កម្ពុជាត្រៀមទាក់ទាញទេសចរពីតំបន់អាស៊ាន
វិស័យដែលមានសក្ដានុពលខ្លាំង គឺវិស័យទេសចរណ៍ ដែលគេចាត់ទុកថា ជាឧស្សាហកម្មគ្មានផ្សែង និងរៀងរាល់ឆ្នាំកម្ពុជាទទួលបានចំណូលយ៉ាងច្រើនពីវិស័យទេសចរណ៍នោះ។
តំបន់អង្គរ នាខេត្តសៀមរាប បច្ចុប្បន្នត្រូវបានគេមើលឃើញថា ជាប៉ូលទេសចរណ៍ដ៏សំខាន់របស់កម្ពុជា ដោយអាចទាក់ទាញភ្ញៀវទេសចរជាតិ និងអន្តរជាតិរាប់លាននាក់រៀងរាល់ឆ្នាំ។
របាយការណ៍របស់ក្រសួងទេសចរណ៍ក្នុងឆ្នាំ២០១១ កន្លងទៅនេះ តំបន់សៀមរាបអង្គរទទួលបានទេសចរណ៍អន្តរជាតិប្រមាណជាង ១,៦លាននាក់ ស្មើនឹង ៥៦ភាគរយ នៃចំនួនទេសចរណ៍សរុប កើនឡើង ២៣ភាគរយ ធៀបនឹងឆ្នាំ២០១០ ខណៈដែលភ្នំពេញ និងតំបន់ទេសចរណ៍ផ្សេងទៀតទទួលភ្ងៀវទេសចរអន្តរជាតិប្រមាណ ១.២លាននាក់ កើនឡើង ៦ភាគរយធៀបនឹងឆ្នាំ២០១០។
រដ្ឋមន្រ្តីក្រសួងទេសចរណ៍លោក ថោង ខុន មានប្រសាសន៍នៅក្នុងសិក្ខាសិលានៅខេត្តសៀមរាប ស្តីអំពីទេសចរណ៍ប្រកបដោយចិរភាពនៅតំបន់អង្គរថា នៅឆ្នាំ២០១៥ ខាងមុខនេះ កម្ពុជានឹងទទួលបានភ្ញៀវទេសចរអន្តរជាតិ ៤,៥លាននាក់ និង ៧លាននាក់នៅឆ្នាំ២០២០។
ដើម្បីសម្រេចបាននូវកំណើនភ្ញៀវទេសចរ លោករដ្ឋមន្រ្តីក្រសួងទេសចរណ៍ លោក ថោង ខុន មានប្រសាសន៍ថា កម្ពុជាត្រូវមានការយកចិត្តទុកដាក់ខ្ពស់ និងរៀបចំផែនការជាក់លាក់ ទាមទារឲ្យមានការចូលរួមយ៉ាងសកម្មពីអ្នកដែលពាក់ព័ន្ធទាំងអស់ ដើម្បីធានានិរន្តរភាពនៃការអភិវឌ្ឍដែលមានលក្ខណៈទូលំទូលាយ។
អ្នកវិភាគនានានៅកម្ពុជា យល់ឃើញថា វិស័យទេសចរណ៍មានសក្តានុពលខ្លាំងធៀបនឹងប្រទេសក្នុងតំបន់អាស៊ាន ដោយសារតែតំបន់ទេសចរណ៍របស់កម្ពុជា ភាគច្រើនជាតំបន់ទេសចរណ៍វប្បធម៌ និងប្រវត្តិសាស្រ្ត ដែលប្រទេសក្នុងតំបន់អាស៊ានមិនអាចប្រកួតប្រជែងបាន ហើយនៅឆ្នាំ២០១៥ កម្ពុជាអាចទាក់ទាញភ្ញៀវទេសចរបានកាន់តែច្រើន ជាពិសេសពីបណ្ដាប្រទេសអាស៊ាន។
បញ្ជាក់បន្ថែមអំពីការសម្រេចឲ្យបាននូវគោលដៅនេះ អ្នកវិភាគនយោបាយលោកបណ្ឌិត សុខ ទូច មានប្រសាសន៍នាពេលកន្លងទៅនេះថា កម្ពុជាទទួលបានចំនួនទេសចរណ៍ជាច្រើន ព្រោះប្រទេសជិតខាង ដូចជាប្រទេសថៃ ជាដើម ដែលទទួលរងនូវវិបត្តិផ្សេងៗ។
លោកបណ្ឌិត សុខ ទូច បន្តថា វិបត្តិនៅប្រទេសថៃ នោះ មានដូចជាគ្រោះទឹកជំនន់ ភេរវកម្ម និងជម្លោះផ្ទៃក្នុងជាដើម។ កត្តាសំខាន់ទាំងបីនេះ បានធ្វើឲ្យអ្នកទេសចរណ៍បង្វែរគោលដៅអ្នកទេសចរណ៍អន្តរជាតិមកកម្ពុជា យ៉ាងច្រើន។ លោកមានប្រសាសន៍បន្ថែមទៀតថា ក្នុងឆ្នាំ២០១២ ដែលកម្ពុជាធ្វើជាប្រធានអាស៊ាន វិស័យទេសចរណ៍នឹងត្រូវបានផ្សព្វផ្សាយឲ្យកាន់តែទូលំទូលាយទៅកាន់ពិភពលោក។
លោកបណ្ឌិត សុខ ទូច មានប្រសាសន៍បន្ថែមទៀតថា កម្ពុជាជាមជ្ឈមណ្ឌលកណ្ដាលនៃតំបន់អាស៊ីអាគ្នេយ៍ ដែលប្រសាទនានាក្នុងតំបន់អង្គរនៅខេត្តសៀមរាប ជាមូលដ្ឋានគ្រឹះទាំងព្រហ្មញ្ញផង និងព្រះពុទ្ធសាសនាផង។ លោកមានប្រសាសន៍ថា កម្ពុជាមានប្រភេទទេសចរណ៍បួនដែលជាសក្ដានុពលសម្រាប់ទាក់ទាញអ្នកទេសចរណ៍អន្តរជាតិមកកម្ពុជា ដូចជាទេសចរណ៍វប្បធម៌ ទេសចរណ៍បរិស្ថាន ទេសចរណ៍តំបន់ឆ្នេរ និងទេសចរណ៍សិប្បនិម្មិត។
