កម្មវិធីអភិវឌ្ឍន៍អង្គការសហប្រជាជាតិ (UNDP) សហការជាមួយនឹង BBC World Service Trust បានចេញរបាយការណ៍ស្រាវជ្រាវមួយរកឃើញថា យុវជនខ្មែរមានការពេញចិត្តចំពោះទិសដៅនៃការអភិវឌ្ឍប្រទេសកម្ពុជាបច្ចុប្បន្ន ប៉ុន្តែពួកគេខ្វះការយល់ដឹងអំពីដំណើរការលទ្ធិប្រជាធិបតេយ្យ និងខ្វះការចូលរួមនៅក្នុងឆាកនយោបាយ និងសេដ្ឋកិច្ចនៅក្នុងសង្គម។
ការសិក្សាស្រាវជ្រាវនេះបានធ្វើឡើងរយៈពេល ៨ខែ នៅក្នុងប្រទេសកម្ពុជា ដោយមានកិច្ចសម្ភាសន៍ទល់មុខគ្នាជាមួយយុវជនចំនួន ២.០០០នាក់ ដែលមានអាយុរវាងពី ១៥ឆ្នាំ ទៅ ២៤ឆ្នាំ។
នាយកនៃអង្គការ UNDP ប្រចាំនៅក្នុងប្រទេសកម្ពុជា លោកស្រី អីលីណា ទីហ្សីនកូ (Elena Tischenko) បានមានប្រសាសន៍នៅក្នុងសន្និសីទកាសែតនៅថ្ងៃទី២១ ខែកក្កដា ថា ប្រទេសកម្ពុជា មានការអភិវឌ្ឍក្នុងការបង្កើតស្ថាប័នរដ្ឋ និងសមត្ថភាពរបស់ខ្លួន ចំណែកឯមនុស្សជំនាន់ក្រោយក៏ចេះតែកើតមានជាច្រើន ៖ «ការសិក្សាស្រាវជ្រាវនេះបានបង្ហាញឲ្យដឹងអំពីអ្វីដែលយុវជនជំនាន់ក្រោយកំពុងតែប្រឈមមុខនឹងអ្វីដែលយុវជនអាចចូលរួមក្នុងការអភិវឌ្ឍប្រទេសកម្ពុជា»។
ការសិក្សាស្រាវជ្រាវបានផ្ដល់អនុសាសន៍ចំនួន ៨ចំណុចសំខាន់ៗ ដើម្បីឲ្យយុវជនមានការយល់ដឹងអំពីដំណើរការលទ្ធិប្រជាធិបតេយ្យនៅកម្ពុជា ក្នុងនោះមានការបង្កើនការយល់ដឹងអំពីគោលគំនិតនៃលទ្ធិប្រជាធិបតេយ្យ អភិបាលកិច្ច និងការពាក់ព័ន្ធរបស់ពលរដ្ឋក្នុងការងារសាធារណៈ លើកកម្ពស់ចំណេះដឹងអំពីអត្ថន័យនៃគោលគំនិត និងអំពីអ្វីដែលរដ្ឋាភិបាល ឬស្ថាប័នប្រជាធិបតេយ្យ ជាពិសេសនៅថ្នាក់ឃុំ-សង្កាត់ និងថ្នាក់ជាតិ។
ប្រធានក្រុមប្រឹក្សាសារព័ត៌មានកម្ពុជា លោក សុខ សុវណ្ណ បានមានប្រសាសន៍ថា យុវជនខ្មែរមិនសូវជាចាប់អារម្មណ៍អំពីលទ្ធិប្រជាធិបតេយ្យ ដោយសារតែពួកគាត់យល់ថា គាត់មានសេរីភាពហើយ។ យុវជនខ្មែរមិនសូវចូលចិត្តស្វែងយល់តាមរយៈការអាន និងតាមដានដំណើរការអនុវត្តន៍លទ្ធិប្រជាធិបតេយ្យនៅកម្ពុជាទេ។
លោកបន្តថា ៖ «យុវជន បន្តិចទៀតហ្នឹង នឹងក្លាយជាអ្នកដឹកនាំ នៅពេលដែលគាត់ក្លាយជាអ្នកដឹកនាំហើយ គាត់មានការយល់ដឹងក្នុងសង្គមតិច អាហ្នឹងវាជារឿងមួយគ្រោះថ្នាក់ដែលយើងគួរតែមានចំណាប់អារម្មណ៍រឿងហ្នឹង។ យើងគិតមើលថា ផ្នែកទូរទស្សន៍ អ្វីក៏ដោយយើងគួរតែឲ្យមានការឃោសនាជួយឲ្យយុវជនស្វែងយល់អំពីតម្លៃរបស់ខ្លួនទៅថ្ងៃអនាគត»។
តាមការសិក្សាស្រាវជ្រាវបានរកឃើញថា ក្នុងចំណោមអ្នកឆ្លើយសំណួរ ២.០០០នាក់នោះ មានយុវជន ៩២% ធ្លាប់ឮពីក្រុមប្រឹក្សាឃុំសង្កាត់ តែក្នុងចំណោម ១ ភាគ ៣ នៃ ៩២% នោះ មិនបានដឹងថា តើក្រុមប្រឹក្សាឃុំសង្កាត់ធ្វើការងារអ្វីនោះឡើយ។ ចំពោះមុខងាររដ្ឋសភា យុវជនកម្ពុជា ក្នុងចំណោមអ្នកឆ្លើយសំណួរ ៣ ភាគ ៤ ធ្លាប់ឮគេនិយាយពីរដ្ឋសភា តែមួយចំនួនធំមិនដឹងថា តើរដ្ឋសភាមានមុខងារជាអ្វី និងធ្វើការងារអ្វីប្រចាំថ្ងៃឡើយ។
ការសិក្សាស្រាវជ្រាវមិនបានចង្អុលបង្ហាញអំពីមូលហេតុច្បាស់លាស់ទេអំពីមូលហេតុដែលនាំឲ្យខ្វះការយល់ដឹងនោះ ប៉ុន្តែរបាយការណ៍បានបង្ហាញថា យុវជនខ្មែរមាននិន្នាការទៅរកការកម្សាន្ត និងទស្សនាកម្មវិធីសប្បាយៗ នៅតាមស្ថានីយទូរទស្សន៍ និងការប្រើប្រាស់ទូរស័ព្ទដៃ និងឧបករណ៍កម្សាន្តដទៃទៀត៕