CCHR ចេញ​សេចក្ដី​ថ្លែងការណ៍​ចំពោះ​ករណី​សកម្មជន​អាដហុក

មជ្ឈមណ្ឌល​សិទ្ធិ​មនុស្ស​កម្ពុជា (CCHR) បាន​ចេញ​សេចក្ដី​ថ្លែងការណ៍​ជា​បន្ទាន់​មួយ បង្ហាញ​ពី​ក្តី​បារម្ភ​ចំពោះ​សាលក្រម​របស់​តុលាការ​សាលា​ដំបូង​ខេត្ត​កំពង់ឆ្នាំង ដែល​បាន​សម្រេច​ឲ្យ​សកម្មជន​អង្គការ​ការពារ​សិទ្ធិ​មនុស្ស​អាដហុក គឺ​លោក សំ ច័ន្ទគា មាន​ទោស​ពី​បទ​បរិហារ​កេរ្តិ៍ ហើយ​តម្រូវ​ឲ្យ​បង់​ប្រាក់​ពិន័យ និង​សំណង​ទៅ​ឲ្យ​ក្រុមហ៊ុន​ឯកជន ខេ.ឌី.ស៊ី. អន្តរជាតិ (KDC International) ផង។

0:00 / 0:00

មជ្ឈមណ្ឌល​សិទ្ធិ​មនុស្ស​កម្ពុជា បាន​ចេញ​សេចក្ដី​ថ្លែងការណ៍​ថ្មី​មួយ កាល​ពី​យប់​ថ្ងៃ​ទី​២៥ ខែ​មករា អំពាវនាវ​ឲ្យ​ក្រុមប្រឹក្សា​ធម្មនុញ្ញ​កម្ពុជា ធ្វើការ​ត្រួត​ពិនិត្យ​ឡើង​វិញ​នូវ​បទ​ល្មើស​បរិហារ​កេរ្តិ៍ ដែល​មាន​ចែង​នៅ​ក្នុង​ក្រមព្រហ្មទណ្ឌ​ថ្មី។

មជ្ឈមណ្ឌល​សិទ្ធិ​មនុស្ស​បញ្ជាក់​ថា សាលក្រម​នោះ​គឺ​ជា​ការ​រំឭក​យ៉ាង​ជាក់ច្បាស់​ថា ការ​ដាក់​បទ​បរិហារ​កេរ្តិ៍​ជា​បទ​ល្មើស​ព្រហ្មទណ្ឌ កាន់​តែ​បន្ត​ធ្វើ​ឲ្យ​ប្រទេស​កម្ពុជា ឃ្លាត​ឆ្ងាយ​ពី​ប្រទេស​ដែល​ប្រកាន់​ខ្ជាប់​នូវ​គោលការណ៍​គោរព​សេរីភាព​នៃ​ការ​បញ្ចេញ​មតិ។

សេចក្ដី​ថ្លែងការណ៍​បញ្ជាក់​បន្ត​ថា មិន​តែ​ប៉ុណ្ណោះ សាលក្រម​នេះ​ក៏​បាន​បង្ហាញ​ច្បាស់​នូវ​ការ​ថមថយ​នៃ​បរិយាកាស​ប្រជាធិបតេយ្យ សម្រាប់​ការ​បំពេញ​កិច្ច​ការងារ​របស់​អ្នក​ការពារ​សិទ្ធិ​មនុស្ស។

លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា បន្ថែម​ថា ការកាត់ទោសនោះ ពុំត្រឹមត្រូវទេ ៖ «យើង​មើល​កម្រិត​នៃ​ធាតុផ្សំ​នៃ​បទ​បរិហារ​កេរ្តិ៍​ដោយ​ច្បាប់​ព្រហ្មទណ្ឌ​ថ្មី គឺ​ហាក់​ដូច​ជា​មាន​កម្រិត​ទាប​ពេក​នូវ​ធាតុផ្សំ​ទាំង​នោះ។ ដូច្នេះ​បាន​ន័យ​ថា មាន​ក្រុមហ៊ុន ឬ​អ្នក​មាន​អំណាច​អាច​ប្ដឹងផ្ដល់​យ៉ាង​ងាយ​ស្រួល​បំផុត ប្រើប្រាស់​បទ​បរិហារ​កេរ្តិ៍​ទាំង​នេះ​ក្នុង​ការ​គាប​សង្កត់​សេរីភាព​បញ្ចេញ​មតិ​របស់​សកម្មជន។ ក្នុង​នេះ​ដែរ យើង​ក៏​ចាប់​អារម្មណ៍​ការ​ប្ដឹងផ្ដល់​មិន​មែន​តែ​មាន​លើ​លោក សំ ច័ន្ទគា ប៉ុណ្ណោះ​ទេ គឺ​មាន​លើ​អ្នក​ដទៃ​មួយ​ចំនួន​ទៀត ។ ជា​រឿង​មួយ​ដែល​យើង​មើល​ឃើញ​ថា ជា​ការ​ប្ដឹងផ្ដល់​បន្ត​បន្ទាប់ ឆ្លុះ​បញ្ចាំង​ពី​ឆន្ទៈ​មួយ​ក្នុង​ការ​គាប​សង្កត់​មិន​ឲ្យ​មាន​ការ​តវ៉ា​លើ​ករណី​នៅ​ក្នុង​ខេត្ត​កំពង់ឆ្នាំង​មួយ​នេះ។ នេះ​ជា​រឿង​មួយ​ដែល​យើង​ព្រួយ​បារម្ភ»

បណ្ដឹង​ព្រហ្មទណ្ឌ​ប្រឆាំង​នឹង​លោក សំ ច័ន្ទគា កើត​ឡើង​បន្ទាប់​ពី​លោក​បាន​ផ្ដល់​បទសម្ភាសន៍​ជាមួយ​វិទ្យុ​អាស៊ីសេរី កាល​ពី​ថ្ងៃ​ទី​២៦ ខែ​ធ្នូ ឆ្នាំ​២០១០ ទាក់ទិន​នឹង​ជម្លោះ​ដីធ្លី​រវាង​ក្រុមហ៊ុន​ឯកជន KDC អន្តរជាតិ និង​កសិករ​នៅ​ភូមិ​ឡពាង ឃុំ​តាជេស ស្រុក​កំពង់ត្រឡាច ខេត្ត​កំពង់ឆ្នាំង។
កាល​ពី​សប្ដាហ៍​មុន​នេះ អ្នក​ភូមិ​ឡពាង​ម្នាក់​ឈ្មោះ រាជ សីមា ក៏​ត្រូវ​បាន​តុលាការ​កាត់​ទោស​កំបាំង​មុខ​ពី​បទ​ផ្ដល់​ព័ត៌មាន​មិន​ពិត ទាក់ទិន​នឹង​សកម្មភាព​របស់​ក្រុមហ៊ុន​នោះ។

តុលាការ​ខេត្ត​តម្រូវ​ឲ្យ​លោក រាជ សីមា បង់​ប្រាក់​ពិន័យ​ចំនួន ២​លាន​រៀល និង​សង​ជំងឺ​ចិត្ត ៨​លាន​រៀល​ទៅ​ឲ្យ​ភាគី​ក្រុមហ៊ុន។ ប្រាក់​ពិន័យ​នេះ​ជា​ចំនួន​ដ៏​ច្រើន​សម្បើម ដែល​គាត់​អាច​នឹង​ពុំ​មាន​លទ្ធភាព​បង់ ហើយ​ប្រសិន​បើ​គាត់​មិន​បាន​បង់​នូវ​ចំនួន​ដូច​ដែល​តុលាការ​ខេត្ត​បង្គាប់​នោះ​ទេ គាត់​អាច​ប្រឈម​មុខ​នឹង​ការ​ដាក់​ពន្ធនាគារ។

