លំហាត់យោពហុសាសន៍ នៅប្រទេសម៉ុងហ្គោលី ដែលកម្ពុជានឹងចូលរួមនេះ មានរយៈពេលជាង ១០ ថ្ងៃ គឺចាប់ថ្ងៃទី ២៩ ខែកក្កដា ដល់ថ្ងៃទី ១៣ ខែសីហា ឆ្នាំ ២០១១។
ការបញ្ជូនទាហានកម្ពុជានេះ គឺធ្វើតាមសំណើរបស់អង្គការសហប្រជាជាតិ ដើម្បីជាផ្នែកមួយនៃការរក្សាសន្តិភាពក្នុងតំបន់ និងលើពិភពលោក។
ទាហានកម្ពុជា នឹងចេញដំណើរនៅវេលាម៉ោង ៨ ព្រឹក ថ្ងៃទី ២៩ ខែកក្កដា ឆ្នាំ ២០១១។
អ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាត មានប្រសាសន៍នៅថ្ងៃទី ២៨ ខែកក្កដា ឆ្នាំ ២០១១ ថា ការហ្វឹកហាត់នេះ មានសារៈសំខាន់ដល់កងយោធពលខេមរភូមិន្ទកម្ពុជា ក្នុងវិស័យរក្សាសន្តិភាព។
លោកឧត្ដមសេនីយ៍ឯក ឈុំ សុជាត ៖ «វាបង្ហាញនូវកិច្ចសហប្រតិបត្តិការរវាងបណ្ដាប្រទេសក្នុងតំបន់ ក្រោមឆត្រអង្គការសហប្រជាជាតិ ដើម្បីរក្សាសន្តិភាព»។
ប្រភពពីលោកឧត្ដមសេនីយ៍ឯក ឈុំ សុជាតិ មានប្រសាសន៍ថា ក្រសួងការពារជាតិកម្ពុជា បានបញ្ជូនកងទ័ពទៅចូលរួមហ្វឹកហាត់យោធាពហុសាសន៍ ដើម្បីរក្សាសន្តិភាពនោះ ចំនួន ៦ លើករួចមកហើយ ចាប់តាំងពីឆ្នាំ ២០០៧ កន្លងមក។
ប្រទេសដែលចូលរួមមានប្រទេសកម្ពុជា សហរដ្ឋអាមេរិក កាណាដា ឥណ្ឌា ចិន ជប៉ុន សិង្ហបុរី ថៃ រុស្ស៊ី និងវៀតណាម៕