មានប្រសាសន៍បន្ថែមអំពីសក្ដានុពលទេសចរណ៍នៅកម្ពុជា នាយកប្រតិបត្តិវិទ្យាស្ថានខ្មែរប្រតិបត្តិអន្តរជាតិ និងសន្តិភាព លោកបណ្ឌិត ឈាង វណ្ណារិទ្ធិ មានប្រសាសន៍ថា នៅឆ្នាំ២០១៥ ខាងមុខនេះ កម្ពុជាអាចទាក់ទាញភ្ញៀវទេសចរពីប្រទេសអាស៊ាន បានរហូតដល់ ៥លាននាក់ ដោយសារតែមានការហូរចូលដោយសេរីនៃកម្លាំងពលកម្ម និងការបង្កើតឲ្យមានទិដ្ឋាការអាស៊ានរួមមួយ។ លោកមានប្រសាសន៍បន្ថែមទៀតថា នៅថ្ងៃអនាគតកម្ពុជានឹងអាចមានភ្ញៀវទេសចរណ៍កើនឡើងដូចជាប្រទេសឥណ្ឌា និងចិន។
លោកបណ្ឌិត ឈាង វណ្ណារិទ្ធិ បន្ថែមទៀតថា អ្នកទេសចរអឺរ៉ុប ហ៊ាននឹងចំណាយច្រើនជាងអ្នកទេសចរខាងអាស៊ី ប៉ុន្តែកំឡុងពេលនេះ បណ្ដាប្រទេសអឺរ៉ុបជួបនឹងវិបត្តិសេដ្ឋកិច្ច។ ដូច្នេះកម្ពុជាត្រូវគិតអំពីវិធីទាក់ទាញអ្នកទេសចរណ៍ប្រទេសអាស៊ាន ប៉ុន្តែបញ្ហាប្រឈមមួយដែលកម្ពុជា មិនអាចទទួលប្រយោជន៍ច្រើនពីប្រទេសអ្នកទេសចរអាស៊ាននោះ គឺអ្នកទេសចរទាំងនោះមកទស្សនាកម្ពុជា ដោយប្រើប្រាស់សេវាកម្ម និងផលិតផលរបស់ប្រទេសខ្លួន ដូចជាប្រទេសចិន ជាដើម។
អ្នកវិភាគឯករាជ្យ លោកបណ្ឌិត សុខ ទូច យល់ស្របចំពោះបញ្ហានេះ ហើយកម្ពុជានឹងបាត់បង់ចំណូលជាច្រើនដោយសារតែអ្នកទេសចរទាំងនោះគេប្រើប្រាស់សេវាកម្មជនជាតិរបស់ខ្លួន។
លោក សុខ ទូច បន្តទៀតថា កម្ពុជាត្រូវបង្កើតច្បាប់គ្រប់គ្រងដើម្បីឲ្យអ្នកទេសចរទាំងនោះមកប្រើប្រាស់សេវាកម្មរបស់កម្ពុជា នៅពេលដែលសមាហរណកម្មអាស៊ាននឹងមកដល់នៅឆ្នាំ២០១៥ ខាងមុខនេះ។
ប៉ុន្តែលោកបណ្ឌិត ឈាង វណ្ណារិទ្ធិ យល់ឃើញថា ការបង្កើតច្បាប់ដោយកំហិតឲ្យអ្នកទេសចរមកប្រើប្រាស់សេវាកម្មក្នុងស្រុកមានការលំបាក ដោយសារតែកម្ពុជា ប្រកាន់យកសេដ្ឋកិច្ចទីផ្សារសេរី។ តែទោះជាយ៉ាងណាក៏ដោយ លោក វណ្ណារិទ្ធិ មានប្រសាសន៍ថា ការលើកទឹកចិត្តឲ្យមានការប្រកួតប្រជែងក្នុងស្រុកឲ្យខ្លាំង គឺអាចកាត់បន្ថយបញ្ហាទាំងនោះ។
តែទោះយ៉ាងក៏ដោយ លោកឧបនាយករដ្ឋមន្ត្រី សុខ អាន មានប្រសាសន៍នៅក្នុងសិក្ខាសិលានិរន្តរភាពវិស័យទេសចរណ៍ថា ដើម្បីឲ្យភ្ញៀវទេសចរណ៍ចំណាយកាន់តែច្រើននៅពេលទស្សនាកម្ពុជា គឺកម្ពុជាត្រូវធ្វើពិពិត្តកម្មផលិតផលទេសចរណ៍ ការបង្កើតឲ្យមានតំបន់ទេសចរណ៍ថ្មីៗ និងការបង្កើតឲ្យមានមជ្ឈមណ្ឌលបដិសណ្ឋាកិច្ចជាដើម។
អ្នកជំនាញបានបង្ហាញទៀតថា ទន្ទឹមនឹងការរំពឹងទុកចំពោះការកើនឡើងអ្នកទេសចរមកកម្ពុជា នៅឆ្នាំ២០១៥ ខាងមុខនេះ រដ្ឋាភិបាលត្រូវការត្រៀមខ្លួនទុកជាមុន និងសហការគ្នាជាមួយផ្នែកឯកជនដើម្បីទទួលបានសេវាកម្មទេសចរណ៍ដែលល្អសម្រាប់ទាក់ទាញអ្នកទេសចរឲ្យកាន់តែច្រើនក្នុងការសម្រេចបាននូវកំណើនភ្ញៀវទេសចរដូចដែលកម្ពុជា រំពឹងទុកនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អ្នកអានអនាមិក
