លោក ថោង ខុន រដ្ឋមន្ត្រីក្រសួងទេសចរណ៍ ថ្លែងថា ការទទួលស្គាល់ឆ្នេរសមុទ្ទកម្ពុជា ជាឆ្នេរសមុទ្ទល្អជាងគេបំផុតក្នុងពិភពលោកនេះ នឹងជំរុញឲ្យមានចំនួនភ្ញៀវទេសចរកាន់តែច្រើនឡើងៗ មកទស្សនាប្រទេសកម្ពុជា។
លោករដ្ឋមន្ត្រីក្រសួងទេសចរណ៍ ថោង ខុន មានប្រសាសន៍តាមទូរស័ព្ទ នៅថ្ងៃអង្គារទី ៣១ ឧសភានេះថា ការទទួលស្គាល់ជាផ្លូវការរបស់ឆ្នេរសមុទ្ទកម្ពុជា គឺអាស្រ័យទៅលើកត្តារួមផ្សំជាច្រើន ក្នុងនោះមានគុណភាពខ្សាច់ ធនធានមច្ឆា ផ្កាថ្មនៅក្នុងទឹក និងបរិស្ថាននៅជុំវិញ ដែលមានទេសភាពល្អត្រកាល។
លោក ថោង ខុន ៖ «ឆ្នេររបស់យើងល្អ អ្នកណាឃើញក៏សរសើរ ទឹកថ្លាល្អ ឆ្នេរខ្សាច់ និងកោះក៏ស្អាត និយាយរួម គឺយើងមានអ្វីៗ ល្អទាំងអស់។ យើងបានការពារបានល្អ បានហ្មត់ចត់ យើងធ្វើការរួមគ្នាជាមួយក្រសួងពាក់ព័ន្ធបរិស្ថាន ក្រសួងកសិកម្មអាជ្ញាធរដែនដី នៅក្នុងកម្រិតមួយ ដែលគេមើលឃើញ និងទទួលស្គាល់ថា បានរួមគ្នាធ្វើការបានល្អ»។
កាលពីខែឧសភា ឆ្នាំ ២០១០ ក្រសួងទេសចរណ៍ ដោយមានសហការរួមពីក្រសួងពាក់ព័ន្ធមួយចំនួន បានធ្វើសំណុំបែបបទសុំដាក់បញ្ចូលឆ្នេរសមុទ្ទកម្ពុជា ដែលមានប្រវែង ៤៥០ គីឡូម៉ែត្រ លាតសន្ធឹងតាមខេត្តចំនួន ៤ មានកោះកុង ខេត្តព្រះសីហនុ កំពត និងខេត្តកែប ដើម្បីចូលជាសមាជិកក្នុងក្លឹបឆ្នេរ សមុទ្ទល្អជាង គេបំផុតក្នុងពិភពលោក «ការពិសោធន៍ប្រទេសនីមួយៗ កាលណាគេទទួលស្គាល់ហើយ ក្លឹបគេជួយផ្សព្វផ្សាយឲ្យបានច្រើនថែមទៀត។ គេមិនត្រឹមតែចែករំលែក និងផ្លាស់ប្ដូរបទពិសោធន៍ ដើម្បីគ្រប់គ្រង រក្សាឆ្នេរឲ្យបានល្អ ហើយម្យ៉ាងគេមានឡូហ្គោ (រូបសញ្ញា) របស់គេ។ កាលណាយើងជាសមាជិកអញ្ចឹង គេអត់សង្ស័យទេក្នុងការមកលេង។ មានប្រយោជន៍ល្អណាស់ សម្រាប់ទាក់ទាញភ្ញៀវទេសចរ»។
ក្លឹបឆ្នេរសមុទ្ទល្អបំផុតក្នុងពិភពលោកនេះ បានបង្កើតឡើងដំបូង កាលពីខែមីនា ឆ្នាំ ១៩៩៧ នៅក្រុងប៊ែរឡាំង (Berlin) ប្រទេសអាល្លឺម៉ង់ ហើយបច្ចុប្បន្ននេះ បានទទួលស្គាល់ឆ្នេរសមុទ្ទចំនួន ៣៣ កន្លែង នៅក្នុងប្រទេស ដែលជាសមាជិកចំនួន ២៧ ប្រទេស។ នៅចំនួន ២៧ ប្រទេសនោះ គឺរាប់បញ្ចូលទាំងប្រទេសកម្ពុជា ដែលទើបបានចូលជាសមាជិកថ្មីៗ នេះផងដែរ។
