មានប្រសាសន៍ទៅកាន់អ្នកសារព័ត៌មាននៅឯទីស្តីការក្រសួងការបរទេសខ្មែរ នៅព្រឹកថ្ងៃព្រហស្បតិ៍ ទី១៨ មិថុនានេះ លោក ហ៊ុន សែន បានបញ្ជាក់ថា ៖ «ខ្ញុំគិតថា នេះជាពាក្យពេចន៍នៃខ្លួនគាត់ក្នុងឋានៈជានាយករដ្ឋមន្ត្រីនៃប្រទេសមួយ ដែលរំខានទៅដល់អធិបតេយ្យនៃប្រទេសមួយទៀត»។
នាយករដ្ឋមន្ត្រីថៃ លោក អាក់ភិស៊ិត វេតឆាឈីវ៉ាក់ បានថ្លែងចំពោះមុខក្រុមអ្នកកាសែតកាលពីថ្ងៃពុធនេះថា រដ្ឋាភិបាលថៃនឹងស្នើសុំឲ្យគណៈកម្មាធិការនៃអង្គការយូណេស្កូ ដើម្បីពិនិត្យឡើងវិញ នៅក្នុងកិច្ចប្រជុំលើកទី៣៣នៅប្រទេសអេស្ប៉ាញ ចាប់ពីថ្ងៃទី២២ ដល់ថ្ងៃ៣០ ខែមិថុនាខាងមុខនេះ ចំពោះការសម្រេចដាក់ប្រាសាទព្រះវិហារជាបេតិកភណ្ឌពិភពលោក។
លោកនាយករដ្ឋមន្ត្រីថៃ ថ្លែងយ៉ាងដូច្នេះថា ៖ «យូណេស្កូ គឺជាអង្គការមួយដែលបង្កើតឡើងដើម្បីជំរុញឲ្យមានសន្តិភាព។ យើងឃើញថា មុនពេលដែលមានគំនិតចង់ដាក់បញ្ចូលប្រាសាទព្រះវិហារជាបេតិកភណ្ឌពិភពលោក បញ្ហាតូចតាចតែងតែកើតមានឡើងនៅតំបន់ប្រាសាទព្រះវិហារ ប៉ុន្តែពុំធ្ងន់ធ្ងរឡើយ។ ផ្ទុយទៅវិញ ឥឡូវនេះគំនិតប្រហាក់ប្រហែលគ្នានោះ បែរជានាំមកឲ្យយើងនូវការបាត់បង់និងខូចខាត។ ដូច្នេះហើយ យើងចង់ស្នើសុំឲ្យអង្គការ យូណេស្កូ ពិនិត្យឡើងវិញនូវគោលការណ៍ស្ថាបនារបស់ខ្លួន ព្រមទាំងវាយតម្លៃថាតើជម្លោះដែលកើតឡើងជុំវិញប្រាសាទព្រះវិហារនេះវាផ្ទុយនឹងគោលការណ៍នេះដែរឬទេ?»។
ទោះជាយ៉ាងណាក៏ដោយ នៅថ្ងៃព្រហសត្បិ៍នេះ លោកនាយករដ្ឋមន្រ្តី ហ៊ុន សែន បានមានប្រសាសន៍ចំពោះបញ្ហានេះថា ៖ «ប៉ុន្តែខ្ញុំគិតថា គោលបំណងរបស់គាត់នេះមិនសម្រេចជោគជ័យទេ។ បញ្ហាដំបូងត្រូវចាប់ផ្ដើមនិយាយអំពីសាលក្រមតុលាការឡាអេ ដែលបានកាត់ប្រាសាទព្រះវិហារនិងដែនដីជុំវិញមកឲ្យកម្ពុជា។ នេះជាចំណុចទី១ ឯចំណុចទី២ អង្គការយូណេស្កូ ក្នុងក្របខ័ណ្ឌបេតិកភណ្ឌពិភពលោក បានបញ្ចូលប្រាសាទព្រះវិហារទៅជាបេតិកភណ្ឌពិភពលោករបស់កម្ពុជារួចទៅហើយ»។
គួរបញ្ជាក់ថា ជម្លោះស្តីពីប្រាសាទព្រះវិហារនេះបានរីករាលដាលធំក្រោយពីអង្គការយូណេស្កូបានដាក់ប្រាសាទនេះជាមរតកពិភពលោកកាលពីខែកក្កដាឆ្នាំ២០០៨កន្លងទៅ។ កងទ័ពថៃត្រូវបានគេចោទប្រកាន់ថា បានចូលលុកលុយក្នុងតំបន់នោះ ទោះបីជាមានការសម្រេចពីតុលាការអន្តរជាតិក្រុងឡាអេកាលពីខែមិថុនា ឆ្នាំ១៩៦២ និងសន្ធិសញ្ញាផ្សេងៗទៀត បានកំណត់ថា ប្រាសាទព្រះវិហារជាសម្បត្តិរបស់ខ្មែរក៏ដោយ។
ប្រទេសកម្ពុជានិងថៃនៅតែមានជម្លោះលើតំបន់ជុំវិញប្រាសាទព្រះវិហារ ដែលមិនទាន់មានការបោះបង្គោលព្រំសីមាច្បាស់លាស់នោះ៕