លោក ម៉ម សូណង់ដូ ត្រូវបានសាលាដំបូងរាជធានីភ្នំពេញ ចោទពីបទធ្វើអបគមន៍ និងញុះញង់ ហើយផ្ដន្ទាទោសឲ្យជាប់ពន្ធនាគារចំនួន ២០ឆ្នាំ និងពិន័យជាប្រាក់ ១០លានរៀល។
អង្គការសិទ្ធិមនុស្ស និងក្រុមគ្រួសារលោក ម៉ម សូណង់ដូ បានជំរុញឲ្យប្រធានសាលាឧទ្ធរណ៍ ពន្លឿនសំណុំរឿងរបស់លោក ម៉ម សូណង់ដូ ដើម្បីជំទាស់ទៅនឹងសេចក្ដីសម្រេចរបស់សាលាដំបូងរាជធានីភ្នំពេញ ដែលថាការពន្យារពេលបើកសវនាការនេះ គឺជារឿងនយោបាយ។
មជ្ឈមណ្ឌលសិទ្ធិមនុស្សកម្ពុជា (CCHR) កាលពីថ្ងៃទី១៦ វិច្ឆិកា បានដាក់លិខិតចំហមួយទៅប្រធានសាលាឧទ្ធរណ៍ លោក យ៊ូ ប៊ុនឡេង ដោយស្នើសុំឲ្យពន្លឿនសំណុំរឿងឧទ្ធរណ៍របស់លោក ម៉ម សូណង់ដូ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍នៅថ្ងៃទី១៧ វិច្ឆិកា ថា ការពន្យារពេលមិនយកសំណុំរឿងលោក ម៉ម សូណង់ដូ មកកាត់សេចក្ដីនោះ ហាក់ជាចេតនាមួយ៖ «យើងយល់ថា ការពន្យារពេលនេះ គឺជារឿងនយោបាយដែរ ដោយសារខ្ញុំមើលទៅហាក់ដូចជារដ្ឋាភិបាលជាអ្នកនៅពីក្រោយខ្នងតុលាការដែលមិនឲ្យសំណុំរឿងនេះទៅដល់សាលាឧទ្ធរណ៍ មិនឲ្យសំណុំរឿងនេះទៅដល់មេធាវី។ ខ្ញុំមើលទៅទាក់ទងរឿងនយោបាយ បើសិនជាមានឆន្ទៈពន្យារដោយឆន្ទៈនយោបាយរដ្ឋាភិបាលហ្នឹង គឺជាការលូកដៃមួយដែលមិនត្រឹមត្រូវទាល់តែសោះ»។
លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានសាលាដំបូងរាជធានីភ្នំពេញ ផ្ដន្ទាទោសឲ្យជាប់ពន្ធនាគារចំនួន ២០ឆ្នាំ និងពិន័យជាប្រាក់ ១០លានរៀល ពីបទធ្វើអបគមន៍ និងញុះញង់។
ភរិយារបស់លោក ម៉ម សូណង់ដូ គឺអ្នកស្រី ឌិន ផាណារ៉ា បានថ្លែងថា អ្នកស្រីមានសង្ឃឹមចំពោះសាលាឧទ្ធរណ៍ថានឹងបើកការស៊ើបអង្កេតឡើងវិញចំពោះរឿងក្ដីរបស់ស្វាមីគាត់ដែលពុំមានកំហុសដូចការចោទប្រកាន់នោះទេ៖ «ចង់ឲ្យដំណើរការឲ្យឆាប់ណាស់ ពីព្រោះឥឡូវហ្នឹងរយៈពេល ១ខែជាងហើយ មិនទាន់បានទៅដល់ឧទ្ធរណ៍ អត់ទាន់បានអី»។
ឆ្លើយតបទៅនឹងការស្នើសុំនេះ ប្រធានសាលាឧទ្ធរណ៍ លោក យ៊ូ ប៊ុនឡេង បានបដិសេធថា លោកនៅមិនទាន់បានទទួលសំណុំរឿងរបស់លោក ម៉ម សូណង់ដូ ពីសាលាដំបូងនៅឡើយទេ៖ «រឿងឲ្យតែមកដល់ខ្ញុំហើយ ខ្ញុំមិនដែលទុក ពីព្រោះគោលការណ៍របស់ខ្ញុំ គោលការណ៍ឆាប់រហ័ស ហើយមានរឿងច្រើនយ៉ាងដូច្នេះ វាត្រូវតាមយើងខំប្រឹងធ្វើម៉េចឲ្យតែបានលឿន ព្រោះគោលការណ៍ឆាប់រហ័ស ខ្ញុំមិនដែលយកទុករឿងទេ តែយើងត្រូវគិតថា រឿងមិនមែនមានតែមួយទេវាមានច្រើន»។
មេធាវីការពារក្ដីឲ្យលោក ម៉ម សូណង់ដូ គឺមេធាវី លោក ស សូវាន បានបន្ទោសថា សាលាដំបូងរាជធានីភ្នំពេញយឺតយ៉ាវមិនទាន់ផ្ញើសំណុំរឿងទៅសាលាឧទ្ធរណ៍៖ «ហើយទៅកាត់ម៉េចកាត់លើកខ្យល់ បើសាលាឧទ្ធរណ៍មិនទាន់បានទទួលសំណុំរឿងផង។ ខ្ញុំមេធាវីគាត់ ខ្ញុំសុំថតចម្លងនៅសាលាដំបូងរាជធានីភ្នំពេញ រហូតមកដល់ថ្ងៃនេះអត់ទាន់បានសំណុំរឿងអីទេ។ សាលាឧទ្ធរណ៍កាត់យ៉ាងម៉េច បើគាត់ជាប់គុក ២០ឆ្នាំហើយ វាទាល់តែសាលាឧទ្ធរណ៍កាត់ បានគាត់រួចខ្លួន។ បើមិនទាន់បានកាត់ផង តាមខ្ញុំមើលទៅ ២ខែទៀតនោះ ទាល់តែសាលាឧទ្ធរណ៍គេទទួលបានជាគេចាប់ចៅក្រមឲ្យពិនិត្យ វាអត់បានសំណុំរឿងគេម៉េចខុសសាលាឧទ្ធរណ៍មានខុសអីទេ បើសាលាដំបូងអត់ផ្ញើឲ្យគេ»។
កាលពីថ្ងៃទី១ តុលា ឆ្នាំ២០១២ ចៅក្រមសាលាដំបូងរាជធានីភ្នំពេញ បានប្រកាសសាលក្រមឲ្យលោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យជាប់ពន្ធនាគារចំនួន ២០ឆ្នាំ និងពិន័យប្រាក់ ១០លានរៀល ក្រោមបទចោទប្រកាន់ចំនួន៤ គឺ បទផ្ដួចផ្ដើមគំនិតប្រឆាំងអ្នករាជការសាធារណៈ បទធ្វើកុបកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ បទញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងទី៤ បទប្រឆាំងនឹងអាជ្ញាធរស្របច្បាប់ដែលមានចែងក្នុងមាត្រាមួយចំនួននៃក្រមព្រហ្មទណ្ឌ។
ការសម្រេចក្ដីលើលោក ម៉ម សូណង់ដូ និងអ្នកភូមិមួយចំនួននេះ ត្រូវបានអង្គការជាតិ អន្តរជាតិ រិះគន់ និងចេញសេចក្ដីថ្លែងការណ៍ជំទាស់ភ្លាមៗ ដោយសារតែពួកគេយល់ថា ការផ្ដន្ទាទោសនេះ គឺពាក់ព័ន្ធនឹងរឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។