កម្ពុជាផ្ញើលិខិតផ្លូវការទៅតុលាការអន្តរជាតិក្រុងឡាអេ ស្ដីពីជម្លោះព្រំដែន
h070412ho.mp3
ថ្មីៗនេះ ទាហានឈុតខ្មៅថៃ នៅតែបង្កសកម្មភាពដែលងាយឲ្យមានជម្លោះនៅតំបន់ព្រំដែននៃប្រទេសទាំងពីរជាបន្តបន្ទាប់។ មន្ត្រីជាន់ខ្ពស់កម្ពុជា បានហៅសកម្មភាពរបស់ទាហានឈុតខ្មៅថៃនៅតំបន់ព្រំដែននោះថា ជាទង្វើផ្ទុយនឹងសេចក្តីសម្រេចរបស់តុលាការអន្តរជាតិក្រុងឡាអេ (ICJ)។
ក្រសួងការបរទេសកម្ពុជាផ្ញើលិខិតជាផ្លូវការទៅតុលាការអន្តរជាតិក្រុងឡាអេ និងស្ថានទូតថៃប្រចាំនៅកម្ពុជា នៅថ្ងៃពុធ ទី០៤ កក្កដា ស្តីពីការរំលោភបំពានរបស់កងទ័ពថៃទៅលើតំបន់ដែលកំណត់ថា គ្មានកងទ័ពនៅក្បែរប្រាសាទព្រះវិហារ។
តំបន់ដែលគ្មានកងទ័ពនោះ កំណត់ដោយតុលាការអន្តរជាតិក្រុងឡាអេ កាលពីថ្ងៃទី១៨ កក្កដា ឆ្នាំ២០១១ កន្លងទៅ ដោយមានកិច្ចព្រមព្រៀងពីភាគីទាំងពីរផង។
វិទ្យុអាស៊ីសេរី ពុំអាចទាក់ទងមន្ត្រីអ្នកនាំពាក្យ នៃក្រសួងការបរទេស លោក កុយ គួង ដើម្បីសុំការបញ្ជាក់បន្ថែមលើខ្លឹមសារលិខិតនេះបានទេ នៅថ្ងៃពុធទី០៤ កក្កដា។
ប៉ុន្តែ លោក ផៃ ស៊ីផាន រដ្ឋលេខាធិការនៃទីស្ដីការគណៈរដ្ឋមន្ត្រី និងជាអ្នកនាំពាក្យ លោកមានប្រសាសន៍ពន្យល់ថា ការផ្ញើលិខិតដែលបង្ហាញពីការរំលោភបំពានរបស់ភាគីថៃ មកលើតំបន់ដែលគ្មានកងទ័ពនោះ ជាការបង្ហាញនូវភាពអត់ធ្មត់របស់កម្ពុជា ដែលមិនតបតជាមួយភាគីថៃ ដោយប្រដាប់អាវុធ ដោយគោរពទៅតាមច្បាប់អន្តជាតិ និងដើម្បីរង់ចាំការបកស្រាយសាលដីការបស់តុលាការអន្តរជាតិក្រុងឡាអេ លើករណីប្រាសាទព្រះវិហារ។
សារលិខិតរបស់ក្រសួងការបរទេសកម្ពុជា បានបង្ហាញសកម្មភាពរំលោភបំពានរបស់ទាហានឈុតខ្មៅថៃ ចំនួន៥ចំណុច។ ទីមួយ កាលពីថ្ងៃទី២៣ ខែមិថុនា ឆ្នាំ២០១២ ទាហានឈុតខ្មៅថៃបានព្យាយាមដាក់ខ្សែលួសបន្លាបន្ថែមទៀត នៅតំបន់ហាមឃាត់ នៅត្រង់ចំណុចខ្សែបន្ទាត់កូអរដោនេ (Coordinate) VA៦៥៩-៩១៨ ស្ថិតនៅខាងជើងច្រកចូលប្រាសាទព្រះវិហារ។
លើកទីពីរ នៅថ្ងៃទី២៤ មិថុនា ទាហានឈុតខ្មៅថៃដដែល បានដឹកបន្លាលួសមួយឡានមកទៀត មកដាក់នៅចំណុច កូអរដោនេ VA៦៦៤-៩១៧ បន្តទៀត។
ទីបី នៅថ្ងៃទី២៥ មិថុនា ទាហានថៃបានទម្លាក់ខ្សែលួសបន្លាចំនួន ៤ ទៅ ៥ដុំ នៅចំណុចខ្សែកូអរដោនេ VA៦៥៩-៩១៨ ស្ថិតនៅខាងជើងច្រកចូលប្រាសាទព្រះវិហារម្តងទៀត។
