កងទ័ពខ្មែរ-ថៃប្រយុទ្ធគ្នានៅតំបន់ព្រះវិហារ
ដោយ ហង្ស សាវយុត
2011-02-04
ទាហានដែលកំពុងប្រចាំការពារព្រំដែនខ្មែរ បានឲ្យដឹងថា កងទ័ពខ្មែរ និងថៃ បានប៉ះទង្គិចគ្នាដោយអាវុធជាថ្មី កាលពីល្ងាចថ្ងៃសុក្រ ទី៤ ខែកុម្ភៈនេះ បន្ទាប់ពីការប្រឈមមុខដាក់គ្នាដ៏តានតឹងដោយអាវុធជាង ១សប្ដាហ៍មកហើយ។
ទាហានខ្មែរត្រៀមនៅតំបន់ប្រាសាទព្រះវិហារនៅថ្ងៃទី១៨ កក្កដា ២០០៨
ទាហានមួយរូបដែលសុំមិនបញ្ចេញឈ្មោះបានឲ្យដឹងថា ការផ្ទុះអាវុធបានចាប់ផ្ដើមឡើងកាលពីវេលាម៉ោងជាង ៣រសៀលថ្ងៃសុក្រនេះ។ ការផ្ទុះអាវុធនោះកើតចេញបន្ទាប់ពីកងទាហានថៃ មួយក្រុម បានព្យាយាមជម្រុលចូលមកតំបន់សម្បុកឃ្មុំ ដែលកងទ័ពខ្មែរព្យាយាមហាមឃាត់តាំងតែពីល្ងាចថ្ងៃព្រហស្បតិ៍ ៖ «១០នាទីហើយ។ បងឯងឮអត់? ខ្ញុំស្ដាប់អីអត់ឮទេ»។
ទាហានខ្មែរម្នាក់ទៀតបានឲ្យដឹងថា ការផ្ទុះអាវុធបានចាប់ផ្ដើមដំបូងពីតំបន់សម្បុកឃ្មុំភាគខាងជើងឆៀងខាងលិច ចម្ងាយប្រមាណ ៣០០ម៉ែត្រពីមុខប្រាសាទព្រះវិហារ បន្ទាប់មកបានរាលដាលទៅជិតតំបន់បន្ទាយក្រហមរបស់ថៃ និងបន្តទៅកាន់តំបន់វាលឥន្ទ្រី និងភ្នំទ្រព្យ ៖ «ពួកខ្ញុំកំពុងត្រៀម។ ផ្ទុះទល់មុខប្រាសាទនោះបង វាលឥន្ទ្រី ហើយភ្នំទ្រព្យ នៅទល់មុខគ្នាអត់ទាន់មានអ្វីនៅឡើយទេ»។
មានសេចក្ដីរាយការណ៍ថា ការប៉ះទង្គិចគ្នានេះមានរយៈពេលជាង ១ម៉ោងមកហើយ រហូតមកដល់ម៉ោងជាង ៤រសៀល គេនៅតែឮសំឡេងគ្រាប់កាំភ្លើងបាញ់តគ្នានៅឡើយ ហើយកាលពីម៉ោង ៤ និង ២៨នាទីល្ងាច មានសេចក្ដីរាយការណ៍ថា ទាហានថៃ បានផ្លោងកាំភ្លើងធំចូលទីវត្តខ្មែរកែវសិក្ខាគិរីស្វារៈ។
កងទាហានខ្មែរបានឲ្យដឹងថា ផ្ទះរបស់កងទាហានខ្មែរមួយចំនួននៅលើភ្នំប្រាសាទព្រះវិហារ បានឆេះខូចខាតដោយសាររងគ្រាប់កាំភ្លើង ហើយទាហានខ្មែរបានចាប់ខ្លួនទាហានថៃចំនួន ៤នាក់ ប៉ុន្តែទោះយ៉ាងណាមិនទាន់មានសេចក្ដីរាយការណ៍អំពីចំនួនអ្នកស្លាប់ និងរងរបួសដោយសារការប៉ះប្រយុទ្ធគ្នានោះនៅឡើយទេ។
ការប៉ះទង្គិចគ្នារវាងទាហានខ្មែរ-ថៃ នៅជុំវិញតំបន់ប្រាសាទព្រះវិហារនេះ បានកើតឡើងនៅក្រោយពេលប្រមាណ ៥ម៉ោង បន្ទាប់ពីរដ្ឋមន្ត្រីក្រសួងការបរទេសខ្មែរ-ថៃ បានបញ្ចប់កិច្ចប្រជុំគណៈកម្មការចម្រុះ សហប្រតិបត្តិការទ្វេភាគីកម្ពុជា-ថៃ លើកទី៧ នៅឯខេត្តសៀមរាប។
លោក កាស៊ីត ភិរម្យ (Kasit Piromya) រដ្ឋមន្ត្រីក្រសួងការបរទេសថៃ បានថ្លែងអះអាងបន្ទាប់ពីចប់កិច្ចប្រជុំនោះថា ទោះយ៉ាងណាប្រទេសថៃ បានព្យាយាមមិនឲ្យមានការប៉ះទង្គិចគ្នាដោយអាវុធទេ នៅពេលដែលកងទ័ពខ្មែរ និងថៃ កំពុងប្រឈមមុខដាក់គ្នាយ៉ាងតានតឹងនោះ ៖ "ពេលឥឡូវហ្នឹងយើងជជែកគ្នាហើយ គឺចង់ធ្វើឲ្យគ្រប់យ៉ាងបានស្ងប់ស្ងៀម។ ធ្វើអ្វីៗគឺឲ្យស្ងប់ ហើយថៃគោរពទៅតាមគោលការណ៍សំខាន់ និងមិនធ្វើអ្វីឲ្យហេតុការណ៍អាក្រក់កើតឡើងទេ"៕
អត្ថបទដែលទាក់ទង
រថយន្តចង្កូតស្ដាំបន្តនាំចូលគេចពន្ធនៅតាមព្រំដែនខ្មែរ-ថៃ
មន្ត្រីខ្មែរស្នើថៃឲ្យឈប់បាញ់សម្លាប់ពលរដ្ឋរបស់ខ្លួន
ទាហានខ្មែរ និងថៃ បាញ់គ្នាមួយប្រាវ នៅជាំក្សាន្ត
មន្ត្រីខ្មែរ-ថៃជួបចរចាដោះស្រាយបញ្ហាសន្តិសុខតាមព្រំដែន
ក្ដីបារម្ភអំពីគម្រោងវារីអគ្គិសនីសាយ៉ាបូរី (Xayaburi) នៅឡាវ
អាជ្ញាធរថៃតម្រូវឲ្យពលរដ្ឋខ្មែរថតចម្លងលិខិតឆ្លងដែនពេលចូលដីថៃ
អ្នកវិភាគ៖ លោក ថាក់ស៊ីន មកកម្ពុជាជារឿងនយោបាយ
មតិ
Click here to add your own comment