បើទោះជាយ៉ាងណា អង្គការមិនមែនរដ្ឋាភិបាល និងអ្នកផ្ទុកមេរោគអេដស៍ បារម្ភថាកង្វះថវិកានឹងធ្វើអោយគោលដៅនេះបរាជ័យ។
អង្គការមិនមែនរដ្ឋាភិបាល និងអ្នករស់នៅជាមួយមេរោគអេដស៍ ស្នើរដ្ឋាភិបាល និងអង្គការដៃគូពាក់ព័ន្ធ បន្តគាំទ្រផ្នែកថវិកាក្នុងការប្រយុទ្ធប្រឆាំងនឹងជំងឺអេដស៍ បើពុំនោះសោត កម្ពុជា នឹងពុំអាចសម្រេចគោលដៅពាក់ព័ន្ធនឹងមេរោគអេដស៍ និងជំងឺអេដស៍ នៅត្រឹមឆ្នាំ២០២០ បានឡើយ។
ការព្រមានបែបនេះ បានធ្វើឡើងនៅព្រឹកថ្ងៃទី១ ខែធ្នូ ដែលជាថ្ងៃប្រារព្ធទិវាពិភពលោកប្រយុទ្ធនឹងជំងឺអេដស៍។
តំណាងអង្គការមិនមែនរដ្ឋាភិបាល និងជាប្រធានគណៈកម្មាធិការសម្របសម្រួលប្រយុទ្ធនឹងជំងឺអេដស៍ លោក ភោគ ប៊ុនរឿន មានប្រសាសន៍ថា នៅប៉ុន្មានឆ្នាំចុងក្រោយនេះ ថវិកាសម្រាប់ប្រយុទ្ធប្រឆាំងជំងឺអេដស៍ ត្រូវកាត់បន្ថយបណ្ដើរៗ ដែលការកាត់បន្ថយនេះអាចនឹងប៉ះពាល់ទៅដល់ដំណើរឆ្ពោះទៅបញ្ចប់ការរីករាលដាលនៃជំងឺនេះ។
តំណាងបណ្ដាញអ្នកផ្ទុកមេរោគអេដស៍ និងជំងឺអេដស៍ មកពីស្រុកកណ្ដាលស្ទឹង ខេត្តកណ្ដាល អ្នកស្រី អ៊ុក ម៉ាច បានស្នើឡើងថា ដើម្បីសម្រេចគោលដៅលែងមានអ្នកស្លាប់ដោយសារជំងឺអេដស៍ ការយកចិត្តទុកដាក់ចំពោះសេវាផ្ដល់កិច្ចការពារសុខភាពអ្នកផ្ទុកមេរោគអេដស៍ គឺជាកត្តាចម្បងមួយ។
របាយការណ៍របស់អង្គការមិនមែនរដ្ឋាភិបាល អោយដឹងថា ថវិកាសម្រាប់ប្រយុទ្ធនឹងជំងឺអេដស៍ភាគច្រើន បានមកពីជំនួយដៃគូអភិវឌ្ឍន៍។ ក្នុងនោះជាង ៩៦% បានពីប្រភពដៃគូអន្តរជាតិ មានដូចជា មូលនិធិសកល ទីភ្នាក់ងារអភិវឌ្ឍន៍ផ្សេងទៀត ចំណែកថវិកាពីរដ្ឋាភិបាល គឺជិត ៤%។ របាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍ និងកាមរោគ អោយដឹងដែរថា ក្នុង១ឆ្នាំៗ កម្ពុជា ត្រូវការថវិកាពី ៦០ ទៅ ៦៥លានដុល្លារ សម្រាប់សកម្មភាពពាក់ព័ន្ធនឹងមេរោគអេដស៍ និងជំងឺអេដស៍។
ឆ្លើយតបនឹងការស្នើនេះ ឧបនាយករដ្ឋមន្ត្រីប្រចាំការ អ្នកស្រី ម៉ែន សំអន មានប្រសាសន៍ថា នឹងនាំកង្វល់របស់អង្គការមិនមែនរដ្ឋាភិបាល និងពលរដ្ឋ ទៅប្រមុខរដ្ឋាភិបាល។
ចំណែកអ្នកសម្របសម្រួលកម្មវិធីប្រយុទ្ធនឹងជំងឺអេដស៍របស់អង្គការសហប្រជាជាតិ អ្នកស្រី ម៉ារី អូឌីល អេម៉ុង (Marie-Odile Emnond) មានប្រសាសន៍ថា អង្គការសហប្រជាជាតិនៅតែមានឆន្ទៈបន្តគាំទ្រកម្ពុជា។ ប៉ុន្តែក្នុងស្ថានភាពដែលពិភពលោកកំពុងជួបបញ្ហាផ្នែកថវិកា កម្ពុជា ក៏ចាំបាច់ត្រូវបង្ហាញពីការប្រើប្រាស់ថវិកាចំគោលដៅ និងពង្រឹងនិរន្តរភាព។
កម្ពុជា ត្រូវចាត់ទុកជាប្រទេសដែលជោគជ័យក្នុងការកាត់បន្ថយអត្រាឆ្លងមេរោគអេដស៍ និងជំងឺអេដស៍ ក្នុងចំណោមមនុស្សពេញវ័យពី ២% ក្នុងឆ្នាំ១៩៩៨ មកត្រឹម 0,៧% នៅឆ្នាំ២០១១។ ជំហានបន្ទាប់ កម្ពុជា មានគ្រោងថានឹងបញ្ឈប់លែងអោយមានករណីចម្លងមេរោគអេដស៍ពីម្ដាយទៅកូននៅត្រឹមឆ្នាំ២០១៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។