លោក ហោ ណាំហុង រដ្ឋមន្ត្រីការបរទេស នៅថ្ងៃពុធ ទី២៧ ខែកក្កដា បានទាមទារឲ្យប្រធានអាស៊ាន និងជារដ្ឋមន្ត្រីឥណ្ឌូណេស៊ី លោក ម៉ាទី ណាតាឡេហ្គាវ៉ា (Marty Natalegawa) បញ្ជូនអ្នកសង្កេតការណ៍ឥណ្ឌូណេស៊ី មកតំបន់គ្មានយោធា ដើម្បីអនុវត្តសេចក្ដីសម្រេចចិត្តរបស់តុលាការយុត្តិធម៌អន្តរជាតិឲ្យមានប្រសិទ្ធភាព។
លោក ហោ ណាំហុង បានបញ្ជូនលិខិតថ្មីជាលើកទីពីរ ស្ដីពីការដកកងទ័ពចេញពីតំបន់គ្មានយោធា ក្រោយពីកម្ពុជា និងថៃ បានសម្ដែងភាពផ្ទុយគ្នាទាក់ទងនឹងការដកកងទ័ព។
ក្នុងលិខិតទៅកាន់រដ្ឋមន្ត្រីការបរទេសឥណ្ឌូណេស៊ី លោក ហោ ណាំហុង បញ្ជាក់ថា កម្ពុជាចង់ឲ្យមានការកំណត់ឲ្យបានច្បាស់នូវតំបន់គ្មានយោធា និងត្រួតពិនិត្យតាមដានការដកកងទ័ពខ្មែរ និងថៃចេញពីតំបន់គ្មានយោធា។
បច្ចុប្បន្ននេះកម្ពុជា និងថៃ មិនទាន់អាចស្វែងរកយន្តការកណ្ដាលណាមួយបាននៅឡើយទេ ដើម្បីដកកងទ័ពចេញពីតំបន់គ្មានយោធាដោយសារកម្ពុជា ចង់ឲ្យមានអ្នកសង្កេតការណ៍ឥណ្ឌូណេស៊ី មកកាន់តំបន់ជម្លោះជាមុន មុននឹងដកកងទ័ពចំណែកថៃ ចង់ឲ្យមានការចរចាទ្វេភាគីមុននឹងដកកងទ័ព ហើយដំណើរការដកកងទ័ពថៃ ត្រូវធ្វើឡើងដោយរដ្ឋាភិបាលថៃថ្មី។
ស្ថាប័នកំពូលៗក្នុងពិភពលោកកំពុងសង្ឃឹមពីតួនាទីឥណ្ឌូណេស៊ី ក្នុងការជួយដោះស្រាយវិបត្តិព្រំដែនកម្ពុជា និងថៃ។ តុលាការយុត្តិធម៌អន្តរជាតិ ក្រុមប្រឹក្សាសន្តិសុខអង្គការសហប្រជាជាតិ និងសហរដ្ឋអាមេរិកកាលពីពេលថ្មីៗនេះ បានជំរុញឲ្យអាស៊ានជួយជ្រោមជ្រែងស្វែងរកដំណោះស្រាយជម្លោះព្រំដែនខ្មែរ និងថៃ ប៉ុន្តែសំណើទាំងឡាយនៅមិនទាន់បានសម្រេច ដោយសារតែភាគីថៃ មិនចង់ឲ្យមានភាគីទីបី ពាក់ព័ន្ធក្នុងជម្លោះព្រំដែនខ្លួន ចំណែកកម្ពុជា បានបដិសេធមិនព្រមយកការចរចាទ្វេភាគី ដោយសារការខិតខំប្រឹងប្រែងកន្លងមកគ្មានលទ្ធផលល្អ។
