លោក ហង់ ជួនណារ៉ុន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ មានប្រសាសន៍នៅថ្ងៃទី១១ ខែឧសភា ថា នៅក្នុងឆ្នាំ២០១១ សេដ្ឋកិច្ចកម្ពុជា មានកំណើនដល់ ៧.១% លើសឆ្នាំ២០១០ ដែលមានត្រឹមតែ ៦%។
លោករដ្ឋលេខាធិការបានបញ្ជាក់អំពីមូលហេតុនៃកំណើនសេដ្ឋកិច្ចកម្ពុជា គឺដោយសារការផលិតស្រូវកម្ពុជា នៅតែមានកំណើន បើទោះបីជាកម្ពុជា ជួបប្រទះគ្រោះទឹកជំនន់ ការនាំចេញខោអាវដេរស្រាប់របស់កម្ពុជា ទៅបរទេសនៅតែកើន សេវាកម្មលើវិស័យទេសចរណ៍មានកំណើនភ្ញៀវចំនួនធនាគារនៅកម្ពុជា មានកំណើន រួមជាមួយការផ្ដល់ប្រាក់កម្ចីមានការកើន៖ «ចំណុចសំខាន់មួយទៀតរបស់កម្ពុជា គឺវិស័យធនាគារនេះ យើងអត់ប៉ះពាល់ទេ។ ចំនួនធនាគារមានការកើនឡើង វាធ្វើឲ្យចំនួនប្រាក់បញ្ញើមានការកើនឡើងដែរ គឺដល់ទៅ ៥.០០០លានដុល្លារ ហើយការផ្ដល់ប្រាក់កម្ចីក៏មានការកើនឡើងដែរ គឺជាង ៤.០០០លានដុល្លារ។ ដល់អ៊ីចឹងទៅ បើយើងប្រៀបធៀបជាមួយវិនិយោគទុន គឺមានប្រហែល ៦០០លានដុល្លារក្នុង ១ឆ្នាំប៉ុណ្ណោះ។ អ៊ីចឹងចំនួនប្រាក់កម្ចីរបស់ធនាគារនេះ វាជួយឲ្យកើនកំណើនសេដ្ឋកិច្ចនេះ»។
ការបញ្ជាក់ពីកំណើនសេដ្ឋកិច្ចកម្ពុជា របស់មន្ត្រីជាន់ខ្ពស់កម្ពុជា បានធ្វើឡើងនៅក្នុងឱកាសសន្និសីទកាសែតនៅទីស្នាក់ការកម្មវិធីអង្គការសហប្រជាជាតិនៅកម្ពុជា ស្ដីពីលទ្ធផលការអង្កេតស្ទង់មតិសេដ្ឋកិច្ច និងសង្គម របស់តំបន់អាស៊ីប៉ាស៊ីហ្វិក របស់គណៈកម្មាធិការសេដ្ឋកិច្ច និងសង្គមប្រចាំតំបន់អាស៊ី របស់អង្គការសហប្រជាជាតិ ហៅកាត់ថា អេស្កាប់ (ESCAP)។
លោក ដានីញ៉ែល ជុងដាលី (Daniel Jeongdae Lee) មន្ត្រីទទួលការងារសេដ្ឋកិច្ចរបស់អេស្កាប់ បានធ្វើបទបង្ហាញអំពីលទ្ធផលការធ្វើអង្កេតស្ទង់មតិសេដ្ឋកិច្ច និងសង្គម របស់តំបន់អាស៊ីប៉ាស៊ីហ្វិករបស់អេស្កាប់ ឆ្នាំ២០១២ ឲ្យដឹងថា សេដ្ឋកិច្ចប្រទេសនានានៅតំបន់អាស៊ីប៉ាស៊ីហ្វិក មានការធ្លាក់ចុះនៅឆ្នាំ២០១២។ ការធ្លាក់ចុះនោះ គឺចុះថយពី ៧% នៅឆ្នាំ២០១១ មកនៅត្រឹម ៦.៥% នៅឆ្នាំ២០១២។
ការធ្លាក់ចុះនោះ ដោយសារការនាំចេញទំនិញមានការចុះថយ តែតម្លៃទំនិញនៅតែខ្ពស់វិបត្តិបំណុលនៅក្នុងសហគមន៍អឺរ៉ុប ភាពពុំនឹងនរបស់សេដ្ឋកិច្ចអាមេរិក និងតម្លៃប្រេងឆៅឡើងថ្លៃជាដើម។
លោក ហង់ ជួនណារ៉ុន មន្ត្រីជាន់ខ្ពស់ខាងសេដ្ឋកិច្ចរបស់កម្ពុជា បានអះអាងថា សេដ្ឋកិច្ចកម្ពុជា នៅឆ្នាំ២០១២ អាចមានកំណើនទៀត ពីព្រោះបច្ចុប្បន្នកម្ពុជា កំពុងតែរៀបចំប្រព័ន្ធហេដ្ឋារចនាសម្ព័ន្ធសេដ្ឋកិច្ចឲ្យកាន់ល្អជាងមុន ដើម្បីបង្កលក្ខណៈឲ្យវិនិយោគិនបរទេសមកបណ្ដាក់ទុនកាន់តែច្រើននៅកម្ពុជា។ ការពង្រឹងហេដ្ឋារចនាសម្ព័ន្ធទាំងនោះ មានដូចជាកសាងផ្លូវថ្មី កសាងតំបន់សេដ្ឋកិច្ចពិសេស កសាងវារីអគ្គិសនី និងកែលំអកំពង់ផែនៅសមុទ្រជាដើម។
លោក យឹម សុវណ្ណ ជាអ្នកតំណាងរាស្ត្រ និងជាអ្នកនាំពាក្យគណបក្ស សម រង្ស៊ី មានប្រសាសន៍ថា សេដ្ឋកិច្ចកម្ពុជា មានកំណើនមែន តែការបែងចែកផលបានពីកំណើនសេដ្ឋកិច្ចនោះ មិនបានដល់ប្រជាពលរដ្ឋភាគច្រើនឡើយ៖ «សេដ្ឋកិច្ចកម្ពុជា កើនឡើងបន្តិចបន្តួច ប៉ុន្តែបើយើងគិតពីកំណើនអតិផរណាទំនិញឡើងថ្លៃវិញ គឺវាកើនខ្លាំងជាងកំណើនសេដ្ឋកិច្ចទៅទៀត ហើយបើយើងគិតពីកំណើនប្រជាពលរដ្ឋ គឺប្រជាពលរដ្ឋកើនប្រហែលពី ២ ទៅ ៣% ក្នុង១ឆ្នាំ។ មានន័យថា ជីវភាពប្រជាពលរដ្ឋក៏មិនមានការរីកចំរើនដែរ ជាពិសេសទំនិញឡើងថ្លៃខ្លាំង។ ហើយបើយើងពិនិត្យមើលអំពីការបែងចែកកំណើនវិញនោះ មានអ្នកមានមួយចំនួនតូចកាន់តែមានឡើង»។
របាយការណ៍របស់អេស្កាប់ បានទស្សន៍ទាយថា សេដ្ឋកិច្ចកម្ពុជា ឆ្នាំ២០១២ អាចមានកំណើនដល់ ៦.៧% ទោះបីជាការនាំចេញខោអាវទៅទីផ្សារអាមេរិក និងអឺរ៉ុប មានការប៉ះពាល់ខ្លះក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។