មជ្ឈមណ្ឌល​សិទ្ធិ​មនុស្ស​កម្ពុជា បញ្ជាក់​ថា ករណី​បណ្ដឹង​ផ្សេង​គ្នា​ចំពោះ​លោក សំ ច័ន្ទគា និង​លោក រាជ សីមា បង្ហាញ​ពី​ហានិភ័យ​ដែល​កើត​ចេញ​ពី​ក្រមព្រហ្មទណ្ឌ​ថ្មី ដែល​ទើប​ចូល​ជា​ធរមាន​កាល​ពី​ថ្ងៃ​ទី​១១ ខែ​ធ្នូ ឆ្នាំ​២០១០ នៅ​ពេល​ដែល​ប្រជាពលរដ្ឋ​ប្រើប្រាស់​នូវ​សិទ្ធិ​បញ្ចេញ​មតិ ដូច​មាន​ចែង​ក្នុង​រដ្ឋ​ធម្មនុញ្ញ ជា​ពិសេស​នៅ​ពេល​មាន​ការ​រិះគន់​ចំពោះ​រដ្ឋាភិបាល ឬ​ក៏​ក្រុម​អភិជន​ណា​មួយ។

លោក អ៊ូ វីរៈ មាន​ប្រសាសន៍​ថា កន្លង​មក​នេះ មាន​បណ្ដឹង​ជា​ច្រើន​បន្តបន្ទាប់​ប្ដឹង​សកម្មជន​ការពារ​សិទ្ធិ​មនុស្ស​រាប់​សិប​នាក់​នៅ​តាម​បណ្ដា​ខេត្ត​នានា ដោយ​ដើម​ចោទ​បាន​ប្រើប្រាស់​ក្រមព្រហ្មទណ្ឌ​ថ្មី ស្តីពី​បទល្មើស​បរិហារ​កេរ្តិ៍។

លោក​អំពាវនាវ​ដល់​ក្រុមប្រឹក្សា​ធម្មនុញ្ញ​កម្ពុជា សូម​ធ្វើការ​ត្រួត​ពិនិត្យ​ឡើង​វិញ​នូវ​ក្រមព្រហ្មទណ្ឌ​ថ្មី ដែល​ទាក់ទិន​នឹង​បទល្មើស​បរិហារ​កេរ្តិ៍​នៅ​កម្ពុជា ៖ «តាម​រយៈ​នាយករដ្ឋមន្ត្រី ឬ ១០% នៃ​សភា​ទាំង​មូល គួរ​តែ​ស្នើ​សុំ​ឲ្យ​ក្រុមប្រឹក្សា​ធម្មនុញ្ញ​វាយ​តម្លៃ​ទៅ​លើ​ធម្មនុញ្ញភាព​របស់​ក្រមព្រហ្មទណ្ឌ​ដែល​បាន​អនុម័ត​ថ្មី ទាក់ទង​រឿង​បទ​បរិហារ​កេរ្តិ៍​នេះ ដែល​យើង​យល់​ថា វា​ផ្ទុយ​នឹង​ខ្លឹមសារ​ធម្មនុញ្ញ​ដែល​ធានា និង​ការពារ​នូវ​សិទ្ធិ​សេរីភាព​របស់​ប្រជាពលរដ្ឋ​ខ្មែរ ក្នុង​សិទ្ធិ​បញ្ចេញ​មតិ​ជា​សាធារណៈ។ ដូច្នេះ​បើ​សិទ្ធិ​នេះ បច្ចុប្បន្ន​ត្រូវ​បាន​ប្រឈម ត្រូវ​បាន​រឹតត្បិត ខ្ញុំ​យល់​ថា ក្រុមប្រឹក្សា​ធម្មនុញ្ញ​មាន​អំណាច និង​សមត្ថកិច្ច​ក្នុង​ការ​សើរើ និង​ត្រួតពិនិត្យ​ច្បាប់​នេះ ហើយ​បើ​ក្រុមប្រឹក្សា​ធម្មនុញ្ញ​យល់​ថា ច្បាប់​នេះ​មិន​ស្រប​ទៅ​នឹង​ខ្លឹមសារ​ធម្មនុញ្ញ គឺ​ក្រុមប្រឹក្សា​ធម្មនុញ្ញ​មាន​អំណាច​ជំរុញ​ឲ្យ​មាន​ការ​កែប្រែ​ខ្លឹមសារ​នេះ»

