នៅក្នុងសេចក្តីជូនដំណឹងដែលវិទ្យុអាស៊ីសេរីទទួលបាននាថ្ងៃនេះ របស់ក្រសួងធនធានទឹកនិងឧតុនិយម ដែលចុះហត្ថលេខាដោយលោករដ្ឋមន្រ្តី លឹម គានហោ បានបញ្ជាក់ថា ការតាមដានអាកាសធាតុបានឲ្យដឹងថា នៅរសៀលថ្ងៃទី៣០ ខែកញ្ញា ឆ្នាំ២០០៨ មានព្យុះទី១៦ ឈ្មោះ មេខាឡា (MEKKHALA) បាននិងកំពុងមានឥទ្ធិពលលើតំបន់អាងទន្លេមេគង្គភាគខាងលើ។ លក្ខណៈបែបនេះបានបង្កឲ្យមានភ្លៀងធ្លាក់ខ្លាំងជាប់ៗគ្នា នៅប្រទេសថៃនិងប្រទេសលាវ ចាប់ពីថ្ងៃទី៣០ ខែកញ្ញា ដល់ថ្ងៃទី៣ ខែតុលា ឆ្នាំ២០០៨ ហើយព្យុះនេះ ក៏នឹងមានឥទ្ធិពលមកលើប្រទេសកម្ពុជាផងដែរ ដែលបណ្តាលឲ្យមានភ្លៀងផ្គរពីមធ្យមទៅច្រើននៅទូទាំងប្រទេស ជាពិសេសនៅតំបន់ខ្ពង់រាបនិងតំបន់វាលទំនាបភាគពាយ័ព្យ។
យោងតាមសេចក្តីជូនដំណឹងនោះដែរ ក៏បានប្រកាសដល់ប្រជាពលរដ្ឋនិងអាជ្ញាធរតាមបណ្តាខេត្តមួយចំនួនឲ្យមានការប្រុងប្រយ័ត្ន ដូចជាតំបន់ខ្ពង់រាប មានខេត្តរតនគិរី មណ្ឌលគិរី ស្ទឹងត្រែង ក្រចេះ ព្រះវិហារ និងឧត្តរមានជ័យ និងខេត្តនានានៅតំបន់ភាគពាយ័ព្យ រួមមានខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ ចំពោះជំនន់ទឹកភ្លៀង ហើយ នៅបណ្តាខេត្តតាមដងទន្លេមេគង្គ មានខេត្តស្ទឹងត្រែង ក្រចេះ និងកំពង់ចាម ក៏ត្រូវប្រុងប្រយ័ត្នផងដែរចំពោះទឹកជំនន់ទន្លេមេគង្គ។
នៅថ្ងៃនេះមិនអាចទាក់ទងលោក លឹម គានហោ និងមន្រ្តីនៃក្រសួងធនធានទឹកនិងឧតុនិយមដើម្បីបញ្ជាក់ច្បាស់លាស់អំពីឧបទ្វវហេតុហេតុនោះអាចនឹងកើតឡើងនាពេលណាទេ។
ទោះជាយ៉ាងណាក៏ដោយ លោក ញឹម វណ្ណដា អនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា ផ្នែករបស់លោកបានត្រៀមរួចស្រេចបាច់ហើយក្នុងការជួយសង្គ្រោះ បើមានបញ្ហាកើតឡើង ៖ «ត្រៀមរួចហើយពីមធ្យោបាយ សម្ភារៈ ហើយនិងធនធានមនុស្សហ្នឹង នៅខាងកងទ័ពក្ដី នៅខាងនគរបាលក្ដី អាជ្ញាធរក្ដី យើងបានត្រៀមរួចស្រេចហើយ។ ហើយមានទឹកជំនន់មក យើងប្រតិបត្តិការភ្លាម សំខាន់នៅតាមខេត្តដងទន្លេមេគង្គនិងខេត្តជុំវិញទន្លេសាប»។
លោក ញឹម វណ្ណដា ក៏បានឲ្យដឹងដែរថា រហូតមកទល់ពេលនេះ ប្រទេសកម្ពុជាមិនទាន់បានជួបបញ្ហាគ្រោះធម្មជាតិធ្ងន់ធ្ងរនៅឡើយទេ ទោះបីជាមានការជន់លិចផលដំណាំខ្លះៗនាពេលថ្មីៗនេះ តាមបណ្តាខេត្តខ្លះ ប៉ុន្តែមិនមានផលប៉ះពាល់អ្វីឡើយ ហើយបញ្ហានៃភាពរាំងស្ងួតនៅតាមបណ្ដាខេត្តមួយចំនួននៅពេលកន្លងទៅនេះ បានកន្លងផុតទៅហើយដែរ ហើយបានទទួលទឹកភ្លៀងគ្រប់គ្រាន់ជាទូទៅ៕