រោងចក្រម្សៅមីនេះនឹងក្លាយជាទីកន្លែងប្រមូលទិញដំឡូងមីមួយដ៏ធំ ជួយសម្រួលមិនឲ្យកសិករដាំដំឡូងមីនៅខេត្តបាត់ដំបង មានការលំបាកក្នុងការដឹកដំឡូងមីឆ្លងដែនទៅលក់នៅប្រទេសថៃទៀត និងអាចផ្តល់ការងារឲ្យពលរដ្ឋខ្មែរជាច្រើនពាន់នាក់នៅក្នុងខេត្តទៀតផង។
លោក សួន មាន តំណាងក្រុមហ៊ុន សួន មានសម្បត្តិ បានថ្លែងឲ្យវិទ្យុអាស៊ីសេរី ដឹងកាលពីពេលថ្មីៗនេះថា រោងចក្រនេះនឹងចាប់ដំណើរការសាងសង់នៅពេលឆាប់ៗខាងមុខនេះ។ រោងចក្រនឹងត្រូវបោះទីតាំងនៅស្រុកសំពៅលូន ខេត្តបាត់ដំបង។
លោក សួន មាន៖ «យើងមានអស់ហើយ ខាងខ្ញុំនឹងបង្កើតរោងចក្រម្សៅមីមួយ។ ក្នុងរោងចក្រនេះ ផលិតធ្វើម្សៅមីគ្រប់មុខច្រើនណាស់។ ទី១ ក្រុមហ៊ុនត្រូវមានដីខ្លួនឯង។ ហេតុអីបានក្រុមហ៊ុនត្រូវមានដីខ្លួនឯង? យើងទិញពីប្រជាពលរដ្ឋបានក៏ដោយ មិនបានក៏ដោយ ប៉ុន្តែផលិតផលនេះទ្រទ្រង់រោងចក្រយើងបានផ្គត់ផ្គង់ហ្នឹង បើតាមរោងចក្រមួយត្រូវការដី ១ម៉ឺនហិកតារ ប៉ុន្តែក្រុមហ៊ុនអាចមាន ៤ពាន់ហិកតារអីអ៊ីចឹងទៅ យើងខ្វះបន្តិចបន្តួច យើងទិញពីប្រជាពលរដ្ឋ»។
លោកបន្តថា ខេត្តបាត់ដំបង មានស្រុកជាច្រើនដែលមានសក្ដានុពលលើវិស័យកសិកម្ម។ ក្នុងនោះមានស្រុកសំពៅលូន ស្រុកភ្នំព្រឹក ស្រុកសំឡូត ស្រុកបាណន់ និងស្រុករតនៈមណ្ឌល ជាដើម។
ប្រជាពលរដ្ឋនៅតាមតំបន់ទាំងនោះបាននាំគ្នាដាំដំឡូងមី និងពោតច្រើនជារៀងរាល់ឆ្នាំ៖ «ផែនការដែលយើងប្រជុំនៅក្នុងក្រុមហ៊ុនដំណាក់កាលទី១ យើងអត់ទាន់ដកផលដំឡូងយើងទេ។ យើងទិញតែប្រជាជនទេ បន្ទាប់ផុតពីប្រជាជនបានយើងប្រើប្រាស់របស់យើង រោងចក្រយើងដំណើររហូត។ ទី១ ប្រជាជនដែលនៅក្នុងហ្នឹង គាត់ខ្វះដីបង្កបង្កើនផល គាត់អាចមកទំនាក់ទំនងជាមួយក្រុមហ៊ុនក្នុងលក្ខណៈ ទី១ គាត់ជួលក្រុមហ៊ុន លក្ខណៈគាត់សហការចែកផលគ្នា ហើយក្នុងករណីទី៣ បើសិនជាដីរបស់គាត់អត់មានលទ្ធភាពធ្វើ ក្រុមហ៊ុនជួយថវិកា ក្រុមហ៊ុនអត់យកការទេ ផលដំណាំអាចលក់ឲ្យក្រុមហ៊ុនទៅតាមទីផ្សារសេរី»។
នៅពេលរោងចក្រនេះចាប់ផ្តើមដំណើរការ ប្រជាកសិករខ្មែរអាចនាំកសិផលរបស់ខ្លួនទៅលក់ឲ្យក្រុមហ៊ុនផ្ទាល់ ដោយពុំចាំបាច់ដឹកយកទៅលក់នៅស្រុកថៃ និងប្រទេសវៀតណាមទេ ព្រោះរោងចក្រម្សៅមីនេះត្រូវការដំឡូងមីរាប់លានតោនក្នុងមួយឆ្នាំៗ។
ក្រុមហ៊ុន សួន មានសម្បត្តិ នេះ បានទទួលដីសម្បទានសេដ្ឋកិច្ចពីរាជរដ្ឋាភិបាលទំហំជាង ៤ពាន់ហិកតារនៅក្នុងតំបន់ដែនជម្រកសត្វព្រៃរនាមដូនសំ ស្ថិតក្នុងភូមិសាស្ត្រស្រុកសំពៅលូន ស្រុកភ្នំព្រឹក ខេត្តបាត់ដំបង។
កសិផលដំឡូងមីនៅក្នុងប្រទេសកម្ពុជា នារយៈពេលប៉ុន្មានឆ្នាំកន្លងមកនេះ ត្រូវបានកសិករ និងឈ្មួញកណ្តាលនាំគ្នាទិញ និងដឹកយកទៅលក់ឲ្យឈ្មួញនៅក្នុងប្រទេសថៃ និងប្រទេសវៀតណាម។ឈ្មួញនៅក្នុងប្រទេសថៃ បានទម្លាក់តំលៃដំឡូងមីកសិករខ្មែររាល់រដូវប្រមូលផល ដោយសារតែនៅក្នុងប្រទេសកម្ពុជា នៅពុំទាន់មានរោងចក្រកែឆ្នៃ។
ក្រុមអាជ្ញាធរខេត្តបានអះអាងថា នាពេលខាងមុខ ការនាំចេញដំឡូងមីទៅប្រទេសថៃ និងវៀតណាម នឹងចុះថយ នៅពេលដែលរោងចក្រម្សៅមី ត្រូវបានសាងសង់រួចនៅក្នុងខេត្តបាត់ដំបង និងរោងចក្រផលិតប្រេងអេតាណុលមួយទៀត នៅក្នុងខេត្តបន្ទាយមានជ័យ៕