មជ្ឈមណ្ឌលសិទ្ធិមនុស្សកម្ពុជា បានចាត់ទុកការដកអភ័យឯកសិទ្ធិរបស់សមាជិកសភាគណបក្សប្រឆាំងនាពេលកន្លងទៅ ថាធ្វើឡើងក្រោមឥទ្ធិពលរបស់គណបក្សប្រជាជនកម្ពុជា ដោយបង្ហាញពីឆន្ទៈបំភិតបំភ័យសំឡេងប្រឆាំង។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា អភ័យឯកសិទ្ធិសភាមិនមានសារសំខាន់សោះ បើសិនជាអភ័យឯកសិទ្ធិសភាត្រូវបានដកហូតតាមទំនើងចិត្តរបស់គណបក្សកាន់អំណាចនោះ។ លោកបន្តថា ច្បាប់ស្ដីពីអភ័យឯកសិទ្ធិសភាត្រូវបានគេរៀបចំឡើងដោយមានភាពខ្វះចន្លោះ ហើយជានិច្ចកាលបក្សកាន់អំណាចតែងឆ្លៀតប្រើប្រាស់ចំណុចទាំងនោះ ដើម្បីបំបាក់សំឡេងបក្សប្រឆាំង។
លោក អ៊ូ វីរៈ បញ្ជាក់ថា បើសិនណាតំណាងរាស្ត្រមិនពិភាក្សាគ្នាបន្ថែមដែលទាក់ទងនឹងនីតិវិធីប្រគល់ និងដកហូតអភ័យឯកសិទ្ធិឲ្យបានច្បាស់ទេនោះ នឹងនាំឲ្យមានបញ្ហាជាច្រើនទៀតដែលជាការគំរាមកំហែងលទ្ធិប្រជាធិបតេយ្យ៖ «ជាចាំបាច់គណបក្សប្រឆាំងមានការប្រឈមខ្លាំងមែនទែន មិនមែនតែលោកស្រី មូរ សុខហួរ មួយទេ ដូចនេះកុំឲ្យមានបញ្ហាមិនច្បាស់លាស់ទេ ទាល់តែមានការចែងឲ្យមានការច្បាស់លាស់តែម្ដង ឥឡូវសន្លឹកបៀរក្នុងដៃអ្នកកាន់អំណាចត្រូវឲ្យគាត់សម្រេច បើមិនការពារបក្សប្រឆាំងទេ បានន័យថា មិនគាំទ្រប្រជាធិបតេយ្យនោះឡើយ»។
លោក អ៊ូ វីរៈ បន្តថា បើសិនជាគណបក្សប្រជាជនមិនមានឆន្ទៈក្នុងការកែប្រែច្បាប់លក្ខន្តិកៈតំណាងរាស្ត្រ បានន័យថា គណបក្សកាន់អំណាចមិនលើកស្ទួយលទ្ធិប្រជាធិបតេយ្យនោះទេ។
ទន្ទឹមនឹងនេះ មន្ត្រីអ្នកនាំពាក្យគណបក្ស សម រង្ស៉ី លោក យឹម សុវណ្ណ មានប្រសាសន៍ថា កន្លងទៅតុលាការនៅកម្ពុជា តែងតែស្វែងរកចន្លោះប្រហោងនៃច្បាប់ដើម្បីដាក់ទោសមន្ត្រីបក្សប្រឆាំង។
លោកបន្តថា ការដកអភ័យឯកសិទ្ធិមន្ត្រីបក្សប្រឆាំងនាពេលកន្លងទៅ ដើម្បីដាក់ទោសទៅកាន់តុលាការ គឺធ្វើឡើងក្នុងចេតនានយោបាយច្រើនជាងអនុវត្តច្បាប់។ លោក យឹម សុវណ្ណ បញ្ជាក់ថា ករណីអ្នកស្រី មូរ សុខហួរ ទោះបីជាសងប្រាក់គ្រប់ចំនួនទៅលោក ហ៊ុន សែន តាមការបង្គាប់របស់តុលាការក្ដី ក៏តុលាការនៅអូសបន្លាយពេលវេលាក្នុងការផ្តល់អភ័យឯកសិទ្ធិសភាវិញរហូតជាង ៣ឆ្នាំ។
លោក យឹម សុវណ្ណ៖ «គេចេះតែលើកឡើងពន្យារពេល អាពេលដកហ្នឹងវាមានហើយ ដល់ពេលប្រគល់ឯកសិទ្ធិត្រូវពន្យារអស់ ៣ឆ្នាំ ហ្នឹងជាសង្គមផ្ដាច់ការនៅឡើយទេ»។
វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាលដើម្បីសុំការអត្ថាធិប្បាយបានទេ នៅថ្ងៃទី០៥ ធ្នូ ឆ្នាំ២០១២។ ប៉ុន្តែកន្លងទៅ លោកនាយករដ្ឋមន្ត្រី ហ៊ុន សែន ថ្លែងថា លោកមិនអាចលូកដៃចូលក្នុងកិច្ចការតុលាការ និងសភាបានទេ។
សេចក្ដីថ្លែងការណ៍កម្រាស់ ១៤ទំព័រ របស់មជ្ឈមណ្ឌលសិទ្ធិមនុស្សកម្ពុជា លើកឡើងពីករណីសិក្សារបស់អ្នកស្រី មូរ សុខហួរ ស្ត្រីតំណាងរាស្ត្រដែលត្រូវតុលាការកាត់ក្តីឲ្យចាញ់លោកនាយករដ្ឋមន្ត្រី ហ៊ុន សែន បន្ទាប់ពីសភាដកអភ័យឯកសិទ្ធិរបស់អ្នកស្រីរួចមក។
មាត្រា ១៤ច្បាប់លក្ខន្តិកៈតំណាងរាស្ត្រចែងថា តំណាងរាស្ត្រដែលមានសាលក្រម ឬសាលដីកាស្ថាពរ សម្រេចថាជាទណ្ឌិត ជាប់ពន្ធនាគារ ត្រូវបាត់បង់ទាំងស្រុងនូវសិទ្ធិ បុព្វសិទ្ធិ និងសមាជិកភាពសភា។ ផ្ទុយទៅវិញ អ្នកស្រី មូរ សុខហួរ មានទោស ប៉ុន្តែមិនត្រូវជាប់ពន្ធនាគារទេ សង្គមស៊ីវិលសន្និដ្ឋានថា បើច្បាប់មិនមានចែងមិនគួរណាសភាដកអភ័យឯកសិទ្ធិអ្នកស្រី មូរ សុខហួរ នោះឡើយ។
ច្បាប់លក្ខន្តិកៈតំណាងរាស្ត្រក៏មិនបានចែងពីការប្រគល់អភ័យឯកសិទ្ធិជូនអ្នកតំណាងរាស្ត្រវិញដែរ ជាហេតុនាំឲ្យក្រសួងយុត្តិធម៌ និងតុលាការ ពន្យារពេលអស់ជាច្រើនឆ្នាំក្នុងការផ្ដល់អភ័យឯកសិទ្ធិសភាជូនអ្នកស្រី មូរ សុខហួរ វិញ នាំឲ្យមានការសង្ស័យថា តុលាការធ្វើការស្ថិតក្រោមឥទ្ធិពលនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។