ក្រសួងមហាផ្ទៃកម្ពុជា កំពុងតែរង់ចាំចំលើយ ឬឯកសារធ្វើដំណើរពីស្ថានទូតរុស្ស៊ី នៅប្រទេសកម្ពុជា ចំពោះការបណ្ដេញលោក អាឡិច សិនដឺ ត្រូហ្វីម៉ូវ ក្រោមបទប្រព្រឹត្តអនាចារ រួមភេទជាមួយកុមារីកម្ពុជា ក្រោមអាយុ ១៨ឆ្នាំ។
សមត្ថកិច្ចកម្ពុជា បានចាប់ខ្លួនលោក អាឡិច សិនដឺ ត្រូហ្វីម៉ូវ ជាថ្មីទៀតនៅថ្ងៃច័ន្ទ ទី៤ មិថុនា ដើមសប្ដាហ៍នេះ នៅស្រុកពញាឮ ខេត្តកណ្ដាល។
អ្នកនាំពាក្យក្រសួងមហាផ្ទៃកម្ពុជា លោកឧត្ដមសេនីយ៍ឯក ខៀវ សុភ័គ បានមានប្រសាសន៍ថា ក្រសួងមហាផ្ទៃ បានដាក់ឈ្មោះលោក អាឡិច សិនដឺ ត្រូហ្វីម៉ូវ ក្នុងបញ្ជីខ្មៅ ហាមមិនឲ្យចូលមកកម្ពុជា ជាថ្មីទៀតឡើយ៖ «ឥឡូវនេះស្ថិតនៅក្រោមការឃុំគ្រងរបស់សមត្ថកិច្ចយើងនៅកន្លែងមន្ទីរឃុំខ្លួនបណ្ដោះអាសន្ន ...ដូច្នេះយើងធ្វើការបណ្ដេញចេញតាមសេចក្ដីប្រកាសរបស់ក្រសួងមហាផ្ទៃ»។
មន្ត្រីនៃស្ថានទូតរុស្ស៊ី ប្រចាំនៅប្រទេសកម្ពុជា បានសុំមិនធ្វើអត្ថាធិប្បាយអ្វីទេនៅពេលដែលវិទ្យុអាស៊ីសេរី បានទាក់ទងតាមទូរស័ព្ទ សាកសួរអំពីការបណ្ដេញចេញជនជាតិរុស្ស៊ី រូបនោះ។
អគ្គស្នងការរងនគរបាលជាតិ លោកឧត្ដមសេនីយ៍ឯក សុខ ផល បានមានប្រសាសន៍បញ្ជាក់ថា មន្ត្រីនៃស្ថានទូតរុស្ស៊ី នៅប្រទេសកម្ពុជា បានចូលជួបជាមួយលោក អាឡិច សិនដឺ ត្រូហ្វីម៉ូវ រួចហើយនៅក្នុងមន្ទីរឃុំឃាំងនៅថ្ងៃអង្គារ ទី៥ មិថុនា ឆ្នាំ២០១២។
លោកបន្តថា អាជ្ញាធរកំពុងរង់ចាំស្ថានទូតរុស្ស៊ី ចេញលិខិតធ្វើដំណើរឲ្យបានឆាប់ដើម្បីបណ្ដេញចេញទៅប្រទេសរុស្ស៊ីវិញ បើមិនដូច្នោះទេ នគរបាលជាតិមានការលំបាកក្នុងការថែរក្សា និងការផ្ដល់ម្ហូបអាហារ។
ទាក់ទងនឹងវិធានការម៉ឺងម៉ាត់របស់ក្រសួងមហាផ្ទៃនេះ នាយកនៃអង្គការសកម្មភាព ដើម្បីកុមារនៅប្រទេសកម្ពុជា ឬហៅជាភាសាបារាំងថា (Action Pour Les Enfants) លោក សំ នាងសិលា បានមានប្រសាសន៍ថា លោកពេញចិត្តនឹងវិធានការក្ដៅបែបនេះ៖ «ហើយវិធានការនេះក៏នឹងធានានូវសុវត្ថិភាពយ៉ាងសំខាន់ដល់កុមារដែលងាយរងគ្រោះនៅក្នុងកម្ពុជាទាំងអស់។ បើសិនជាជននេះនៅបន្តនៅក្នុងប្រទេសកម្ពុជា យើងគិតថា នឹងមានជនរងគ្រោះរាប់រយនាក់ទៀតដែលរងគ្រោះដោយសារ»។
លោក អាឡិច សិនដឺ ត្រូហ្វីម៉ូវ ត្រូវបានសមត្ថកិច្ចកម្ពុជា បានចាប់ខ្លួនរួចម្ដងហើយនៅឆ្នាំ២០០៧ ក្រោមបទប្រព្រឹត្តអំពើអនាចាររួមភេទជាមួយកុមារីកម្ពុជា ក្រោមអាយុ ១៨ឆ្នាំ ចំនួនជាង ២០នាក់។ ក្រោយមកតុលាការក្រុងភ្នំពេញ បានកាត់ទោសឲ្យជាប់គុក ១៧ឆ្នាំ។
ការចាប់ខ្លួនជាថ្មីទៀតនៅថ្ងៃច័ន្ទ ដើមសប្ដាហ៍នេះ គឺក្រោយពីព្រះមហាក្សត្រខ្មែរ ព្រះបរមនាថ នរោត្តម សីហមុនី បានប្រទានការលើកលែងទោសកាលពីខែធ្នូ ឆ្នាំ២០១១ កន្លងទៅនេះ តាមសំណើរបស់លោកនាយករដ្ឋមន្ត្រី ហ៊ុន សែន។
លោក អាឡិច សិនដឺ ត្រូហ្វីម៉ូវ គឺជាមហាសេដ្ឋីជនជាតិរុស្ស៊ី ដែលមកវិនិយោគទុនទឹកប្រាក់ ៣០០លានដុល្លារអាមេរិកនៅកោះពស់ ខេត្តព្រះសីហនុ តាំងពីឆ្នាំ២០០៦ កន្លងមក។
អ្នកនាំពាក្យក្រសួងមហាផ្ទៃកម្ពុជា លោកឧត្ដមសេនីយ៍ឯក ខៀវ សុភ័គ បានមានប្រសាសន៍ថា សមត្ថកិច្ចរុស្ស៊ី ក៏មានដីកាចាប់ខ្លួនលោក អាឡិច សិនដឺ ត្រូហ្វីម៉ូវ ក្រោមបទប្រព្រឹត្តអំពើអនាចារលើកុមារជនជាតិរុស្ស៊ី កន្លងមកដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។