កម្ពុជា និងវៀតណាម មានគម្រោងបោះបង្គោលព្រំដែនគោកឲ្យបានចំនួន ១០០បង្គោលលើដីជាក់ស្ដែង និងខណ្ឌសីមាព្រំដែនគោកប្រទេសទាំងពីរឲ្យបាន ៥០០គីឡូម៉ែត្រលើដីជាក់ស្ដែង និងធ្វើផែនទីឋានលេខាព្រំដែនគោកកម្ពុជា-វៀតណាម។
នេះជារបៀបវារៈមួយក្នុងចំណោមសេចក្ដីព្រាងរបៀបវារៈប្រជុំចំនួន ៥ចំណុច នៅក្នុងកិច្ចប្រជុំគណៈកម្មការចម្រុះខណ្ឌសីមាកម្ពុជា និងវៀតណាម បានជួបប្រជុំគ្នាលើកទី៥ នៅទីក្រុងភ្នំពេញ ដែលបានចែកផ្សាយឲ្យអ្នកកាសែត ដែលបានតាមដានស្រង់ព័ត៌មានកិច្ចប្រជុំនោះ។
ឯកសារដែលចែកផ្សាយដល់អ្នកកាសែត បានឲ្យដឹងថា របៀបវារៈកិច្ចប្រជុំ ៤ចំណុចទៀត រួមមានទី១ របាយការណ៍បូកសរុបការងារខណ្ឌសីមា និងការបោះបង្គោលព្រំដែនគោក ឆ្នាំ២០១០ កន្លងមករវាងប្រទេសទាំង២។ ទី២ អនុម័តលទ្ធផលកំណត់ហេតុប្រជុំក្រុមជំនាញលើកទី១៤ និងកំណត់ហេតុកិច្ចប្រជុំលើកទី៣ នៃក្រុមជំនាញបច្ចេកទេស ហ្ជីភីអេស (GPS) នៃគណៈកម្មការចម្រុះខណ្ឌសីមា និងបោះបង្គោលព្រំដែនកម្ពុជា-វៀតណាម។ ទី៣ ពិភាក្សារកដំណោះស្រាយបញ្ហាបង្គោលព្រំដែនលេខ២៧៥ នៅច្រកទ្វារអន្តរជាតិ នៅភ្នំដិន អាងយ៉ាង នាខេត្តតាកែវ បង្គោលលេខ៣០ នៅអណ្ដូងពេជ្រ ឡេថាញ់ នាខេត្តរតនគិរី និងបង្គោលលេខ៣១៤ នៅកំពត គៀងយ៉ាង និងទី៥ បញ្ហាផ្សេងៗ ដែលក្នុងនោះមានការចុះត្រួតពិនិត្យការគ្រប់គ្រងជាក់ស្ដែងលើទីតាំងបង្គោលលេខ២៤១ ដល់ ២៤៥ នៅចន្លោះទន្លេមេគង្គ និងទន្លេបាសាក់ ដោយក្រុមបច្ចេកទេសនៅខេត្តកណ្ដាល និងអាងយ៉ាង បន្ថែមល្បឿនការបោះបង្គោលតម្រុយខណ្ឌសីមា លើដីជាក់ស្ដែងឲ្យបានឆាប់។
លោក វ៉ា គឹមហុង ទេសរដ្ឋមន្ត្រី និងជាប្រធានគណៈកម្មការចម្រុះខណ្ឌសីមាកម្ពុជា-វៀតណាម បានជួបប្រជុំជាមួយលោក ហូ ស៊ុនសឺន (Ho Xuan Son) អនុរដ្ឋមន្ត្រីក្រសួងការបរទេសវៀតណាម និងជាប្រធានគណៈកម្មការចម្រុះខណ្ឌសីមាវៀតណាម-កម្ពុជា ចាប់ពីថ្ងៃទី២៤ ដល់ទី២៦ កុម្ភៈ នៅទីស្ដីការគណៈរដ្ឋមន្ត្រីកម្ពុជា នៅទីក្រុងភ្នំពេញ។
នៅថ្ងៃទី២៤ កុម្ភៈនេះ លោកទេសរដ្ឋមន្ត្រី វ៉ា គឹមហុង ដោយរវល់ជាប់ប្រជុំ បដិសេធមិនទាន់ធ្វើអត្ថាធិប្បាយលើលទ្ធផលនៃកិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោកកម្ពុជា និងវៀតណាមទេ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាតំណាងក្រុមប្រឹក្សាឃ្លាំមើលកម្ពុជា ដែលជាសកម្មជនយកចិត្តទុកដាក់ក្នុងបញ្ហាព្រំដែន