កម្ពុជា​បញ្ជូន​កម្លាំង​រក្សា​សន្តិភាព​១៤៩​នាក់​ទៅ​ស៊ូដង់​ខាង​ត្បូង

ក្រសួង​ការពារ​ជាតិ នៅ​យប់​ថ្ងៃ​ទី​១៦ ខែ​មេសា ឆ្នាំ​២០១២ បាន​បញ្ជូន​កងកម្លាំង​រក្សា​សន្តិភាព​ចំនួន ១៤៩​នាក់​ជា​លើក​ដំបូង​ទៅ​ប្រទេស​ស៊ូដង់​ខាង​ត្បូង (South Sudan) តាម​សំណើ​របស់​អង្គការ​សហប្រជាជាតិ ដើម្បី​បំពេញ​បេសកកម្ម​ផ្នែក​មនុស្ស​ធម៌​រយៈពេល​មួយ​ឆ្នាំ។
ដោយ សុខ សេរី
2012-04-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កង​កម្លាំង​រក្សា​សន្តិភាព ៣០៥
កម្លាំង​រក្សា​សន្តិភាព​ថត​រូប​អនុស្សាវរីយ៍​ជាមួយ​ក្រុម​គ្រួសារ​មុន​ពេល​ចាកចេញ​ដំណើរ​ទៅ​ប្រទេស​ស៊ូដង់​ខាង​ត្បូង នៅ​អាកាសយានដ្ឋាន​អន្តរជាតិ​ភ្នំពេញ កាល​ពី​យប់​ថ្ងៃ​១៦ មេសា ឆ្នាំ​២០១២។
RFA/Sok Serey

កងកម្លាំង​រក្សា​សន្តិភាព​ទាំង​នោះ បាន​អោប​ក្រសោប​កូន និង​ប្រពន្ធ​ដោយ​ក្តី​អាឡោះអាល័យ​នៅ​មុន​ពេល​ឈាន​ជើង​ឡើង​យន្តហោះ នៅ​ម៉ោង ១២​យប់ ថ្ងៃ​ទី​១៦ ខែ​មេសា ឆ្នាំ​២០១២ ឆ្ពោះ​ទៅ​កាន់​ប្រទេស​ស៊ូដង់​ខាង​ត្បូង​នោះ។

កិច្ចការ​របស់​កងកម្លាំង​រក្សា​សន្តិភាព​នោះ គឺ​រក្សា​សន្តិសុខ​សណ្ដាប់ធ្នាប់​សាធារណៈ ដោះ​មីន សាងសង់​ផ្លូវ​ថ្នល់ និង​ស្ពាន និង​ព្យាបាល​អ្នក​ជំងឺ និង​អ្នក​រង​របួស​ជាដើម។

កងកម្លាំង​រក្សា​សន្តិភាព​ទាំង​នោះ គឺ​មក​ពី​កង​រាជ​អាវុធហត្ថ​លេខ ៧០២ និង​ក្រុម​គ្រូពេទ្យ​យោធា​លេខ ៨០១ និង​មាន​ស្ត្រី​សរុប​ចំនួន ១៥​នាក់ ចូល​រួម​ក្នុង​បេសកកម្ម​ដ៏​សំខាន់​នេះ។

កងកម្លាំង​រក្សា​សន្តិភាព​ម្នាក់​នៅ​ក្នុង​ចំណោម ១៤៩​នាក់ ឈ្មោះ វិត ផល្លា អាយុ ២៤​ឆ្នាំ ភេទ​ស្រី មក​ពី​កង​រាជ​អាវុធហត្ថ​លេខ ៧០២ បាន​មាន​ប្រសាសន៍​ប្រាប់​អ្នក​កាសែត​នៅ​មុន​ពេល​ឡើង​យន្តហោះ​ថា នាង​តាំង​ចិត្ត​បំពេញ​បេសកកម្ម​នេះ​ឲ្យ​បាន​ជោគជ័យ​សំរាប់​កេរ្តិ៍​ឈ្មោះ​កម្ពុជា៖ «មាន​មោទនភាព​ខ្លួន​ឯង​នៅ​ត្រង់​ខ្លួន​ឯង​ជា​នារី​ក៏​បាន​ទៅ​ធ្វើ​ការ​ជាមួយ​បុរស។ ...​ផ្នែក​ខាង​ត្រួត​ពិនិត្យ​សណ្តាប់ធ្នាប់ ឆែកឆេរ ...​ពេល​មាន​គ្រោះថ្នាក់​ចរាចរណ៍​យើង​ចូល​ទៅ​វាស់វែង​អី​ណា»