មជ្ឈមណ្ឌល​សិទ្ធិ​មនុស្ស​កម្ពុជា បច្ចុប្បន្ន​កំពុង​រៀបចំ​បង្កើត​កម្មវិធី​ថ្មី​មួយ ដែល​គេ​ហៅ​ថា កម្មវិធី​អ្នក​ការពារ​សិទ្ធិ​មនុស្ស ជួយ​ផ្នែក​ច្បាប់ និង​ថវិកា​ទៅ​តាម​លទ្ធភាព ជួយ​សកម្មជន​សិទ្ធិ​មនុស្ស អ្នក​ដែល​ប្រឈម​ដូច​ករណី​លោក សំ ច័ន្ទគា ជាដើម។

Article 19 ថ្កោលទោស​សេចក្ដី​សម្រេច​លើ​លោក សំ ច័ន្ទគា

ទាក់ទង​នឹង​តុលាការ​កាត់​សេចក្ដី​លើ​មន្ត្រី​សិទ្ធិ​មនុស្ស​ក្នុង​ស្រុក​នេះ លោកស្រី​បណ្ឌិត អេកណែស ខាលឡាម៉ឹដ (Agnès Callamard) នាយក​ប្រតិបត្តិ​នៃ​អត្ថបទ​១៩ (Article 19) ដែល​ជា​អង្គការ​នៃ​យុទ្ធនាការ​ពិភពលោក​សម្រាប់​សេរីភាព​នៃ​ការ​បញ្ចេញ​មតិ បាន​ចេញ​សេចក្ដី​ថ្លែងការណ៍​មួយ​កាល​ពី​ថ្ងៃ​អង្គារ ទី​២៥ ខែ​មករា ថ្កោល​ទោស​ចំពោះ​សេចក្ដី​សម្រេច​ដាក់​ទោស​ពិន័យ​លើ​លោក សំ ច័ន្ទគា ថា ជា​ការ​វាយ​ប្រហារ​លើ​សិទ្ធិ​សេរីភាព​របស់​មនុស្ស។

លោកស្រី បាន​មាន​ប្រសាសន៍​ថា សាលក្រម​កាត់​ទោស​របស់​តុលាការ​ខេត្ត​កំពង់ឆ្នាំង​នេះ បាន​បង្ហាញ​ថា ក្រមព្រហ្មទណ្ឌ​ថ្មី​ដែល​បាន​ចូល​ជា​ធរមាន​កាល​ពី​ថ្ងៃ​ទី​១១ ខែ​ធ្នូ ឆ្នាំ​២០១០ កន្លង​មក​នេះ គឺជា​ការ​គំរាមកំហែង​ពិត​ប្រាកដ​ចំពោះ​អ្នក​ដែល​ប្រើ​សិទ្ធិ​សេរីភាព​របស់​ខ្លួន​ក្នុង​ការ​បញ្ចេញ​មតិ។

សេចក្ដី​ថ្លែងការណ៍​នេះ​បន្ត​ថា ក្រមព្រហ្មទណ្ឌ​នេះ​មិន​ត្រឹមតែ​បំបិទ​មាត់​ប៉ុណ្ណោះ​ទេ គឺ​ថែម​ទាំង​ធ្វើការ​រំលោភ​បំពាន និង​ការពារ​ដល់​អ្នក​មាន​ទ្រព្យ​សម្បត្តិ និង​អ្នក​មាន​អំណាច៕