ក្រុមសកម្មជនបរិស្ថានបានស្នើឲ្យសមាជិកនៃកិច្ចប្រជុំនេះគិតគូរជាចម្បងលើស្ថានភាពទឹកក្នុងអាងទន្លេមេគង្គ ដែលកំពុងមានផលប៉ះពាល់ដោយសារគម្រោងសាងសង់ទំនប់វារីអគ្គិសនី និងត្រូវត្រួតពិនិត្យឡើងវិញនូវរាល់គម្រោងអភិវឌ្ឍន៍ទាំងឡាយណា ដែលប៉ះពាល់ដល់ជីវភាពរស់នៅរបស់ប្រជាពលរដ្ឋតាមដងទន្លេនោះ។
រដ្ឋមន្ត្រីក្រសួងបរិស្ថាននៃបណ្ដាប្រទេសមហាអនុតំបន់ទន្លេមេគង្គ (GMS) ត្រូវគេរំពឹងថា នឹងធ្វើការសម្រេចចិត្តលើក្របខ័ណ្ឌនៃកម្មវិធីដើម្បីបន្តកិច្ចសហការផ្នែកបរិស្ថានរបស់តំបន់នេះនៅក្នុងកិច្ចប្រជុំលើកទី៣ ដែលប្រារព្ធធ្វើក្នុងប្រទេសកម្ពុជា នៅថ្ងៃទី២៧ ២៨ កក្កដា។
កិច្ចប្រជុំនេះនឹងប្រព្រឹត្តទៅក្រោមអធិបតីភាពលោកនាយករដ្ឋមន្ត្រី ហ៊ុន សែន។
មន្ត្រីសង្គមស៊ីវិលដែលធ្វើការអភិរក្សបរិស្ថានទន្លេមេគង្គ បានអបអរសាទរចំពោះកិច្ចប្រជុំនេះ ហើយសង្ឃឹមថា នឹងផ្ដល់ជាប្រយោជន៍ដល់ការចូលរួមអភិវឌ្ឍទន្លេមេគង្គ និងប្រជាពលរដ្ឋដែលរស់នៅតាមដងទន្លេនេះ។
ប្រធានកម្មវិធីអភិវឌ្ឍន៍បរិស្ថាននៃអង្គការសេប៉ា លោក តឹក វណ្ណរ៉ា មានប្រសាសន៍ថា កិច្ចប្រជុំនេះគួរតែពិនិត្យលើបញ្ហាមួយចំនួនជាអាទិភាពក្នុងការកសាង និងស្ដារឡើងវិញនូវការខូចខាតបរិស្ថាននៅអាងទន្លេមេគង្គនេះ ៖ «បញ្ហាសំខាន់មួយទៀតទាក់ទងនឹងបញ្ហាមេក្នុងការគ្រប់គ្រងបរិស្ថាន ទន្លេមេគង្គគួរតែត្រូវដាក់បញ្ចូល ហើយធ្វើការពិភាក្សាដើម្បីឲ្យមានផែនការមេសម្រាប់ប្រទេសទាំង៤ ឬប្រទេសទាំង ៦ហ្នឹង ធ្វើម៉េចឲ្យផែនការអភិវឌ្ឍន៍អាងទន្លេមេគង្គ បរិស្ថានឆ្លើយតបនឹងតម្រូវការរបស់ប្រជាជនដែលកំពុងរស់នៅពឹងអាស្រ័យផ្ទាល់ទៅលើធនធានទន្លេមេគង្គ ដែលពួកគាត់កំពុងរស់នៅហ្នឹង»។
លោកបន្តថា ចំណុចចាំបាច់ដូចជាបញ្ហាបរិស្ថានទឹកដែលកំពុងមានផលប៉ះពាល់ដោយសារគម្រោងសាងសង់វារីអគ្គិសនី ពិនិត្យមើលឡើងវិញចំពោះគម្រោងការអភិវឌ្ឍទាំងឡាយណាដែលធ្វើឲ្យសឹករេចរឹលតំបន់ព្រៃទឹកភ្លៀង ព្រៃជម្រាលនៅតំបន់មាត់អាងទន្លេមេគង្គ។ បញ្ហាសេដ្ឋកិច្ចគេគួរតែគិតគូរអភិវឌ្ឍលើជីវភាពប្រជាពលរដ្ឋដែលរស់នៅតាមដងទន្លេ និងកុំឲ្យមានការគំរាមកំហែងពីគម្រោងអភិវឌ្ឍន៍ធំៗនានា។
