មន្ត្រីជាន់ខ្ពស់ក្រសួងការពារជាតិកម្ពុជា និងមេបញ្ជាការយោធានៅតាមព្រំដែនកម្ពុជា-ថៃ នៅថ្ងៃទី១១ ខែសីហា ឆ្នាំ២០១១ បានបើកកិច្ចប្រជុំសំខាន់មួយ ដើម្បីពិភាក្សាអំពីវិធីរក្សាទំនាក់ទំនងល្អជាមួយយោធាថៃ របស់រដ្ឋាភិបាលថ្មីដឹកនាំដោយលោកស្រី យ៉ីងឡាក់ ស៊ីណាវ៉ាត្រ (Yingluck Shinawatra) និងបានហាមឃាត់មិនឲ្យប្រព័ន្ធផ្សព្វផ្សាយនានានៅកម្ពុជា បន្តការវាយប្រហារលើរដ្ឋាភិបាលថ្មីរបស់លោកស្រី យ៉ីងឡាក់ ស៊ីណាវ៉ាត្រ នោះ។
ការធ្វើបែបនេះ គឺក្នុងបំណងរក្សាសន្តិសុខ និងសន្តិភាពនៅតាមព្រំដែនកម្ពុជា-ថៃ ក្រោយពីលោកស្រី យ៉ីងឡាក់ ស៊ីណាវ៉ាត្រ បានក្លាយជានាយករដ្ឋមន្ត្រី បន្ទាប់ពីមានការបោះឆ្នោតសាកលនៅប្រទេសថៃ កាលពីថ្ងៃទី៣ ខែកក្កដា ឆ្នាំ២០១១ កន្លងមកនេះ។
នាយឧត្ដមសេនីយ៍ នាង ផាត ជារដ្ឋលេខាធិការក្រសួងការពារជាតិកម្ពុជា និងជាប្រធានក្រុមការងារអន្តរក្រសួង ដើម្បីសម្របសម្រួលព័ត៌មានឆាប់រហ័សពីសមរភូមិ និងសន្តិសុខជាតិ បានមានប្រសាសន៍នៅក្នុងកិច្ចប្រជុំនៅឯក្រសួងការពារជាតិថា ការយោគយល់គ្នា កិច្ចសហប្រតិបត្តិការគ្នាល្អ និងការដោះស្រាយដោយសន្តិវិធី គឺជាការចាំបាច់នៅពេលនេះ។
លោកមានប្រសាសន៍បន្តថា ៖ «នេះជាគោលដៅយុទ្ធសាស្ត្ររបស់រាជរដ្ឋាភិបាលយើង កសាងតំបន់ព្រំដែនជាតំបន់សន្តិភាពជាលំដាប់ ពីព្រោះកន្លងមកវាមានបញ្ហាហើយ ដូច្នេះយើងធ្វើឲ្យប្រសើរឡើងជាលំដាប់។ មិនមែនធ្វើឲ្យប្រសើរឡើងភ្លាមៗបានទេ។ នេះជានយោបាយការទូតរបស់រាជរដ្ឋាភិបាល សំដៅកសាងតំបន់ព្រំដែន ជាតំបន់សន្តិភាព និងការអភិវឌ្ឍពិតប្រាកដ»។
មានមេបញ្ជាការ និងមេបញ្ជាការរង កងទ័ពជើងគោកចំនួនជាង ៣០នាក់ មកចូលរួមក្នុងកិច្ចប្រជុំនោះ គឺមកពីយោធភូមិភាគ៣ យោធភូមិភាគ៤ និងយោធភូមិភាគ៥។
ការបើកកិច្ចប្រជុំនេះ គឺក្រោយពីលោកនាយករដ្ឋមន្ត្រី ហ៊ុន សែន កាលពីថ្ងៃទី៥ ខែសីហា កន្លងទៅនេះ បានបញ្ជាឲ្យមេបញ្ជាការនានានៅតាមព្រំដែនកម្ពុជា-ថៃ រក្សាទំនាក់ទំនងល្អជាមួយយោធាថៃ នៅតាមព្រំដែនកម្ពុជា-ថៃ។
លោកបណ្ឌិតសភាចារ្យ រស់ ចន្ត្រាបុត្រ ជាសាស្ត្រាចារ្យវិទ្យាសាស្ត្រនយោបាយ និងប្រវត្តិសាស្ត្រនៅកម្ពុជា បានមានប្រសាសន៍ថា កម្ពុជាកំពុងតែបង្ហាញជំហរទៅរដ្ឋាភិបាលថៃ និងពិភពលោកថា កម្ពុជាត្រូវការសន្តិភាព ៖ «នៅក្នុងនេះ គឺរដ្ឋាភិបាលថៃ គ្មានអ្វីក្រៅអំពីហៅថា នឹងសម្របសម្រួល និងដោះស្រាយទៅតាមអ្វីដែលជាការប្រាថ្នារបស់ប្រជាពលរដ្ឋថៃ ក៏ដូចជាកម្ពុជាដែរ»។
តាមការអះអាងដោយលោក នាង ផាត បានឲ្យដឹងថា នឹងមានកិច្ចប្រជុំទ្វេភាគីនៃគណៈកម្មាធិការព្រំដែនទូទៅ (GBC) រវាងកម្ពុជា និងថៃ នាពេលឆាប់ៗនេះ ប៉ុន្តែពេលវេលាមិនទាន់បានកំណត់នៅឡើយ និងមានកិច្ចប្រជុំថ្នាក់មេបញ្ជាការភូមិភាគរវាងកម្ពុជា និងថៃ នាពេលខាងមុខនេះផងដែរ ប៉ុន្តែរាល់កិច្ចប្រជុំខាងមុខនោះ គឺក្រៅក្របខ័ណ្ឌនៃដីកាបង្គាប់របស់តុលាការយុត្តិធម៌អន្តរជាតិ (ICJ)។
លោកបានមានប្រសាសន៍ទៀតថា ភាគីកម្ពុជា មានសិទ្ធិដកកងទ័ពនៅពេលណាក៏បាន ឲ្យតែនៅក្រៅរង្វង់តំបន់មានជម្លោះទំហំជាង ១៧គីឡូម៉ែត្រក្រឡាដែលកំណត់ដោយកន្លងមក។ ប៉ុន្តែការដកកងទ័ពកម្ពុជា និងថៃ នៅតំបន់ជាង ១៧គីឡូម៉ែត្រក្រឡានោះ គឺត្រូវធ្វើឡើងនៅម៉ោងជាមួយគ្នា និងនៅថ្ងៃជាមួយគ្នា ដោយមានអ្នកសង្កេតការណ៍ពីប្រទេសឥណ្ឌូណេស៊ី ចូលរួមជាសាក្សី៕