កាលពីថ្ងៃពុធម្សិលមិញនេះ ក្រុមអ្នកសារព័ត៌មានគ្មានព្រំដែន Reporters Without Borders បានចេញរបាយការណ៍មួយស្តីពីស្ថានភាពនៃសេរីភាពសារព័ត៌មានក្នុងបណ្តាប្រទេសចំនួន១៧៣។
ក្នុងតារាងរបាយការណ៍នោះ ក្រុមអ្នកសារព័ត៌មានគ្មានព្រំដែន បានអះអាងថា កម្ពុជាដែលទទួលពិន្ទុមិនល្អនោះ គឺបណ្តាលមកពីឃាតកម្មលើអ្នកកាសែតនិងដោយសាររាជរដ្ឋាភិបាលខ្មែរបង្កើនការគ្រប់គ្រងនិងត្រួតពិនិត្យលើប្រព័ន្ធឃោសនានៅក្នុងការបោះឆ្នោតជាតិកាលពីថ្ងៃ២៧ ខែកក្កដា ឆ្នាំ២០០៨ កន្លងមកនេះ។
សូមបញ្ជាក់ជូនថា ជារៀងរាល់ឆ្នាំ ក្រុមអ្នកសារព័ត៌មានគ្មានព្រំដែន ធ្វើការត្រួតពិនិត្យនិងតាមដានអំពីសេរីភាពសារព័ត៌មាននៅក្នុងបណ្តាប្រទេសជាច្រើនក្នុងពិភពលោក ហើយចំណាត់ថ្នាក់សេរីភាពសារព័ត៌មានឆ្នាំ២០០៨នេះ គឺចាប់ផ្តើមពីថ្ងៃ១ កញ្ញា ឆ្នាំ២០០៧ រហូតដល់ថ្ងៃ១ កញ្ញា ឆ្នាំ២០០៨។
ក្នុងតារាងចំណាត់ថ្នាក់សេរីភាពសារព័ត៌មាននៅឆ្នាំ២០០៨នេះ ប្រទេសថៃបានចំណាត់លេខ១២៤ ប្រទេសលាវលេខ ១៦៤ ប្រទេសចិនលេខ១៦៧ វៀតណាម លេខ១៦៨ និងប្រទេសភូមា លេខ១៧០៕