ទាក់ទិននឹងបញ្ហានេះដែរ រដ្ឋមន្ត្រីការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន )Hillary Clinton) បានសម្ដែងនូវក្ដីបារម្ភចំពោះគម្រោងសាងសង់ទំនប់វារីអគ្គិសនីលើអាងទន្លេមេគង្គ ដែលវាអាចបង្កឲ្យមានផលប៉ះពាល់យ៉ាងធ្ងន់ធ្ងរដល់សហគមន៍នៅតំបន់នោះ ដូចជាបរិស្ថាន សុខាភិបាល ការអប់រំ និងជីវភាពរស់នៅរបស់ប្រជាពលរដ្ឋ។
នៅក្នុងកិច្ចប្រជុំថ្នាក់រដ្ឋមន្ត្រីនៃប្រទេសជាប់នឹងដងទន្លេមេគង្គ លើកទី៤ នៅកោះបាលី ប្រទេសឥណ្ឌូណេស៊ី កាលពីថ្ងៃទី២២ ខែកក្កដា ឆ្នាំ២០១១ លោកស្រី ហ៊ីលឡារី គ្លិនតុន បានស្នើទៅបណ្ដាប្រទេសជាសមាជិកនៃទន្លេមេគង្គ សូមឲ្យផ្អាកធ្វើការពិចារណាលើគម្រោងសាងសង់ទំនប់វារីអគ្គិសនីមួយរយៈសិនរហូតមានការសិក្សាថ្មីមួយច្បាស់លាស់ជាងពេលបច្ចុប្បន្ននេះ។
សេចក្ដីប្រកាសព័ត៌មានពីធនាគារអភិវឌ្ឍន៍អាស៊ី (ADB) បានឲ្យដឹងដែរថា បណ្តាប្រទេសជាសមាជិកនៃមហាអនុតំបន់ទន្លេមេគង្គ បានចូលរួមក្នុងកិច្ចសហប្រតិបត្តិការបរិស្ថានថ្នាក់តំបន់តាមរយៈកម្មវិធីស្នូល និងបានផ្ដួចផ្ដើមច្រករបៀងអភិរក្សជីវចម្រុះ ចាប់តាំងពីឆ្នាំ២០០៦មក។ កម្មវិធីនេះបានចំណាយទឹកប្រាក់អស់ប្រមាណ ៣០លានដុល្លារ ហើយគ្រោងនឹងបញ្ចប់នៅខែធ្នូ ឆ្នាំ២០១១នេះ។
គម្រោងមួយនេះបានផ្ដល់ថវិការួមគ្នាពីប្រទេសម្ចាស់ជំនួយមួយចំនួន ដូចជាធនាគារអភិវឌ្ឍន៍អាស៊ី និងមូលនិធិសហប្រតិបត្តិការកាត់បន្ថយភាពក្រីក្រ ដែលគាំទ្រដោយសាធារណរដ្ឋប្រជាមានិតចិន។
នាយកនៃនាយកដ្ឋានអាស៊ីអាគ្នេយ៍ នៃធនាគារអភិវឌ្ឍន៍អាស៊ី លោក គូណូ សេនហ្កា (Kunio Senga) មានប្រសាសន៍ថា មហាអនុតំបន់ទន្លេមេគង្គ គឺជាអនុតំបន់ដែលមានភាពរស់រវើកផ្នែកសេដ្ឋកិច្ចជាងគេជាមួយពិភពលោក។
ប្រទេសនៃមហាអនុតំបន់ទន្លេមេគង្គ រួមមាន កម្ពុជា ចិន ឡាវ ភូមា ថៃ និងប្រទេសវៀតណាម៕