នេះបើតាមប្រសាសន៍លោកនាយករដ្ឋមន្ត្រី ហ៊ុន សែន ក្នុងពិធីចែកសញ្ញាបត្រជូនដល់និស្សិតសាកលវិទ្យាល័យអន្តរជាតិដែលប្រារព្ធធ្វើនៅវិទ្យាស្ថានជាតិអប់រំ កាលពីព្រឹកមិញនេះ ៖ «ខ្ញុំទើបបានសម្រេចចិត្តពីអាទិត្យមុននេះ បញ្ជូនកងទ័ពទៅប្រទេសឆាដ និងទៅប្រទេសអាហ្វ្រិកកណ្ដាល ទើបនឹងសម្រេចបញ្ជូនកងទ័ពទៅពីរប្រទេសទៀត។ ឥឡូវកងទ័ពយើងនៅប្រទេសស៊ូដង់ហើយ យើងបញ្ជូនទៅប្រទេសឆាដនិងអាហ្រ្វិកកណ្ដាលទៀតតាមសំណូមពររបស់អគ្គលេខាធិការអង្គការសហប្រជាជាតិនិងអគ្គលេខាធិការហ្រ្វង់កូហ្វូនី គឺអគ្គលេខាធិការក្រុមប្រទេសនិយាយភាសាបារាំង»។
លោកនាយករដ្ឋមន្ត្រីខ្មែរពុំបានបញ្ជាក់ផងទេ អំពីចំនួនទ័ពដែលនឹងបញ្ជូនទៅនោះ និងក៏ពុំបានប្រាប់ផងដែរ ថានឹងបញ្ជូនទៅពេលណា។
កាលពីខែមេសា ឆ្នាំ២០០៦ កម្ពុជាបានបញ្ជូនយោធា១៣៥នាក់ទៅជួយកងកម្លាំងរក្សាសន្តិភាពអ.ស.ប.ធ្វើការដោះមីននៅប្រទេសស៊ូដង់៕