុវត្ថិភាពនៅបរិវេណប្រាសាទ។
លោក កុយ គួង បន្ថែមថា ៖ «ថ្មីៗនេះជាការពិត គឺថា ខាងជំនាញហ្នឹង ផ្នែកកងទ័ពគេទៅត្រួតពិនិត្យមើលបញ្ហាគ្រាប់ផ្សេងៗ ដែលខាងទាហានថៃ បាញ់មកលើ ដូច្នេះមានតែខាងកងទ័ពទេដែលមានបច្ចេកទេសក្នុងការពិនិត្យមើលគ្រាប់ប្រភេទអីនោះ»។
សារព័ត៌មានថៃ ដដែល បានចុះផ្សាយនៅព្រឹកថ្ងៃទី៩ ខែកុម្ភៈថា យ៉ាងតិចណាស់មានរថយក្រោះ ១០គ្រឿង ត្រូវបានគេបញ្ជូនពីទីក្រុងបាងកក ទៅកាន់តំបន់ព្រំដែន កាន់កាថារាឡាក់ នៅក្នុងខែត្រស៊ីសាកេត ប្រទេសថៃ។
អតីតព្រះមហាក្សត្រខ្មែរ គឺព្រះបាទសម្ដេច នរោត្តម សីហនុ បានចេញព្រះរាជសារមួយ កាលពីថ្ងៃទី៨ ខែកុម្ភៈ ដោយព្រះអង្គមានបន្ទូលថា ប្រទេសថៃ នៅតែមានបំណងចង់បានប្រាសាទព្រះវិហារ ដើម្បីបញ្ចប់រឿងប្រវត្តិសាស្ត្រទាក់ទងទៅនឹងប្រាសាទព្រះវិហារនេះ។ ប៉ុន្តែតុលាការអន្តរជាតិទីក្រុងឡាអេ បានបញ្ចប់រួចទៅហើយអំពីជម្លោះដ៏ធ្ងន់ធ្ងរនេះ គឺតុលាការនេះបានប្រកាសសាលក្រមនៅឆ្នាំ១៩៦២ ថា ប្រាសាទព្រះវិហារខ្មែរគឺជាប្រាសាទរបស់ខ្មែរតែមួយគត់។
សារព័ត៌មាន BNO News របស់ថៃ បានផ្សាយនៅថ្ងៃទី៩ ខែកុម្ភៈនេះថា នាយកគ្រប់គ្រងទូទៅនៃអង្គការយូណេស្កូ (UNESCO) នឹងបញ្ជូនបេសកជនរបស់ខ្លួននៅក្នុងពេលឆាប់ៗនេះទៅកាន់ប្រាសាទព្រះវិហារ ដើម្បីធ្វើការប៉ាន់ប្រមាណទំហំខូចខាតនៃប្រាសាទនេះ។
លោកស្រី អ៊ីរីណា បូកូវ៉ា (Irina Bokova) នាយកគ្រប់គ្រងទូទៅរបស់អង្គការយូណេស្កូ បានមានប្រសាសន៍ថា បេតិកភណ្ឌពិភពលោក គឺជាមរតករបស់មនុស្សជាតិទាំងអស់ ហើយសហគមន៍អន្តរជាតិត្រូវតែការពារប្រាសាទព្រះវិហារ ដែលជាបេតិកភណ្ឌពិភពលោកជាពិសេស។
លោក កុយ គួង បានឲ្យដឹងថា ប្រធានក្រុមប្រឹក្សាសន្តិសុខនៃអង្គការសហប្រជាជាតិ បានឲ្យកម្ពុជាដឹងថា គេគាំទ្រចំពោះប្រធានសមាគមអាស៊ានក្នុងការដោះស្រាយបញ្ហាជម្លោះខ្មែរ-ថៃនេះ ហើយគេនៅចាំមើលបន្តទៀត បើសិនជាប្រធានសមាគមអាស៊ានដោះស្រាយមិនបានទេ គឺប្រធានក្រុមប្រឹក្សាសន្តិសុខនៃអង្គការសហប្រជាជាតិ គេនឹងកោះប្រជុំសម័យប្រជុំរបស់ខ្លួននៅពេលឆាប់ៗនេះ៕