អភិបាលរងខេត្តសៀមរាប លោក ប៊ុន ថារិទ្ធិ បានមានប្រសាសន៍ឲ្យដឹងថា កងទាហានទាំងនោះ ត្រូវបានបញ្ជូនទៅកាន់ចំណុចព្រំដែន ដើម្បីដោះដូរជាមួយកងកម្លាំងរក្សាព្រំដែននៅតាមតំបន់មួយចំនួន។
លោក ប៊ុន ថារិទ្ធិ មានប្រសាសន៍ថា ៖ «កម្លាំងទៅផ្លាស់ប្ដូរគ្នាទេ នៅតាទុំ ឧត្តរមានជ័យ។ ទ័ពទៅគេមានស្បៀងមានអី ហើយអំណោយសម្ភារៈឧបត្ថម្ភអីពីបងប្អូនប្រជាពលរដ្ឋមន្រ្តីរាជការអី ដូចសព្វដងដែលយើងតែងទៅ គឺយើងតែងជួយឧបត្ថម្ភអីផ្សេងៗ»។
ការបញ្ជូនកងយោធាខ្មែរទៅកាន់តំបន់នោះ បានធ្វើឡើង នៅស្របពេលដែលមានសេចក្ដីរាយការណ៍ថា កងទាហានប៉ារ៉ាថៃជាច្រើន ត្រូវបានគេដឹកជញ្ជូនដាក់តាមរថយន្ត នៅតំបន់ក្បែរព្រំដែនខ្មែរ កាលពីពេលថ្មីៗ។
អនុប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកជាំសាង៉ាំ លោកវរសេនីយ៍ទោ តូច រ៉ា បានមានប្រសាសន៍ថា ទាហានប៉ារ៉ាថៃជាច្រើន ត្រូវបានគេដឹកជញ្ជូនតាមរថយន្តមកដាក់នៅក្នុងបន្ទាត់ព្រំដែនថៃក្បែរតំបន់នោះ កាលពីថ្ងៃទី១៨ ខែសីហា។
លោកវរសេនីយ៍ទោ តូច រ៉ា មានប្រសាសន៍ថា ៖ «សព្វថ្ងៃ គេដាក់កម្លាំងវា ១០០ជាង ពួកប៉ារ៉ាប៉ុន្មានឡាន ទម្លាក់ចោល ប្រហែលពីព្រំដែនទៅ ៤00-៥00ម៉ែត្រ។ ហើយកម្លាំងហ្នឹងដើរទៅ ដូចដើរហាត់អ៊ីចឹង»។
ចំណែកស្ថានការណ៍នៅឯតំបន់ជម្លោះព្រំដែន ជិតប្រាសាទព្រះវិហារវិញ រហូតមកដល់ថ្ងៃទី២០ ខែសីហានេះ គម្រោងនៃការដកកងទ័ពទាំងសងខាង ចេញពីតំបន់ខ្សែត្រៀមជួរមុខ ដោយកំណត់ឲ្យទុកតែ ២០នាក់ម្ខាងៗនោះ បានកំពុងស្ថិតនៅក្នុងការមិនអាចកំណត់ពេលវេលាច្បាស់លាស់នៅឡើយ។
កាលពីថ្ងៃទី១៤ ខែសីហា កន្លងមក មេបញ្ជាការខ្មែរ-ថៃ ដែលគ្រប់គ្រងផ្ទាល់នៅក្នុងតំបន់ជម្លោះ ធ្លាប់បានជួបជជែកគ្នាជាមួយនឹងការដាក់ចេញគម្រោងដកកងទ័ព ចេញពីតំបន់ជម្លោះ ក្នុងទីវត្តខ្មែរ ដោយទុកឲ្យនៅតែ ១០នាក់ម្ខាង។ ចំណែកឯនៅខ្សែត្រៀមជួរមុខ គេមានគម្រោងថា នឹងដកកងទ័ព ទាំងសងខាង ដោយទុកឲ្យនៅតែម្ខាង ២០នាក់ប៉ុណ្ណោះ ហើយថា ផែនការនេះ អាចនឹងធ្វើឡើងចាប់ពីថ្ងៃទី១៨ ឬថ្ងៃទី១៩ ខែសីហា ក៏ប៉ុន្តែទោះយ៉ាងណា ផែនការនោះត្រូវបានខកខាន។
ពលទាហានថៃឈុតខ្មៅម្នាក់ ដែលកំពុងត្រៀមប្រយុទ្ធក្នុងខ្សែត្រៀមជួរមុខ បាននិយាយកាលពីព្រឹកថ្ងៃពុធថា រហូតដល់ពេលនេះ ពួកគេមិនបានទទួលបញ្ជាឲ្យដកកងទ័ពចេញពីទឹកដីខ្មែរនៅឡើយ ហើយពួកគេមិនចង់នៅយូរទេ ៖ «អត់ដេកពួន នៅម៉ង់ៗ ដូចឆ្កែបាត់ម្ចាស់ ដូចនិយាយប្រាប់ខាងណោះមិញ គេដោះស្រាយតែខាងលើឯណោះ។ អត់ចង់នៅទេ ... កូនប្រពន្ធភ្នែកខ្មៅនៅស្រុកឯណោះ។ នៅព្រោះអី? ព្រោះចង់បានលុយគេ»។
សូមរំឭកថា កាលពីថ្ងៃទី១៦ ខែសីហា កន្លងមក ទាហានឈុតខ្មៅថៃ ប្រមាណជាង ៣៣០នាក់ បានដកចេញពីទីវត្តខ្មែរកែវសិក្ខាគិរីស្វារៈ ក៏ប៉ុន្តែកងទ័ពជាច្រើនរយនាក់ទៀត នៅឯខ្សែត្រៀមជួរមុខ គឺនៅចំនួនដដែល៕