ការព្រមានរបស់លោក ហោ ណាំហុង ធ្វើឡើងបន្ទាប់លោក គ្រីស្តូហ្វ ពីស៊ូ បានសម្ដែងការព្រួយបារម្ភចំពោះការចាប់បញ្ជូនជនសង្ស័យភេរវជនថៃចំនួន ២នាក់ កាលពីថ្ងៃទី៥ កក្កដា ថា ការចាប់បញ្ជូននេះមិនបានគោរពទៅតាមបែបបទច្បាប់ ដើម្បីធានាការការពារសិទ្ធិមនុស្សរបស់ជនជាតិថៃ។
កម្ពុជាបានបញ្ជូនជនជាតិថៃទាំង ២នាក់ទៅប្រទេសថៃវិញ បន្ទាប់ពីសមត្ថកិច្ចកម្ពុជាឃាត់ខ្លួនអ្នកទាំង ២ ដែលបានរត់គេចខ្លួនមកកាន់ខេត្តសៀមរាប ក្រោយពេលពួកគេបានវាយប្រហារគ្រាប់បែកទៅលើទីស្នាក់ការគណបក្ស ផុំចៃថៃ (Bhumjaithai)។
លោក ហោ ណាំហុង បានសរសេរទៅកាន់លោក គ្រីស្តូហ្វ ពីស៊ូ កាលពីថ្ងៃទី៨ កក្កដា ថា ប្រសិនបើមានសកម្មភាពបែបនេះ នៅពេលអនាគតនឹងនាំឲ្យរដ្ឋាភិបាលកម្ពុជាធ្វើការសម្រេចចំពោះវត្តមានរបស់លោក គ្រីស្តូហ្វ ពីស៊ូ នៅកម្ពុជា។ លោក ហោ ណាំហុង បន្តថា លោកតំណាងការិយាល័យ ឧត្ដមស្នងការអង្គការសហប្រជាជាតិ គួរតែសម្រេចនូវសកម្មភាពនៃកិច្ចសហប្រតិបត្តិបច្ចេកទេស ដូចដែលចែងនៅក្នុងអនុស្សរណៈដែលត្រូវបានចុះហត្ថលេខាកាលពីថ្ងៃទី១ ខែមករា ឆ្នាំ២០១០ ហើយបញ្ឈប់ការជ្រៀតជ្រែកចូលកិច្ចការដែលទាក់ទងនឹងអធិបតេយ្យកម្ពុជា។
អ្នកនាំពាក្យរបស់ក្រសួងការបរទេស លោក កុយ គួង មានប្រសាសន៍នៅថ្ងៃសុក្រនេះថា ការបញ្ជូន ឬមិនបញ្ជូនត្រឡប់ទៅវិញនូវជនសង្ស័យពីបទភេរវកម្ម គឺជាសិទ្ធិផ្ដាច់មុខនៃអធិបតេយ្យកម្ពុជា។
លោក គ្រីស្តូហ្វ ពីស៊ូ បដិសេធមិនធ្វើអត្ថាធិប្បាយចំពោះសេចក្ដីថ្លែងការណ៍របស់ក្រសួងការបរទេសនៅថ្ងៃព្រហស្បតិ៍នេះទេ។
អ្នកនាំពាក្យរបស់គណបក្សប្រឆាំង លោក យឹម សុវណ្ណ មានប្រសាសន៍នៅថ្ងៃព្រហស្បតិ៍នេះដែរថា រដ្ឋាភិបាលមិនគួរដាក់គំនាបទៅលើមន្ត្រីអង្គការសហប្រជាជាតិ ក្នុងការបញ្ចេញមតិរបស់ពួកគេ ពីព្រោះអង្គការសហប្រជាជាតិបានជួយប្រទេសកម្ពុជាជាច្រើន ហើយប្រទេសកម្ពុជានៅតែត្រូវការអង្គការសហប្រជាជាតិ ដើម្បីអភិវឌ្ឍប្រទេសជាតិ។
លោក ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២១ មិថុនា បានសម្ដែងនូវការមិនសប្បាយចិត្តចំពោះលោក ស៊ូយ៉ា ស៊ូប៊ែឌី អ្នករាយការណ៍ពិសេសអំពីសិទ្ធិមនុស្សនៅកម្ពុជារបស់អង្គការសហប្រជាជាតិ ដោយលោក ស៊ូយ៉ា ស៊ូប៊ែឌី ប្រើពាក្យថា លោកខកចិត្តដោយមិនបានជួបលោក ហ៊ុន សែន ក្នុងដំណើរបេសកកម្មរបស់គាត់។ លោក ហ៊ុន សែន ថា អ្នករាយការណ៍ពិសេសរូបនេះមិនគោរពសិទ្ធិម្ចាស់ផ្ទះ និងប្រមាថដល់មេដឹកនាំកម្ពុជា៕