រដ្ឋមន្ត្រីការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន (Hillary Clinton) នៅសប្ដាហ៍នេះ បានប្រាប់ក្រុមមេដឹកនាំកំពូលប្រទេសជាសមាជិកប្រទេសនៃសមាគមអាស៊ីអាគ្នេយ៍ថា សហរដ្ឋអាមេរិកនឹងមិនលូកដៃចូលក្នុងជម្លោះផ្ទៃក្នុងរបស់ប្រទេសមួយចំនួនក្នុងតំបន់នេះទេ រួមទាំងជម្លោះព្រំដែនខ្មែរ និងថៃ។ លោកស្រីបញ្ជាក់ថា ប្រទេសឥណ្ឌូណេស៊ី ជាប្រធានអាស៊ាន នឹងអាចដោះស្រាយជម្លោះទាំងឡាយនៃប្រទេសជាសមាជិកអាស៊ានបាន។
ថ្លែងក្នុងកិច្ចប្រជុំកំពូលអាស៊ាននៅកោះបាលី ប្រទេសឥណ្ឌូណេស៊ី លោកស្រីរដ្ឋមន្ត្រីការបរទេសបានស្នើសុំឲ្យឥណ្ឌូណេស៊ី ជួយដោះស្រាយជម្លោះព្រំដែននៅសមុទ្រខាងត្បូងរបស់ចិន បញ្ហាភូមា និងជម្លោះព្រំដែនកម្ពុជា និងថៃ។ លោកស្រីបញ្ជាក់ថា សម្រាប់ជម្លោះថៃ និងកម្ពុជា សហរដ្ឋអាមេរិកនឹងមិនលូកដៃចូលទេ ដោយសហរដ្ឋអាមេរិកសង្ឃឹមថា ឥណ្ឌូណេស៊ីនឹងអាចដោះស្រាយបាន។
ទោះបីមានការជំរុញពីស្ថាប័នកំពូលៗក៏ដោយ ប៉ុន្តែអាស៊ាននៅបន្តរង់ចាំការយល់ព្រមពីកម្ពុជា និងថៃ ជាមុនសិន មុននឹងការអាស៊ានអាចជួយដោះស្រាយបាន។
អគ្គលេខាធិការអាស៊ាន លោក ស៊ូរិន ពិតស៊ូវ៉ាន់ (Surin Pitsuwan) ធ្លាប់បានស្វាគមន៍ជំហរកម្ពុជា និងថៃ ក្នុងការសន្យាគោរពសេចក្ដីសម្រេចចិត្តរបស់តុលាការយុត្តិធម៌អន្តរជាតិ។ លោកបញ្ជាក់ថា សេចក្ដីសម្រេចវិធានការបន្ទាន់របស់តុលាការនឹងក្លាយជាការសាកល្បងមួយសម្រាប់ប្រទេសទាំងពីរ។
លោក ស៊ូរិន ពិតស៊ូវ៉ាន់ មានប្រសាសន៍ថា ប្រធានអាស៊ានកំពុងរង់ចាំសញ្ញាល្អមួយពីកម្ពុជា និងថៃ មុននឹងមានការសម្របសម្រួលដើម្បីស្ដារឲ្យមានសន្តិភាព និងសន្តិសុខតាមព្រំដែន។
មន្ត្រីយោធាយុទ្ធភូមិភាគទី២ថៃ នៅដើមសប្ដាហ៍នេះបានប្រកាសថា ការសម្រេចចិត្តដកកងទ័ពថៃ ចេញពីតំបន់ជម្លោះព្រំដែនអាស្រ័យទៅតាមការសម្រេចចិត្តរបស់រដ្ឋាភិបាលថៃថ្មី។ មេបញ្ជាការយុទ្ធភូមិភាគទី២ ថៃ បានអះអាងថា កងទ័ពថៃ នៅតំបន់ក្បែរប្រាសាទព្រះវិហារ នឹងបន្តឈរជើងនៅតំបន់ជម្លោះព្រំដែន ប៉ុន្តែភាគីថៃ នឹងរក្សាបទឈប់បាញ់ និងចៀសវាងការប្រឈមមុខដាក់គ្នា៕