ការសន្និដ្ឋាននេះធ្វើឡើងបន្ទាប់ពីប្រតិភូនៃក្រុមប្រឹក្សាឃ្លាំមើលកម្ពុជា មានគ្នា ២៣រូប បានចុះទៅពិនិត្យបង្គោលព្រំដែនកម្ពុជា-វៀតណាម នៅថ្ងៃនៅថ្ងៃអាទិត្យទី៩ ខែមករា ឆ្នាំ ២០១១ ក្នុងខេត្តចំនួនពីរ គឺខេត្តព្រៃវែងនិងខេត្តកំពង់ចាម ។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន អះអាងថា ក្រុមរបស់លោកមិនចាំបាច់ប្រើជំនាញឬឧបករណ៍អ្វីទេ គឺគ្រាន់តែធ្វើការសិក្សាស្វែងរកការពិត តាមរយៈប្រជាពលរដ្ឋដែលជាម្ចាស់ដីនិងជាសាក្សីរស់ ក៏អាចដឹងដែរថា បង្គោលព្រំដែនលេខ ១២៥ ត្រូវបានគេបោះចូលក្នុងដីកម្ពុជា ហើយធ្វើឲ្យភូមិខ្មែរចំនួនបី គឺភូមិអន្លង់ជ្រៃ ភូមិថ្លុកត្រាច និងភូមិតាអាំ (ដែលជាភូមិចាស់) ក្នុងឃុំកក់ ស្រុកពញាក្រែក ខេត្តកំពង់ចាម ត្រូវបាត់បង់ទៅខាងភាគីវៀតណាម ៖ «យើងមានការសោកស្ដាយ នូវអ្វីដែលថ្នាក់ដឹកនាំយើងមានលក្ខណៈកំសាក មិនហ៊ានទទួលស្គាល់ការពិត បាទ !» ។
បុរសអាយុ ៦៧ឆ្នាំ រស់នៅភូមិអន្លង់ជ្រៃ លោក ប៉ាវ ក្រឹម ថ្លែងថា រូបគាត់ចាស់ គាត់លែងគិតលែងស្ដាយចំពោះការបាត់បង់ដីស្រែនិងភូមិឋានហើយ តែគាត់អាណិតដល់កូនចៅជំនាន់ក្រោយ ៖ «ឃើញគេមកវាស់អ៊ីចឹងទៅថា ខាងហ្នឹងដីរបស់គេទៅ ប្រជាពលរដ្ឋមិនហ៊ានថាម៉េចទេ ។ អាជ្ញាធរអីគេថា គេវាស់វែងទៅ គេមក គេយក ឌ្យីភីអេស (GPS) អីមកដើរវាស់វែងទៅគេថា ដីខាងណេះដីវៀតណាម» ។
មុននឹងទៅពិនិត្យបង្គោលព្រំដែនលេខ ១២៥ នៅក្នុងស្រុកពញាក្រែក ខេត្តកំពង់ចាម ប្រតិភូនៃក្រុមប្រឹក្សាឃ្លាំមើលកម្ពុជា បានទៅពិនិត្យបង្គោលព្រំដែនលេខ ១៣១ នៅស្រុកកំចាយមារ ខេត្តព្រៃវែង ។
លោក រ៉ុង ឈុន អះអាងថា បង្គោលព្រំដែនលេខ ១៣១ ត្រូវបានគេបោះចូលក្នុងដីខ្មែរប្រមាណ ៦០០ ម ប៉ុន្តែអតីតប្រធានភូមិមានជ័យ ឃុំ ក្របៅ នៃស្រុកកំចាយមារ ខេត្តព្រៃវែង លោក រស់ រី ថ្លែងថា ការបោះបង្គោលនេះមិនបណ្ដាលឲ្យបាត់បង់ដីខ្មែរឡើយ ៖ «ខ្ញុំឃើញតែទន្លេនៅមួយអាយូសទៅហើយ ។ វាសំខាន់បំផុត អាចំណុចទន្លេហ្នឹងដូច...ទំនប់ … ហើយមានពីណាឆ្លងមករួច !» ។
ទាក់ទិននឹងបញ្ហាព្រំដែន ប្រធានគណបក្សប្រជាជនកម្ពុជា លោក ជា ស៊ីម មានប្រសាសន៍នៅក្នុងឱកាសខួបទី៣២នៃថ្ងៃជ័យជម្នះ ៧ មករា អំពីសមិទ្ធផលដែលគណបក្សប្រជាជនសម្រេចបាន ក្នុងនោះ លោកលើកឡើងថា គណបក្សប្រជាជនបានដោះស្រាយព្រំដែនជាមួយប្រទេសជិតខាងដោយសន្តិវិធី ការពារយ៉ាងគត់មត់នូវអធិបតេយ្យនិងបូរណភាពទឹកដី ហើយថា គណបក្សប្រជាជនថ្កោលទោសយ៉ាងម៉ឺងម៉ាត់ចំពោះបុគ្គលឬស្ថាប័នទាំងឡាយណា ដែលនៅតែបន្តធ្វើការប៉ុនប៉ងរារាំងដំណើរការនេះ ៖ «គណបក្សប្រជាជនកម្ពុជា សូមវាយតម្លៃខ្ពស់ ចំពោះការខិតខំរបស់រាជរដ្ឋាភិបាល ក្នុងការងារខណ្ឌសីមា និងបោះបង្គោលព្រំដែនជាមួយប្រទេសវៀតណាម និងប្រទេសឡាវ ហើយគាំទ្រ បន្តការរុញដំណើរការនេះ ឲ្យបានសម្រេចទាំងស្រុង តាមការគ្រោងទុក» ។
ក្រុមប្រឹក្សាឃ្លាំមើលកម្ពុជា បានធ្វើដំណើរយ៉ាងប្រុងប្រយ័ត្ន ទៅពិនិត្យបង្គោលព្រំដែននីមួយៗ តាមបណ្ដោយព្រំដែន កម្ពុជា វៀតណាម ។ កងកម្លាំងវៀតណាម បានចូលមកថតរូប និងថតសំឡេង សកម្មភាពពិនិត្យព្រំដែនរបស់ក្រុមប្រឹក្សាឃ្លាំមើលកម្ពុជា នៅជុំវិញបង្គោលព្រំដែនលេខ ១២៥ ៕