កង​កម្លាំង​រក្សា​សន្តិភាព ៣០៥
កងកម្លាំង​រក្សា​សន្តិភាព​ត្រៀម​ចេញ​ដំណើរ​ទៅ​ប្រទេស​ស៊ូដង់​ខាង​ត្បូង នៅ​អាកាសយានដ្ឋាន​អន្តរជាតិ​ភ្នំពេញ កាល​ពី​យប់​ថ្ងៃ​១៦ មេសា ឆ្នាំ​២០១២។ RFA/Sok Serey

ចំណែក​ឯ​កងកម្លាំង​រក្សា​សន្តិភាព​ម្នាក់​ទៀត ឈ្មោះ នូ សត្យា អាយុ ២៤​ឆ្នាំ មក​ពី​មជ្ឈមណ្ឌល​ជាតិ​បោស​សំអាត​មីន និង​កាក​សំណល់​សង្គ្រាម បាន​មាន​ប្រសាសន៍​ដែរ​ថា លោក​ពេញ​ចិត្ត​ជាមួយ​នឹង​បេសកកម្ម​នេះ​ណាស់៖ «ជា​ពិសេស​មុខ​មាត់​ប្រទេស​ជាតិ​ដែល​ខ្ញុំ​បាន​ជួយ​បំពេញ​បេសកកម្ម​របស់​ប្រទេស​ជាតិ​មួយ​ចំណែក​ដែរ និង​មួយ​ចំណែក​ទៀត គឺ​ជួយ​ក្រុម​គ្រួសារ»

អគ្គនាយក​នៃ​អគ្គនាយកដ្ឋាន​ទទួល​បន្ទុក​កិច្ចការ​បរទេស និង​នយោបាយ ក្រសួង​ការពារ​ជាតិ លោក​ឧត្ដមសេនីយ៍​ឯក ណឹម សុវត្ថិ បាន​មាន​ប្រសាសន៍​នៅ​យប់​ថ្ងៃ​ទី​១៦ ខែ​មេសា ឆ្នាំ​២០១២ នៅ​ឯ​អាកាសយានដ្ឋាន​អន្តរជាតិ​ភ្នំពេញ​ថា ក្រសួង​ការពារ​ជាតិ​មាន​មោទនភាព​ចំពោះ​បេសកកម្ម​នេះ ដោយ​កងកម្លាំង​រក្សា​សន្តិភាព​ទាំង​នេះ​ត្រូវ​បាន​ហ្វឹកហ្វឺន​ជំនាញ និង​សមត្ថភាព​តាម​ស្តង់ដារ​របស់​អង្គការ​សហប្រជាជាតិ។ លោក​បាន​បន្ត​ថា បេសកកម្ម​នេះ​ ផ្នែក​មួយ​របស់​អាស៊ាន​ដែរ​នៅ​លើ​ឆាក​អន្តរជាតិ។ 

មន្ត្រី​សម្របសម្រួល​របស់​អង្គការ​សហប្រជាជាតិ​ប្រចាំ​នៅ​ប្រទេស​កម្ពុជា លោក ឌូក្លាស ប្រ៊ូដឺរីក (Douglas Broderick) បាន​មាន​ប្រសាសន៍​នៅ​ក្នុង​សុន្ទរកថា​របស់​លោក​មុន​ពេល​ក្រុម​រក្សា​សន្តិសុខ​ឡើង​យន្តហោះ​ថា៖ "អង្គការ​សហប្រជាជាតិ និង​ពិភពលោក ដឹង​គុណ​អស់​លោក​អ្នក។ គ្មាន​ប្រទេស​ណា​មួយ​អាច​រស់​នៅ​ដោយ​សុខដុមរមនា និង​រុង​រឿង​បាន​ទេ បើ​គ្មាន​សន្តិភាព និង​ស្ថិរភាព​នោះ ដូច្នេះ​បេសកកម្ម​របស់​លោក​អ្នក គឺ​មាន​សារសំខាន់​ណាស់"