ទីបួន នៅថ្ងៃទី២៦ មិថុនា មានករណីផ្ទុះគ្រាប់កាំភ្លើងមួយគ្រាប់ ចេញពីបន្ទាយទាហានថៃ នៅម្តុំខ្សែបន្ទាត់ កូអរដោនេ VA៦៣៤-៩២៥ ក្រោយការផ្ទុះអាវុធលើកទីមួយបានប្រមាណ៥នាទី មានការផ្ទុះអាវុធម្តងទៀត នៅម្តុំខ្សែបន្ទាត់ កូអរដោនេ VA៦៣០-៩២៦ ម្តងទៀត។
ទីប្រាំ នៅថ្ងៃទី៣០ មិថុនា ទាហានឈុតខ្មៅថៃដដែល នៅតែបន្តរាយខ្សែលួសបន្ថែមទៀត នៅត្រង់ខ្សែបន្ទាត់ កូអរដោនេ VA៦៥៩-៩១៨ បន្តទៀត។
លោក បណ្ឌិត សុខទូច អ្នកវិភាគឯករាជ្យ បានគាំទ្រចំពោះរដ្ឋាភិបាលកម្ពុជា ដែលបានផ្ញើសារបង្ហាញទៅដល់ពិភពលោក ជាពិសេស តុលាការអន្តរជាតិក្រុងឡាអេ ដើម្បីឲ្យគេបានដឹងពីពុតត្បុតរបស់ថៃ ដែលមិនគោរពច្បាប់ មិនទទួលខុសត្រូវនូវអ្វីដែលបានធ្វើ ឬបានព្រមព្រៀងកន្លងមក។
ខ្លឹមសារនៅក្នុងលិខិតដែលក្រសួងការបរទេសកម្ពុជាផ្ញើទៅតុលាការអន្តរជាតិក្រុងឡាអេ បញ្ជាក់ដែរថា សកម្មភាពរបស់ថៃទាំងនោះ កម្ពុជាតែងតែមានប្រតិកម្មជំទាស់រហូត ដោយសកម្មភាពនោះ បានប្រព្រឹត្តិផ្ទុយនឹងស្មារតីរបស់តុលាការអន្តរជាតិក្រុងឡាអេ ដែលបានចេញបទបញ្ជាកាលពីថៃទី១៨ ខែកក្កដា ឆ្នាំ២០១១ តាមសំណើរបស់ភាគីកម្ពុជា ដែលសុំឲ្យបញ្ឈប់សកម្មភាពទាំងឡាយណា ដែលនាំឲ្យបង្កជម្លោះជាបន្ទាន់ ដើម្បីកុំឲ្យមានជម្លោះតានតឹងដាក់គ្នាបន្តទៀត និងនាំឲ្យប៉ះពាល់ដល់បរិយាកាសក្នុងការអនុវត្តតាមបទបញ្ជាតុលាការអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
Cambodia has no ability to solve the problem with thailan who is a rich and a powerful country.
Jul 05, 2012 05:46 AM
អ្នកអានអនាមិក
almost one year since 18 July 2011, ICJ demanded both countries to withdraw their soldiers from Preah Vihear Area. but nothing has been conducted correctly. Cambodi tries to do the best, but Thai just delays from time to time. my question is that "does the ICJ have any power to Thailand who not respect the law? if one of the two countries delays or not respect/follow the ICJ's demand, any pressure to them?
Jul 05, 2012 02:14 AM
sokleng
ពី Takeoរដ្ឋាភិបាលបរាជ័យលើការដោះស្រាយបញ្ហាជាមួយប្រទេលជិតខាង។ យើងមិនដែលមិនដែលប្រើវិធានការក្តៅ ដោយបិទច្រកព្រំដែនម្តងណាឡើយ។
Jul 05, 2012 12:04 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
