មជ្ឈមណ្ឌលសិទ្ធិមនុស្សកម្ពុជា យល់ឃើញថា លក្ខខណ្ឌការងារនៅក្នុងរោងចក្រកាត់ដេរនៅកម្ពុជា ពុំទាន់មានសុវត្ថិភាព និងផាសុកភាពសម្រាប់កម្មករនៅឡើយទេ។ កត្តាទាំងនេះសបញ្ជាក់ពីការរំលោភបំពានទៅលើសិទ្ធិការងារជាមូលដ្ឋានរបស់កម្មករ។
ការព្រួយបារម្ភនេះ គឺបន្ទាប់ពីនាយកដ្ឋានអធិការកិច្ច និងកិច្ចការច្បាប់នៃក្រសួងការងារបង្ហាញថា មានកម្មកររោងចក្រចំនួន ១.៦៨៦នាក់ នៅរោងចក្រចំនួន ២៤ បានដួលសន្លប់ក្នុងឆ្នាំ២០១២។ ក៏ប៉ុន្តែស្ថិតិនេះនៅតិចជាងតួលេខដែលខាងសហជីពសេរីកម្មករនៃព្រះរាជាណាចក្រកម្ពុជា បានរកឃើញមានកម្មកររោងចក្រចំនួន ២.១០៧នាក់ មកពីរោងចក្រ ២៩ បានដួលសន្លប់ក្នុងឆ្នាំ២០១២។
បើទោះបីជាតួលេខរបស់ក្រសួងការងារ និងខាងសហជីព មានការខុសគ្នាក៏ពិតមែន ប៉ុន្តែមជ្ឈមណ្ឌលសិទ្ធិមនុស្សកម្ពុជា យល់ឃើញថា តួលេខរោងចក្រដែលមានកម្មករដួលសន្លប់មានកាន់តែច្រើន។
លោក សុខ លាង អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា ថ្លែងថា លក្ខខណ្ឌការងារនៅក្នុងរោងចក្រមិនបានកែប្រែឲ្យល្អប្រសើរទេ ហើយមានសភាពកាន់តែអាក្រក់ទៅៗ ដែលករណីកម្មករដួលសន្លប់នៅតែមាន។
លោក សុខ លាង៖ «ខាងខ្ញុំចង់ឲ្យគាត់ទទួលស្គាល់នូវការពិតមួយថា ប្រសិនបើកម្មករមានការសន្លប់អ៊ីចឹង ពីមួយឆ្នាំទៅមួយឆ្នាំ ទោះបីចំនួនវាថយចុះបន្តិចបន្តួចក៏ដោយ ក៏មានន័យថា វាមានបញ្ហាកើតឡើងដែរ។ ត្រូវតែសហការខាងអាជីវកម្មខាងរោងចក្រ ដើម្បីរកវិធីដោះស្រាយបញ្ហាទាំងអស់ និងដើម្បីឲ្យប្រាកដថា នៅក្នុងឆ្នាំ២០១៣ គឺនឹងមិនមានកម្មករណាដួលសន្លប់ទៀតទេ»។
មជ្ឈមណ្ឌលសិទ្ធិមនុស្សកម្ពុជា ផ្ដោតយកចិត្តទុកដាក់លើបញ្ហាអាហារូបត្ថម្ភសុវត្ថិភាព ចំណីអាហារ និងប្រព័ន្ធខ្យល់ចេញចូលនៅកន្លែងធ្វើការ និងការបញ្ឈប់ការបង្ខំឲ្យថែមម៉ោង ហើយថា កត្តាទាំងនេះ ត្រូវមានការត្រួតពិនិត្យពីក្រុមការងារអធិការកិច្ចរបស់ក្រសួងការងារ ដើម្បីលើកកម្ពស់ចំពោះលក្ខខណ្ឌការងារ ដែលមានភាពយុត្តិធម៌ និងគួរឲ្យចូលចិត្ត។
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី ធ្លាប់ប្រាប់វិទ្យុអាស៊ីសេរី កាលពីថ្ងៃទី៣ ខែមករា ឆ្នាំ២០១៣ ពីមូលហេតុដែលបង្កឲ្យមានកម្មករពុលសន្លប់ គឺមកពីកត្តារួមផ្សំជាច្រើន រួមមានបញ្ហាសុខភាពរបស់កម្មករធ្វើការថែមម៉ោងច្រើន ការហូបចុកមិនគ្រប់គ្រាន់ បរិយាកាសក្នុងរោងចក្រគ្មានស្តង់ដារ និងដោយសារកម្មករពុលក្លិនថ្នាំបាញ់ការពាររក្សាទំនិញ។
លោក ជា មុនី ជំរុញឲ្យក្រសួងសុខាភិបាល ក្រសួងបរិស្ថាន ក្រសួងឧស្សាហកម្ម រ៉ែ និង ថាមពល ក្រសួងការងារ និងក្រសួងពាណិជ្ជកម្មឲ្យគិតគូរបញ្ហានេះ៖ «សំខាន់គឺក្រសួងទាំងអស់ហ្នឹង ជាអ្នកទទួលខុសត្រូវចំពោះកម្មករ កម្មការិនី នៅក្នុងវិស័យវាយនភណ្ឌកាត់ដេរ»។
ទាក់ទងបញ្ហានេះ អនុប្រធាននាយកដ្ឋានពេទ្យការងារនៃក្រសួងការងារ និងបណ្តុះបណ្តាលវិជ្ជាជីវៈ លោក ប៉ុក វណ្ណថាត ថ្លែងថា ពេទ្យការងារបានធ្វើផែនការមេប្រចាំឆ្នាំ២០១៣ សម្រាប់បញ្ជៀសបញ្ហាដួលសន្លប់កម្មករនៅក្នុងរោងចក្រ។
លោកបន្តថា ក្រសួងការងារក៏នឹងពង្រឹងសមត្ថភាពមន្ត្រីអធិការកិច្ច ពង្រឹងការអនុវត្តច្បាប់ គណៈកម្មការទប់ស្កាត់ករណីដួលសន្លប់ កំពុងលើកគម្រោងធ្វើការអប់រំតាមរោងចក្រជាបណ្តើរៗ។
នាយកដ្ឋានអធិការកិច្ច និងកិច្ចការច្បាប់នៃក្រសួងការងារ រកឃើញថា មានកម្មករដួលសន្លប់ចំនួន ១.៩៧៣នាក់ នៅក្នុងរោងចក្រចំនួន ១២ កាលពីឆ្នាំ២០១១។ រីឯឆ្នាំ២០១២ មានកម្មករដួលសន្លប់ថយចុះនៅត្រឹម ១.៦៨៦នាក់ ប៉ុន្តែកើតឡើងនៅរោងចក្រចំនួន ២៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។