ប្រទេស​ស៊ូដង់​ខាង​ត្បូង​នោះ បាន​ទទួល​ឯករាជ្យ​ពី​ប្រទេស​ស៊ូដង់ នៅ​ឆ្នាំ​២០១១ កន្លង​ទៅ​នេះ ត្រូវ​បាន​ទទួល​ស្គាល់​​ឯករាជ​ភាព​ដោយ​អង្គការ​សហប្រជាជាតិ។ ប៉ុន្តែ​ប្រទេស​ស៊ូដង់​ខាង​ត្បូង និង​ប្រទេស​ស៊ូដង់ កំពុង​តែ​មាន​ជម្លោះ​ប្រដាប់​អាវុធ​យ៉ាង​តឹងតែង ដណ្ដើម​គ្នា​កាន់កាប់​អណ្ដូង​ប្រេង​ជា​សម្បត្តិ​មហាសាល។ 

លោក ណឹម សុវត្ថិ បាន​បញ្ជាក់​ថា កងកម្លាំង​រក្សា​សន្តិភាព​កម្ពុជា ត្រូវ​ឈរ​ជើង​នៅ​ទី​កន្លែង​មាន​សុវត្តិភាព ឆ្ងាយ​ពី​តំបន់​ជម្លោះ​នោះ។

ចាប់​តាំង​ពី​ឆ្នាំ​២០០៦ កន្លង​មក ក្រសួង​ការពារ​ជាតិ​បាន​បញ្ជូន​កង​កម្លាំង​រក្សា​សន្តិភាព រាប់​ទាំង​កង​កម្លាំង​ដោះ​មីន​ដែរ ទៅ​ប្រទេស​ស៊ូដង់ (Sudan) ប្រទេស​ឆាត (Chad) ប្រទេស​អាហ្វ្រិក​កណ្តា ល (Central Africa) ប្រទេស​លីបង់ (Lebanon) និង​ចុង​ក្រោយ​នេះ គឺ​ទៅ​ប្រទេស​ស៊ូដង់​ខាង​ត្បូង (South Sudan) ដែល​ទើប​បាន​ឯករាជ្យ​នៅ​ឆ្នាំ​២០១១៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (4)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

នេះជាពេលវេលាដ៏វិសេសសំរាប់កងកំលាំងទាំងនេះ
ដើម្បីមុខមាត់ប្រទេសយើង និង លើកស្ទួយជីវភាពបងប្អូនផង សូមកងកំលាំងទាំងអស់ជួបប្រទះតែសេចក្តីសុខគ្រប់ប្រការ៕

Apr 17, 2012 10:34 PM

អ្នក​អាន​អនាមិក

These poor soldiers who are paid by the UN are luckier than their fellow soldiers who are to beg to survive at Preah Vihear temple. There is a sign Hun Sen is running out of money to pay his soldiers. His four-star military commanders are seen running around to appeal to local business owners and Oukhnas who can help provide food and military supplies. They mentally force those business owners and Ouknhas into signing an agreement, the so-called Alliance with military. However, we wish these poor soldiers Good Luck and a Safe Home Return.

Apr 17, 2012 02:32 PM

អ្នក​អាន​អនាមិក

Bae Safe & best wishes to all of our young Blood in those dangerous areas of Africa.

Apr 17, 2012 11:04 AM

អ្នក​អាន​អនាមិក

ចាត់ទុកជាសំណាងល្អរបស់ក្រុមទាហានទាំងនេះ ពីព្រោះ
ប្រាក់ចំណូលក្នុងមួយខែៗ វាច្រើនជាងបៀវត្សរ៍នៅស្រុកខ្មែររាប់ឆ្នាំឯណោះ។
មូលហេតុមកពីរាជរដ្ឋាភិបាលមិនបានយកចិត្តទុកដាក់លើជីវភាពរស់នៅ
របស់យោធានិងក្រុមគ្រួសារបន្តិចឡើយ ណាមួយទ័ពបញ្ជីខ្មោចទាំងប៉ុន្មាន
ប្រាក់បៀវត្សរ៍របស់ទ័ពបញ្ជីខ្មោចទាំងនោះបាត់ទៅណាអស់ទៅ។

Apr 17, 2012 03:13 AM