ការឯកភាពគ្នានេះ បានធ្វើឡើងនៅក្នុងជំនួបបិទទ្វាររវាងរដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី ជាមួយអនុរដ្ឋមន្ត្រីក្រសួងពាណិជ្ជកម្មនៃប្រទេសកូរ៉េខាងជើង លោក រី ម្យុងសាន (Ri Myong San) នៅឯក្រសួងការបរទេសកម្ពុជា នៅថ្ងៃទី២៦ ខែកក្កដា ឆ្នាំ២០១១។
រដ្ឋលេខាធិការក្រសួងការបរទេសកម្ពុជា លោក អ៊ុជ បូរិទ្ធ បានមានប្រសាសន៍ប្រាប់អ្នកកាសែតក្រោយពីជំនួបរយៈពេលកន្លះម៉ោងនោះថា កម្ពុជា និងកូរ៉េខាងជើងបានឯកភាពផ្លាស់ប្ដូរគ្នាលើវិស័យកសិកម្ម ពាណិជ្ជកម្ម និងសេដ្ឋកិច្ច។
លោកបន្តថា ៖ «អ៊ីចឹងហើយ នៅពេលនេះគឺថា យើងខិតខំធ្វើយ៉ាងម៉េចជជែកគ្នារិះរកមធ្យោបាយយ៉ាងណាដើម្បីបង្កើន គេហៅថា វិសាលភាព ក៏ដូចជាទំនាក់ទំនង ការផ្លាស់ប្ដូរពាណិជ្ជកម្មឲ្យវាមានគេហៅថា ចលនាឡើង។ កម្ពុជា និងកូរ៉េនេះ យើងមានប្រវត្តិប្រពៃណីទំនាក់ទំនងយូរលង់ណាស់មកហើយ ដែលពូនជ្រំដោយព្រះករុណា ព្រះបិតាសម្ដេចព្រះវរបិតា នរោត្តម សីហនុ»។
ភាគីទាំងពីរមិនមានការចុះហត្ថលេខាលើកិច្ចព្រមព្រៀងណាមួយទេ នៅថ្ងៃទី២៦ ខែកក្កដា ឆ្នាំ២០១១។
អនុរដ្ឋមន្ត្រីក្រសួងពាណិជ្ជកម្មប្រទេសកូរ៉េខាងជើង លោក រី ម្យុងសាន បានដឹកនាំគណៈប្រតិភូចំនួនសរុប ៩នាក់ មកទស្សនកិច្ចនៅក្នុងប្រទេសកម្ពុជា ជាលើកដំបូង ដើម្បីចូលរួមក្នុងកិច្ចប្រជុំទ្វេភាគីនៃគណៈកម្មាធិការចម្រុះរវាងកម្ពុជា និងកូរ៉េខាងជើង ដែលប្រព្រឹត្តទៅនៅក្រសួងការបរទេសកម្ពុជា ថ្ងៃទី២៧ ខែកក្កដា ឆ្នាំ២០១១។
អ្នកវិភាគនយោបាយនៅកម្ពុជា លោកបណ្ឌិត ឡៅ ម៉ុងហៃ បានមានប្រសាសន៍ថា ប្រទេសដទៃទៀតនៅតំបន់អាស៊ី ដូចជាថៃជាដើម ក៏មានទំនាក់ទំនងពាណិជ្ជកម្មជាមួយប្រទេសកូរ៉េខាងជើងផងដែរ ៖ «កូរ៉េខាងជើង យើងអាចទុកជាផ្សារនៃផលិតផលកសិកម្មកម្ពុជាបាន នៅពេលដែលកូរ៉េខាងជើងកំពុងតែជួបវិបត្តិខាងសេដ្ឋកិច្ច ខាងកសិកម្ម គឺខ្វះស្បៀងអាហារ»។
ចំណងមិត្តភាពជិតស្និទ្ធរវាងកម្ពុជា និងប្រទេសកូរ៉េខាងជើង គេបានកត់សម្គាល់ថា បានចាប់ផ្ដើមតាំងពីទសវត្សឆ្នាំ១៩៦០ មកម្ល៉េះ ដោយសារតែអតីតព្រះមហាក្សត្រខ្មែរ ព្រះបាទ នរោត្តម សីហនុ ជាមិត្តជិតស្និទ្ធជាមួយអតីតលោកសេនាប្រមុខ គឹម អ៊ីលស៊ុង (Kim Ill Sung) នៃប្រទេសកូរ៉េខាងជើង។ អតីតព្រះមហាក្សត្រខ្មែរ មានព្រះរាជដំណាក់មួយនៅប្រទេសកូរ៉េខាងជើង។
ប្រទេសកូរ៉េខាងជើងកន្លងមក បានរងការថ្កោលទោសពីសហគមន៍អន្តរជាតិ ជាពិសេសសហរដ្ឋអាមេរិក ដោយសារតែប្រទេសនេះអភិវឌ្ឍផលិតគ្រាប់បែកនុយក្លេរអ៊ែរ (Nuclear) ជាអាវុធប្រល័យលោក គំរាមកំហែងសន្តិសុខនៅតំបន់ និងពិភពលោក។
ប្រទេសកូរ៉េខាងជើងបានបាញ់សាកល្បងគ្រាប់មីស៊ីល (Missile) កន្លងមក ដែលសហរដ្ឋអាមេរិកប្រកាសដាក់ទណ្ឌកម្មសេដ្ឋកិច្ច។
លោក អ៊ុជ បូរិទ្ធ បានមានប្រសាសន៍ថា ប្រទេសកូរ៉េខាងជើងដែលប្រកាន់របបកុម្មុយនិស្ត មិនមានអ្នកវិនិយោគទុកនៅកម្ពុជា ដូចប្រទេសកូរ៉េខាងត្បូងទេ៕