កងកម្លាំងរក្សាសន្តិភាពទាំងនោះ បានអោបក្រសោបកូន និងប្រពន្ធដោយក្តីអាឡោះអាល័យនៅមុនពេលឈានជើងឡើងយន្តហោះ នៅម៉ោង ១២យប់ ថ្ងៃទី១៦ ខែមេសា ឆ្នាំ២០១២ ឆ្ពោះទៅកាន់ប្រទេសស៊ូដង់ខាងត្បូងនោះ។
កិច្ចការរបស់កងកម្លាំងរក្សាសន្តិភាពនោះ គឺរក្សាសន្តិសុខសណ្ដាប់ធ្នាប់សាធារណៈ ដោះមីន សាងសង់ផ្លូវថ្នល់ និងស្ពាន និងព្យាបាលអ្នកជំងឺ និងអ្នករងរបួសជាដើម។
កងកម្លាំងរក្សាសន្តិភាពទាំងនោះ គឺមកពីកងរាជអាវុធហត្ថលេខ ៧០២ និងក្រុមគ្រូពេទ្យយោធាលេខ ៨០១ និងមានស្ត្រីសរុបចំនួន ១៥នាក់ ចូលរួមក្នុងបេសកកម្មដ៏សំខាន់នេះ។
កងកម្លាំងរក្សាសន្តិភាពម្នាក់នៅក្នុងចំណោម ១៤៩នាក់ ឈ្មោះ វិត ផល្លា អាយុ ២៤ឆ្នាំ ភេទស្រី មកពីកងរាជអាវុធហត្ថលេខ ៧០២ បានមានប្រសាសន៍ប្រាប់អ្នកកាសែតនៅមុនពេលឡើងយន្តហោះថា នាងតាំងចិត្តបំពេញបេសកកម្មនេះឲ្យបានជោគជ័យសំរាប់កេរ្តិ៍ឈ្មោះកម្ពុជា៖ «មានមោទនភាពខ្លួនឯងនៅត្រង់ខ្លួនឯងជានារីក៏បានទៅធ្វើការជាមួយបុរស។ ...ផ្នែកខាងត្រួតពិនិត្យសណ្តាប់ធ្នាប់ ឆែកឆេរ ...ពេលមានគ្រោះថ្នាក់ចរាចរណ៍យើងចូលទៅវាស់វែងអីណា»។
ចំណែកឯកងកម្លាំងរក្សាសន្តិភាពម្នាក់ទៀត ឈ្មោះ នូ សត្យា អាយុ ២៤ឆ្នាំ មកពីមជ្ឈមណ្ឌលជាតិបោសសំអាតមីន និងកាកសំណល់សង្គ្រាម បានមានប្រសាសន៍ដែរថា លោកពេញចិត្តជាមួយនឹងបេសកកម្មនេះណាស់៖ «ជាពិសេសមុខមាត់ប្រទេសជាតិដែលខ្ញុំបានជួយបំពេញបេសកកម្មរបស់ប្រទេសជាតិមួយចំណែកដែរ និងមួយចំណែកទៀត គឺជួយក្រុមគ្រួសារ»។
អគ្គនាយកនៃអគ្គនាយកដ្ឋានទទួលបន្ទុកកិច្ចការបរទេស និងនយោបាយ ក្រសួងការពារជាតិ លោកឧត្ដមសេនីយ៍ឯក ណឹម សុវត្ថិ បានមានប្រសាសន៍នៅយប់ថ្ងៃទី១៦ ខែមេសា ឆ្នាំ២០១២ នៅឯអាកាសយានដ្ឋានអន្តរជាតិភ្នំពេញថា ក្រសួងការពារជាតិមានមោទនភាពចំពោះបេសកកម្មនេះ ដោយកងកម្លាំងរក្សាសន្តិភាពទាំងនេះត្រូវបានហ្វឹកហ្វឺនជំនាញ និងសមត្ថភាពតាមស្តង់ដាររបស់អង្គការសហប្រជាជាតិ។ លោកបានបន្តថា បេសកកម្មនេះ ផ្នែកមួយរបស់អាស៊ានដែរនៅលើឆាកអន្តរជាតិ។
មន្ត្រីសម្របសម្រួលរបស់អង្គការសហប្រជាជាតិប្រចាំនៅប្រទេសកម្ពុជា លោក ឌូក្លាស ប្រ៊ូដឺរីក (Douglas Broderick) បានមានប្រសាសន៍នៅក្នុងសុន្ទរកថារបស់លោកមុនពេលក្រុមរក្សាសន្តិសុខឡើងយន្តហោះថា៖ "អង្គការសហប្រជាជាតិ និងពិភពលោក ដឹងគុណអស់លោកអ្នក។ គ្មានប្រទេសណាមួយអាចរស់នៅដោយសុខដុមរមនា និងរុងរឿងបានទេ បើគ្មានសន្តិភាព និងស្ថិរភាពនោះ ដូច្នេះបេសកកម្មរបស់លោកអ្នក គឺមានសារសំខាន់ណាស់"។
ប្រទេសស៊ូដង់ខាងត្បូងនោះ បានទទួលឯករាជ្យពីប្រទេសស៊ូដង់ នៅឆ្នាំ២០១១ កន្លងទៅនេះ ត្រូវបានទទួលស្គាល់ឯករាជភាពដោយអង្គការសហប្រជាជាតិ។ ប៉ុន្តែប្រទេសស៊ូដង់ខាងត្បូង និងប្រទេសស៊ូដង់ កំពុងតែមានជម្លោះប្រដាប់អាវុធយ៉ាងតឹងតែង ដណ្ដើមគ្នាកាន់កាប់អណ្ដូងប្រេងជាសម្បត្តិមហាសាល។
លោក ណឹម សុវត្ថិ បានបញ្ជាក់ថា កងកម្លាំងរក្សាសន្តិភាពកម្ពុជា ត្រូវឈរជើងនៅទីកន្លែងមានសុវត្តិភាព ឆ្ងាយពីតំបន់ជម្លោះនោះ។
ចាប់តាំងពីឆ្នាំ២០០៦ កន្លងមក ក្រសួងការពារជាតិបានបញ្ជូនកងកម្លាំងរក្សាសន្តិភាព រាប់ទាំងកងកម្លាំងដោះមីនដែរ ទៅប្រទេសស៊ូដង់ (Sudan) ប្រទេសឆាត (Chad) ប្រទេសអាហ្វ្រិកកណ្តា ល (Central Africa) ប្រទេសលីបង់ (Lebanon) និងចុងក្រោយនេះ គឺទៅប្រទេសស៊ូដង់ខាងត្បូង (South Sudan) ដែលទើបបានឯករាជ្យនៅឆ្នាំ២០១១៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។