ក្នុងចំណោមគណបក្ស ៥ មានគណបក្ស "ខ្មែរឈប់ក្រ" គណបក្ស "ចលនាប្រជាធិបតេយ្យ" គណបក្ស "សញ្ជាតិកម្ពុជា" គណបក្ស "សម្ព័ន្ធប្រជាធិបតេយ្យ" និងគណបក្ស "សាធារណរដ្ឋប្រជាធិបតេយ្យ" បានធ្វើការឃោសនាបោះឆ្នោតដោយថវិកាភាគច្រើនបានមកពីការចូលរួមពីសមាជិកគណបក្សរបស់ខ្លួននៅតាមឃុំនីមួយៗ។
តាមការប៉ាន់ស្មាននៃការចំណាយលើការឃោសនាបោះឆ្នោតឃុំសង្កាត់នេះនៃគណបក្សទាំង ៥ នេះ មានចន្លោះប្រមាណពី ៧ពាន់ដុល្លារ ទៅ ៣ម៉ឺនដុល្លារអាមេរិក។
គណបក្សនយោបាយទាំងអស់កំពុងធ្វើការឃោសនាបោះឆ្នោតរកសំឡេងគាំទ្ររៀងខ្លួន ដោយប្រើមធ្យោបាយជាច្រើន ដូចជាការផ្សព្វផ្សាយតាមមូលដ្ឋានផ្ទាល់ ការចែកខិត្តប័ណ្ណ និងការឃោសនាតាមប្រព័ន្ធឧគ្ឃោសនស័ព្ទ តាមឡាន ម៉ូតូ ជាដើម។ ការឃោសនារបស់គណបក្សនីមួយៗបានត្រៀមថវិកាចំណាយជាច្រើន ដើម្បីទទួលបានសំឡេងពីអ្នកគាំទ្រតាមមូលដ្ឋានទាំងនោះ។
អនុប្រធានគណបក្សសាធារណរដ្ឋប្រជាធិបតេយ្យ លោក ចាន់ យ៉េត មានប្រសាសន៍ថា គណបក្សបានត្រៀមចំណាយលុយប្រមាណ ៣ម៉ឺនដុល្លារសម្រាប់ការឃោសនាបោះឆ្នោតឃុំសង្កាត់ចំនួន ៩ឃុំ នៅទូទាំងប្រទេស។ លោកបន្តថា សមាជិកដែលចូលរួមធ្វើការឃោសនានោះ គណបក្សលោកមិនមែនឲ្យថវិកាអ្វីទេ ប៉ុន្តែគណបក្សចំណាយលើខិត្តប័ណ្ណដើម្បីផ្សព្វផ្សាយពីគោលការណ៍របស់គណបក្ស។ លោកបញ្ជាក់ថា ក្នុងមួយឃុំនឹងធ្វើការឃោសនាឲ្យបានយ៉ាងហោចណាស់បីដង។
លោក ចាន់ យ៉េតមានប្រសាសន៍បន្ថែមថា គណបក្សបានបង្កើតនៅខែវិច្ឆិកា ឆ្នាំ២០១១ ហើយការចំណាយទាំងអស់ គឺបានមកពីការចូលរួមពីសមាជិក ប្រធានគណបក្ស និងប្រភពពីក្រៅប្រទេសជាដើម ដែលមានបំណងជួយលើកកម្ពស់ស្ត្រី និងកុមារកំព្រា។
អគ្គលេខាធិការនៃគណបក្សខ្មែរឈប់ក្រ លោក ស៊ិន វណ្ណារិទ្ធ បានឲ្យដឹងថា គណបក្សបានត្រៀមចំណាយលើការឃោសនាបោះឆ្នោតឃុំសង្កាត់ថវិកាប្រមាណ ៧ពាន់ដុល្លារអាមេរិក លើ ២៤ឃុំសង្កាត់ នៅចំនួន ១០ខេត្តក្រុងទូទាំងប្រទេស ដែលបានមកពីអ្នកទ្រទ្រង់គណបក្សផ្ទាល់។
លោក វណ្ណារិទ្ធ បន្តថា ថវិកានេះគឺសម្រាប់ចំណាយលើដំណើរការឃោសនាទាំងស្រុង ទាក់ទងនឹងឧបករណ៍ និងសម្ភារផ្សេងៗ។
លោក ស៊ិន វណ្ណារិទ្ធ មានប្រសាសន៍បន្ថែមថា គណបក្សខ្មែរឈប់ក្រ មានយុទ្ធសាស្ត្របីសម្រាប់ធ្វើការឃោសនាបោះឆ្នោតឃុំសង្កាត់ គឺទីមួយការហែជាក្រុមតូចដែលមានការចូលរួមពីសមាជិកទាំងអស់ប្រមាណ ៣០នាក់ ទៅ ៥០នាក់ ទីពីរគឺចុះចែកខិត្តប័ណ្ណតាមផ្ទះ និងយុទ្ធសាស្ត្រទីបី គឺផ្សព្វផ្សាយតាមមីក្រូនៅតាមស្នាក់ការឃុំរបស់គណបក្សផ្ទាល់តែម្ដង។
