មូលហេតុដែលក្រសួងមហាផ្ទៃ មិនបញ្ជូនជនជាតិចិនតៃវ៉ាន់ទាំងនោះទៅកោះតៃវ៉ាន់ គឺដោយសារតែរដ្ឋាភិបាលកម្ពុជា រក្សាគោលនយោបាយចិនតែមួយ ឬទទួលស្គាល់ចិនតែមួយ។
មន្ត្រីជាន់ខ្ពស់នៃក្រសួងមហាផ្ទៃ បានបញ្ជាក់ថា រដ្ឋមន្ត្រីក្រសួងមហាផ្ទៃ លោក ស ខេង និងជាឧបនាយករដ្ឋមន្រ្តី គ្រោងចេញសេចក្ដីប្រកាសជាផ្លូវការមួយនៅពេលឆាប់ៗនេះ ដើម្បីបណ្ដេញជនជាតិចិនតៃវ៉ាន់ទាំងនោះ និងដាក់ឈ្មោះអ្នកទាំងនោះនៅក្នុងបញ្ជីខ្មៅរបស់ក្រសួងមហាផ្ទៃ ហាមឃាត់មិនឲ្យចូលមកប្រទេសកម្ពុជា ជាថ្មីទៀតឡើយ នៅថ្ងៃអនាគត។
សេចក្ដីប្រកាសនេះនឹងធ្វើឡើងបន្ទាប់ពីនគរបាលជាតិកម្ពុជា បានឆ្មក់បង្ក្រាប និងចាប់ខ្លួនជនជាតិចិនតៃវ៉ាន់ ចំនួន ៤៩នាក់នោះ នៅថ្ងៃទី១៨ ខែឧសភា ឆ្នាំ២០១២ កន្លងទៅនេះ នៅក្នុងខណ្ឌចំនួន ៣ នៅរាជធានីភ្នំពេញ ក្រោមបទចោទថា បានចូលក្នុងប្រទេសកម្ពុជា ខុសច្បាប់ និងបទជំរិតទារប្រាក់ជនជាតិចិនតៃវ៉ាន់គ្នាឯង នៅកោះតៃវ៉ាន់ តាមប្រព័ន្ធអ៊ីនធឺណិត (Internet) ពីប្រទេសកម្ពុជា។ វិធានការបណ្ដេញចេញនោះ គឺអនុវត្តតាមច្បាប់ស្ដីពីជនអន្តោប្រវេសន៍នៃប្រទេសកម្ពុជា។
អ្នកនាំពាក្យក្រសួងមហាផ្ទៃកម្ពុជា លោកឧត្ដមសេនីយ៍ឯក ខៀវ សុភ័គ បានមានប្រសាសន៍ថា សមត្ថកិច្ចកម្ពុជា កំពុងស្វែងរកចាប់ខ្លួនបណ្ដាញឧក្រិដ្ឋជនដទៃទៀត។
លោកបានហៅការឆ្មក់ និងចាប់ខ្លួនថ្មីៗនេះ គឺជាការជោគជ័យដ៏ធំមួយរបស់នគរបាលជាតិកម្ពុជា៖ «ចង់និយាយថា កម្ពុជាមិនមែនជាឋានសួគ៌សំរាប់ពួកម៉ាហ្វីយ៉ា (ក្រុមឧក្រិដ្ឋជន Mafia) សំរាប់ធ្វើសកម្មភាពទេ។ សមត្ថកិច្ចកម្ពុជា ក៏មានសមត្ថភាពដូចសមត្ថកិច្ចរបស់ប្រទេសដទៃដែរ។ យើងបានសហការគ្នាហើយធ្វើការបំផ្លាញពួកម៉ាហ្វីយ៉ា»។
វត្ថុតាងនានាដែលនគរបាលជាតិកម្ពុជា បានរឹបអូសបាន មានដូចជាបណ្ដាញទាក់ទង ម៉ាស៊ីនកុំព្យូទ័រ ទូរស័ព្ទដៃ និងសម្ភារៈមួយចំនួនទៀត។
ប្រធាននាយកដ្ឋានអន្តោប្រវេសន៍របស់ក្រសួងមហាផ្ទៃ ស្ថិតនៅខាងមុខអាកាសយានដ្ឋានអន្តរជាតិភ្នំពេញ លោក ពិន ពិសេន សុំមិនធ្វើអត្ថាធិប្បាយអ្វីទេជុំវិញសំណុំរឿងនេះ នៅពេលដែលវិទ្យុអាស៊ីសេរី បានសាកសួរអំពីការបណ្ដេញជនជាតិចិនតៃវ៉ាន់ទាំងនោះ ប៉ុន្តែមន្ត្រីសន្តិសុខបានបញ្ជាក់ថា ជនជាតិចិនតៃវ៉ាន់ទាំងនោះកំពុងតែជាប់ឃុំខ្លួននៅក្នុងនាយកដ្ឋាននេះ រង់ចាំការបណ្ដេញចេញ។
គេបានកត់សំគាល់ថា ការបង្ក្រាប និងចាប់ខ្លួនជនជាតិចិនតៃវ៉ាន់នៅចុងសប្ដាហ៍កន្លងទៅនេះ គឺការបង្ក្រាបទ្រង់ទ្រាយធំលើកទី២ហើយ ក្រោយពីនគរបាលជាតិកម្ពុជា បានឆ្មក់បង្ក្រាបលើកដំបូងព្រមៗគ្នា នៅខែមិថុនា ឆ្នាំ២០១១ កន្លងទៅនេះ នៅរាជធានីភ្នំពេញ នៅខេត្តព្រះសីហនុ និងនៅខេត្តស្វាយរៀង ដោយសហការជាមួយនគរបាលនៃក្រសួងសន្តិសុខប្រទេសចិន។
ជាលទ្ធផលនគរបាលជាតិកម្ពុជា និងនគរបាលក្រសួងសន្តិសុខប្រទេសចិននោះ បានចាប់ខ្លួនជនជាតិចិនដីគោក និងជនជាតិចិនតៃវ៉ាន់ សរុបចំនួន ១៨៧នាក់ ក្រោមបទជំរិតទារប្រាក់ឆ្លងដែន និងបានបញ្ជូនទៅប្រទេសចិនវិញនៅពេលនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។