ទាក់ទងនឹងវិស័យទេសចរណ៍នៅកម្ពុជានេះ លោក ហូ វ៉ាន់ឌី សហប្រធានក្រុមការងារទេសចរណ៍វិស័យឯកជន និងជាប្រធានគណៈកម្មាធិការអចិន្ត្រៃយ៍នៃសមាគមទេសចរណ៍ មានប្រសាសន៍ថា នៅក្នុងប្រទេសកម្ពុជា មានតំបន់ទេសចរណ៍ល្អៗ ជាច្រើន ដែលទាក់ទាញភ្ញៀវទេសចរបរទេស។
លោក ហូ វ៉ាន់ឌី ៖ «ទី១ ពាក់ព័ន្ធវប្បធម៌ ទី២ គឺធម្មជាតិ។ ភ្ញៀវទេសចរបរទេស ដែលមកលេងកម្ពុជា ចង់ទៅលេងខានមិនបាននោះ គឺប្រាង្គប្រាសាទ នៅខេត្តសៀមរាប ហើយបច្ចុប្បន្ននេះ រដ្ឋាភិបាលកម្ពុជា មានទិសដៅផ្សព្វផ្សាយ និងទាក់ទាញ ៤ ចំណុច ទី១ រាជធានីភ្នំពេញ ទី២ តំបន់អង្គរ ទី៣ គឺតំបន់ឆ្នេរ និងទី៤ គឺនៅតំបន់ ឦសានប្រទេស»។
លោក ហូ វ៉ាន់ឌី ថ្លែងបន្តថា ប្រការដែលឆ្នេរសមុទ្ទកម្ពុជា ត្រូវបានទទួលស្គាល់ថា ជាឆ្នេរសមុទ្ទល្អជាងគេបំផុតក្នុងពិភពលោក គឺផ្ដល់ផលប្រយោជន៍ច្រើនណាស់សម្រាប់ប្រទេសកម្ពុជា ជាពិសេស គឺអាចជួយលើកស្ទួយជីវភាពរស់ នៅរបស់ប្រជាពលរដ្ឋ នៅតំបន់ទាំងនោះផងដែរ៖ «កម្ពុជានឹងមានឱកាសច្រើន ដូចជាផ្នែកអាកាសចរណ៍ ក៏បានកម្រៃច្រើន។ មានការកើននូវអ្នកវិនិយោគទុនផ្នែកសណ្ឋាគារ ផ្នែកដឹកជញ្ជូន អាហារដ្ឋាន ភោជនីយដ្ឋានហើយ ប្រជាពលរដ្ឋ នៅតំបន់ឆ្នេរសមុទ្ទនោះ ក៏អាចរកប្រាក់ចំណូលបានច្រើនជួយក្នុងជីវភាពគ្រួសារ ហើយរដ្ឋាភិបាលក៏បានប្រយោជន៍ច្រើនណាស់»។
វិស័យទេសចរណ៍ គឺជាវិស័យមួយក្នុងចំណោម វិស័យធំៗ បួន ដែលទ្រទ្រង់ សេដ្ឋកិច្ចកម្ពុជា ក្នុងនោះមានវិស័យឧស្សាហកម្មកាត់ដេរ ទេសចរណ៍ កសិកម្ម និងសំណង់។ ប៉ុន្តែ ក្នុងអំឡុងឆ្នាំ ២០១០ វិស័យឧស្សាហកម្មកាត់ដេរបានថយចុះ ដោយសារតែវិបត្តិសេដ្ឋកិច្ចពិភពលោក។ ក៏ប៉ុន្តែ វិស័យទេសចរណ៍វិញ គឺមានអត្រាកើនឡើងច្រើនជាងឆ្នាំមុនៗ ដែលមានចំនួនភ្ញៀវទេសចរបរទេស ចំនួន ២ លាន ៥ សែននាក់ មកទស្សនាកម្ពុជា និងនាំប្រាក់ចំណូល បានជិត ២ ពាន់លានដុល្លារអាមេរិក៕