អគ្គលេខាធិការនៃគណបក្សសម្ព័ន្ធដើម្បីប្រជាធិបតេយ្យ លោក អោក វ៉េត បានឲ្យដឹងថា ការចំណាយទាក់ទងនឹងការបោះឆ្នោតឃុំសង្កាត់នីមួយៗ មិនទាន់បានស្មានថា ចំណាយអស់ប៉ុន្មាននៅឡើយទេ ដោយលោកពន្យល់ថា គណបក្សនេះគឺជាការចូលរួមរបស់ប្រជាពលរដ្ឋទូទៅទាក់ទងនឹងដំណើរការឃោសនានៅតាមឃុំទាំងនោះ។
លោកបញ្ជាក់ថា គណបក្សសម្ពន្ធប្រជាធិបតេយ្យ មានបេក្ខជនឈឈ្មោះចំនួន ១៦៤ឃុំសង្កាត់នៅ ១៧ខេត្តក្រុង។
ទោះជាយ៉ាងណាក៏ដោយ លោក អោក វ៉េត មានប្រសាសន៍បន្តថា ការចំណាយលើទីស្នាក់ការកណ្ដាលរបស់គណបក្សគឺមានចំនួនប្រមាណ ៧ពាន់ ទៅ ៨ពាន់ដុល្លារអាមេរិកលើកការឃោសនាបោះឆ្នោតឃុំសង្កាត់នេះ។
ប្រធានគណបក្សសញ្ជាតិកម្ពុជា លោក សេង សុខេង បានឲ្យដឹងថា ការចំណាយលើការឃោសនាបោះឆ្នោតឃុំសង្កាត់នេះ គឺថវិកាទាំងអស់ត្រូវបានចំណាយដោយផ្ទាល់របស់សមាជិក ឬសកម្មជនរបស់គណបក្ស។ លោកបន្តថា គណបក្សមានចំនួនបេក្ខភាពឈរឈ្មោះនៅឃុំសង្កាត់ចំនួន ២២៥ឃុំសង្កាត់ នៅ ១១ខេត្តក្រុងទូទាំងប្រទេស។
លោក សុ ខេង មានប្រសាសន៍បន្ថែមថា ទីស្នាក់ការកណ្ដាលរបស់គណបក្សគ្រាន់តែជាអ្នកសម្របសម្រួលទាក់ទងនឹងការធ្វើខិត្តប័ណ្ណ រួមទាំងសម្ភារផ្សេងៗជាដើម និងការឃោសនា គឺអាស្រ័យទៅតាមចំនួនអ្នកចូលរួមនៅតាមតំបន់ទាំងនោះ។ លោកបន្តថា គណបក្សបានបង្កើតនៅខែកុម្ភៈ ឆ្នាំ២០១១ និងចូលរួមការបោះឆ្នោតឃុំសង្កាត់ដំបូងក្នុងឆ្នាំ២០១២។
អគ្គលេខាធិការនៃគណបក្សចលនាប្រជាធិបតេយ្យ លោក ដួង ចន្ទសុរិយា មានប្រសាសន៍ថា ការឃោសនាបោះឆ្នោតនេះ គឺមានការចូលរួមពីអ្នកសមាជិករបស់គណបក្សទាំងអស់ដែលត្រូវបង្ហាញពីឆន្ទៈស្នេហាជាតិពិតប្រាកដ ដោយលោកបញ្ជាក់ថា បើទោះជាមិនមានថវិកាច្រើន តែគណបក្សលោកចង់ឲ្យប្រជាពលរដ្ឋចូលរួមដោយស្មារតីស្មោះត្រង់នឹងជាតិ។
ទោះជាយ៉ាងណា ក៏ដោយគណបក្សទាំងប្រាំនេះមិនមានអាសនៈនៅឃុំសង្កាត់នៅឡើយទេ ដែលធនធានថវិកាដែលបានចំណាយលើការឃោសនាបោះឆ្នោត គឺបានមកពីមូលធនក្នុងរបស់ប្រធានបក្សផ្ទាល់ ការចូលរួមវិភាគទានពីសមាជិក និងអ្នកគាំទ្រជាដើម រួមទាំងគណបក្សមួយចំនួនទទួលបានជំនួយពីក្រៅប្រទេសផងដែរ។
ទោះជាយ៉ាងណាក៏ដោយ បើទោះជាគណបក្សខ្លះមានលុយតិចសម្រាប់ការឃោសនាបោះឆ្នោតឃុំសង្កាត់នេះ ក៏គណបក្សនោះមានជំនឿចិត្តរៀងខ្លួនក្នុងការទទួលបានជ័យជំនះលើឃុំសង្កាត់ដែលគណបក្សខ្លួនបានឈឈ្មោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។