លោក តឹក រ៉េតសំរេច ជារដ្ឋលេខាធិការនៃទីស្តីការគណៈរដ្ឋមន្រ្តីបានមានប្រសាសន៍បំភ្លឺថា រដ្ឋាភិបាលកម្ពុជាមិនបានបណ្តេញបុគ្គលិកជនជាតិថៃ៩នាក់ពីក្រុមហ៊ុន CATS ឬបណ្តេញចេញពីប្រទេសកម្ពុជានោះទេ។
លោកបានបញ្ជាក់ថា បុគ្គលិកថៃទាំងនោះអាចបន្តការងារនៅក្នុងក្រុមហ៊ុន CATS នោះដដែល ប៉ុន្តែមិនឲ្យមានសិទ្ធិបញ្ជាប្រព័ន្ធបញ្ជាចរាចរណ៍ជើងអាកាសនៅក្នុងប្រទេសកម្ពុជាតែប៉ុណ្ណោះ ដោយសារតែមានការព្រួយបារម្ភអំពីចេតនាមិនល្អ ធ្វើឲ្យប៉ះពាល់ដល់សន្តិសុខជាតិ។
លោក តឹក រ៉េតសំរេច មានប្រសាសន៍ដូច្នេះ ៖ «រដ្ឋាភិបាលកំពុងរៀបចំក្រុមអ្នកច្បាប់និងអ្នកបច្ចេកទេស ធ្វើការសិក្សាលម្អិតទៅលើប្រព័ន្ធទាំងអស់ ទៅលើការដំណើរការក្រុមហ៊ុន ហើយនៅពេលដែលយើងធ្វើការនេះចប់សព្វគ្រប់ យើងនឹងសម្រេចថា តើបន្តការងារនេះតាមរបៀបណាទៀត នេះអាស្រ័យទៅលើការសម្រេចរបស់ប្រមុខរដ្ឋាភិបាល»។
លោក ឆាយ ស៊ីណារិទ្ធ ជាប្រធាននាយកដ្ឋានកណ្តាលសន្តិសុខនៃក្រសួងមហាផៃ្ទ បានមានប្រសាសន៍ថា បុគ្គលិកថៃម្នាក់នៃក្រុមហ៊ុន CATS ដែលសមត្ថកិច្ចកម្ពុជាបានចាប់ខ្លួនកាលពីថៃ្ងទី១២ ខែវិច្ឆិកាកន្លងទៅនេះក្រោមបទចារកម្ម ដោយសារតែសត្ថកិច្ចមានភស្តុតាងសាក្សី ព្រមទាំងចម្លើយសារភាព។
លោក ឆាយ ស៊ីណារិទ្ធ បានឲ្យដឹងដូច្នេះថា ៖ «គឺបានសារភាពទាំងអស់ពីបញ្ហាដែលទាក់ទិននឹងការទទួលបញ្ជាពាក់ព័ន្ធទៅនឹងការចង់បានព័ត៌មានស្ដីពីផែនការហោះហើរនេះឯង»។
ចំណែកឯលោក កុយ គួង ជាមន្រ្តីអ្នកនាំពាក្យនៃក្រសួងការបរទេសកម្ពុជា បានមានប្រសាសន៍ថា មូលហេតុដែលក្រសួងការបរទេសកម្ពុជា បានបណ្តេញលេខាទី១នៃស្ថានទូតថៃ ចេញពីប្រទេសកម្ពុជា កាលពីថៃ្ងទី១២ ខែវិច្ឆិកាថ្មីៗនេះ ដោយសារតែមានភស្តុតាងថា លេខាទី១រូបនោះមានការពាក់ព័ន្ធនឹងអំពើចារកម្ម។ ចំណែកឯប្រទេសថៃដែលបានបណ្តេញលេខាទីមួយនៃសា្ថនទូតកម្ពុជាពីទីក្រុងបាងកកប្រទេសថៃ មកកម្ពុជាវិញនោះ គឺគ្មានភស្តុតាងទេ ហើយជាអំពើសងសឹកតែប៉ុណ្ណោះ។
លោក កុយ គួង មានប្រសាសន៍ដូច្នេះ ៖ «តម្រូវឲ្យលេខាទី១(ថៃ)ចាកចេញពីកម្ពុជា ក្នុងរយៈពេល៤៨ម៉ោង គឺចាប់ពីម៉ោង៥ នៅថ្ងៃទី១២ (វិច្ឆិកា)។ ពេលនោះគឺថា ភាគីថៃបានធ្វើបដិការមកវិញ ដោយតម្រូវរយៈពេល៤៨ម៉ោងដូចគ្នា ឲ្យចាកចេញចាប់ពីម៉ោង៥ ថ្ងៃទី១២ដដែល»។
នៅមិនទាន់មានការឆ្លើយតបណាមួយនៅឡើយទេពីស្ថានទូតថៃ នៅក្នុងប្រទេសកម្ពុជា ជុំវិញរឿងនេះ។
ប្រតិកម្មរបស់មន្រ្តីជាន់ខ្ពស់របស់រដ្ឋាភិបាលកម្ពុជាខាងលើនេះ បានធ្វើទ្បើងក្រោយពីមានសេចក្តីរាយការណ៍នានារបស់កាសែតថៃ និងកាសែតនៅក្នុងប្រទេសកម្ពុជា អំពីជម្លោះការទូតរវាងប្រទេសទាំងពីរកាន់តែតឹងតែងឡើង បន្ទាប់ពីមានសេចក្តីរាយការណ៍ថា មានការបណ្តេញបុគ្គលិកថៃចំនួន៩នាក់ ចេញពីក្រុមហ៊ុនត្រួតពិនិត្យបញ្ជាចរាចរណ៍ជើងអាកាសនៅក្នុងប្រទេសកម្ពុជា ហៅកាត់ថា CATS។
បុគ្គលិកថៃម្នាក់ឈ្មោះ ស៊ីវ៉ារ៉ាក់ ជុធិពង់ (Siwarak Chuthipong) រងការចាប់ខ្លួនក្រោមបទចារកម្ម លួចព័ត៌មានអំពីតារាងជើងហោះហើររបស់លោក ថាក់ស៊ីន ស៊ីណាវ៉ាត់ (Thaksin Shinawatra) អតីតនាយករដ្ឋមន្រ្តីថៃមកប្រទេសកម្ពុជា កាលពីសប្តាហ៍ថ្មីៗនេះ ក្នុងតំណែងជាទីប្រឹក្សារបស់លោកនាយរដ្ឋមន្រ្តី ហ៊ុន សែន និងជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជានោះ៕