និងធ្លាប់បានចុះទៅពិនិត្យបង្គោលព្រំដែនកម្ពុជា-វៀតណាម នៅកន្លែងមួយចំនួនក្នុងខេត្តកំពង់ចាម តាកែវ ព្រៃវែង ស្វាយរៀង ដែលនៅទីនោះអ្នកស្រុកធ្លាប់បានតវ៉ាថា មានការបាត់បង់ដីស្រែដោយសារការបោះតម្រុយបង្គោលព្រំដែនថ្មីនោះ បានមានប្រសាសន៍ថា លោកសុំឲ្យមានការបោះបង្គោលព្រំដែនឲ្យបានត្រឹមត្រូវ ចៀសវាងការបាត់បង់ទឹកដី ជាពិសេសការបាត់បង់ដីខ្មែរ។
លោក រ៉ុង ឈុន មានប្រសាសន៍បន្ថែម ៖ «យើងមើលឃើញទាំងបង្គោល ទាំងតម្រុយ ភាគច្រើនបោះចូលមកក្នុងទឹកដីកម្ពុជាយើង ហើយអាត្រង់ចំណុចដែលគណៈកម្មការព្រំដែនកម្ពុជា-វៀតណាម អះអាងថា ការបោះចូលទាំងសងខាងគេក៏ចូលយើងក៏ចូល ប៉ុន្តែយើងអត់ឃើញ អត់មានឃើញអាការបោះចូលទៅក្នុងទឹកដីគេ ហើយយើងចង់ឲ្យគណៈកម្មការព្រំដែនកម្ពុជាហ្នឹង ត្រូវតែចង្អុលបង្ហាញឲ្យច្បាស់ ហើយយើងស្នើសុំថា ឲ្យព្យួរការបោះបង្គោលព្រំដែនហ្នឹងជាអន្លើសិនទៅ ហើយត្រូវតែរកដំណោះស្រាយ»។
ការបោះបង្គោលព្រំដែនកម្ពុជា-វៀតណាម ជាបញ្ហារសើបមួយ និងមានប្រជាពលរដ្ឋខ្លះបានចោទប្រកាន់ថា ការបោះបង្គោលព្រំដែននោះបណ្ដាលឲ្យមានការបាត់បង់ដីស្រែកេរពីដូនតា និងមានប្រជាពលរដ្ឋខ្លះ រួមទាំងអ្នកនយោបាយផង ត្រូវជាប់ឃុំ ឬរត់ចោលស្រុក ដោយសារមានការនិយាយថា បាត់ដីស្រែដោយសារការបោះបង្គោលព្រំដែន បានប៉ះពាល់ និងដកតម្រុយបង្គោលព្រំដែន ដូចជាករណីលោកស្រី មាស ស្រី និងលោក សម រង្ស៊ី នៅស្រុកចន្ទ្រា ខេត្តស្វាយរៀង ជាដើម។
លោកទេសរដ្ឋមន្ត្រី វ៉ា គឹមហុង ធ្លាប់បានថ្លែងថា រាជរដ្ឋាភិបាលកម្ពុជា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន មិនបានលេងសើចលើដំណើរការបោះបង្គោលកំណត់ព្រំដែននោះទេ ពោលគឺរដ្ឋាភិបាលបានអនុវត្តតាមច្បាប់យ៉ាងត្រឹមត្រូវ ដោយយកតាមផែនទីខ្នាត ១លើ១០០ពាន់របស់ក្រុមភូមិសាស្ត្រឥណ្ឌូចិន ដើម្បីកសាងព្រំដែនសន្តិភាពទៅអនាគត។
លោកឲ្យដឹងថា ក្នុងចម្ងាយព្រំដែនកម្ពុជា-វៀតណាម ប្រវែង ១.២៧០គីឡូម៉ែត្រ រដ្ឋាភិបាលទាំងពីរបានឯកភាពគ្នាថា នឹងបោះបង្គោលព្រំដែនដែលមានចំនួន ៣៧៥បង្គោលឲ្យរួចរាល់ជាស្ថាពរនៅមុនដាច់ឆ្នាំ២០១២។
គួររំឭកថា គណៈកម្មាធិការចម្រុះបោះបង្គោលព្រំដែនកម្ពុជា-វៀតណាម បានចាប់ផ្តើមបោះតាំងពីឆ្នាំ២០០៦ មកម្ល៉េះ ហើយមកដល់ដំណាច់ឆ្នាំ២០១០ រដ្ឋាភិបាលប្រទេសទាំងពីរបានបោះបង្គោលព្រំដែនបានជាង ២០០បង្គោលហើយ៕