You will see PM Hun Sen, be able to gave Kampuchea Krom and Kampuchea to Youn and he will be remembered as King Dejo the First that he can do both at the same time.
Mar 11, 2012 10:41 PM
អ្នកអានអនាមិក
Angkor Wat is a great world heretage site,inspired and indisputable the most famous,most enormous,most impressive and most attraction from pple around the world come to see this khmer ancient heretage site.And best compared to the Egyptian Pyramids and huge geometrical structure as Notre Dame of Paris and great tells of an ancient of architecture or scupturing on level of the Acropulis Athen,Greece.It blessed for great source incomes for khmer govn't and it own pple , but mostly khmer national treasures or natural resources had been abandoned or destroyed by Hunsen govn't greedier.
Mar 11, 2012 01:57 PM
អ្នកអានអនាមិក
ជំរាបសួរវិទ្យុអាស៊ីសេរី៖សូមជួយពន្យល់អត្ថន័យពាក្យ
‹‹សក្ដានុពល››នេះផង។ខ្ញុំរកមិនឃើញទេវចនានុក្រម
ពីហើយ។
Mar 10, 2012 05:13 PM
អ្នកអានអនាមិក
In cambodia this day...only words they can say is( PREPARATION OR GOING TO) IN THEIR THEORY NOT IN AN ACTION. How many time did they say(GOING TO DO THIS OR THAT?)I noticed that it's not easy as we say but we've been waiting to see this government's genius ideas for too long. Even though thai already made benefits from khmer's old temple.
Mar 10, 2012 12:25 PM
អ្នកអានអនាមិក
To preserve the Angkor Wat Temple for the tourism and most of the proceeds from the said industry is being deposited in a private account/s, it's a shameful and disgraceful act. The utmost duty of all Khmers is to follow our beloved, brave, smart, and honest leaders-King Suryavarman II and King Jayavarman VII. From the bottom of my heart, I'm respectfully admiring King Suryavarman II, King Jayavarman VII, and other kings who were helped building the Angkor Temple. I would like to see PM Hun Sen, at least, be able to claim Kampuchea Krom from Youn, so he will be remembered as King Dejo the First.
Mar 10, 2012 11:00 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
