ការគាំទ្រនេះ គឺបានធ្វើឡើងនៅក្នុងជំនួបទ្វេភាគីរវាងមេដឹកនាំប្រទេសកម្ពុជា និងប្រទេសទីម័រខាងកើត នៅឯវិមានសន្តិភាព នៅក្នុងទីក្រុងភ្នំពេញ រយៈពេលជាងកន្លះម៉ោង នៅក្នុងដំណើរទស្សនកិច្ចលើកដំបូងមកប្រទេសកម្ពុជា ចាប់ពីថ្ងៃទី២៩ ខែមីនា ដល់ថ្ងៃទី៣០ ខែមីនា ឆ្នាំ២០១១។
មន្ត្រីអ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ប្រាប់អ្នកកាសែតនៅឯវិមានសន្តិភាព ក្រោយពីជំនួបនោះថា ភាគីកម្ពុជា ចង់ឃើញប្រទេសទីម័រខាងកើតនេះ ក្លាយជាសមាជិករបស់អាស៊ានឆាប់ៗនេះ។
លោកមានប្រសាសន៍បន្ថែមដូច្នេះ ៖ «ទស្សនៈវិស័យសម្ដេចតេជោ ដែលកសាងអគារនេះ ក៏កសាងត្រៀមទុកសម្រាប់ទីម័រខាងកើតហ្នឹងដែរ។ បើសិនថា ទីម័រខាងកើតចូលជាសមាជិកអាស៊ាននៅឆ្នាំ២០១១នេះ ពិតប្រាកដនោះ គឺថា ទីម័រខាងកើតនឹងមានវត្តមានចូលរួមប្រជុំនៅក្នុងប្រទេសកម្ពុជា នៅឆ្នាំ២០១២ ខាងមុខនេះហើយ ដូច្នេះសម្ដេចសង្ឃឹមថា និងមានវត្តមានប្រទេសទីម័រខាងកើត ដែលជាសមាជិកទី១១ នៃអាស៊ាន»។
លោកបានបន្តទៀតថា លោកនាយករដ្ឋមន្ត្រី ហ៊ុន សែន និងប្រធានាធិបតីប្រទេសទីម័រខាងកើត លោក ជូហ្សេ រ៉ាម៉ូស ហូតា បានឯកភាពគ្នាថា នឹងបង្កើនទំនាក់ទំនងលើវិស័យពាណិជ្ជកម្ម និងកិច្ចសហប្រតិបត្តិការរវាងប្រទេសទាំងពីរ។ កម្ពុជាមានផែនការនាំចេញអង្ករទៅទីផ្សារនៃប្រទេសទីម័រខាងកើត នៅពេលខាងមុខ។
សមាជិកអាស៊ាននៅពេលបច្ចុប្បន្ននេះ គឺមានចំនួន ១០ នៅក្នុងនោះមានប្រទេសកម្ពុជា (Cambodia) ថៃ (Thailand) វៀតណាម (Vietnam) លាវ (Lao) ឥណ្ឌូណេស៊ី (Indonesia) ហ្វីលីពីន (Philippine) សិង្ហបុរី (Singapore) ភូមា (Burma) ប្រ៊ុយណេ (Brunei) និងប្រទេសម៉ាទ្បេស៊ី (Malaysia)។
តំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍ថា គណបក្ស សម រង្ស៊ី គាំទ្រផងដែរ ៖ «ធ្វើដូចសហគមន៍អឺរ៉ុប ក្នុងការជំរុញឲ្យប្រទេសដែលមកជាសមាជិកនោះបំពេញលក្ខណៈសម្បត្តិជាមូលដ្ឋានរបស់អាស៊ានហ្នឹងជាមុន មុននឹងអនុញ្ញាតឲ្យចូលជាសមាជិកនោះ»។
ប្រទេសទីម័រខាងកើតដែលចង់ក្លាយជាសមាជិកទី១១ នៃអាស៊ាននោះ ពុំមានស្ថានទូតនៅក្នុងប្រទេសកម្ពុជា នៅឡើយទេ។ ប្រទេសនេះមានប្រជាពលរដ្ឋចំនួនជាង ១លាននាក់ ហើយបានប្រកាសជារដ្ឋឯករាជ្យពីការគ្រប់គ្រងដោយប្រទេសឥណ្ឌូណេស៊ី កាលពីឆ្នាំ២០០២ កន្លងទៅ គឺបានទទួលស្គាល់ដោយអគ្គលេខាធិការអង្គការសហប្រជាជាតិ លោក កូហ្វី អាណាន់ (Kofi Annan)៕