គម្រោងបេសកកម្មសង្គមរបស់មណ្ឌលព័ត៌មានស្ត្រីកម្ពុជា និងមជ្ឈមណ្ឌលសិក្សាដើម្បីជោគជ័យ ដែលចាប់ផ្ដើមដំណើរការនៅថ្ងៃទី៥ ខែកក្កដា ឆ្នាំ២០១២ មានគោលបំណងសំខាន់ចំនួន ៥ គឺមានដូចជា លើកកម្ពស់សេចក្ដីសុខ សុភមង្គលគ្រួសារ តាមរយៈការកាត់បន្ថយអំពើហិង្សាលើស្ត្រី និងកុមារ និងលើកទឹកចិត្តយុវវ័យ ដោយតម្រង់ទិសដៅជីវិត កសាងសមត្ថភាព និងបទពិសោធន៍ជាដើម។
នាយកប្រតិបត្តិ និងអ្នកឯកទេសផ្នែកបណ្ដុះបណ្ដាលធនធានមនុស្ស នៃគ្រឹះស្ថានសិក្សាដើម្បីជោគជ័យ លោក ឃីម សុខហេង មានប្រសាសន៍ថា គ្រឹះស្ថានរបស់លោកធ្លាប់បានបណ្ដុះបណ្ដាលធនធានមនុស្សជាង ១ម៉ឺននាក់ នៅកម្ពុជា ហើយភាគរយនៃការទទួលបានជោគជ័យ គឺឈានដល់ ៩០%។
លោកបន្តថា ភាពជោគជ័យនេះ គឺដោយសារក្រុមការងាររបស់លោកមានជំនាញច្បាស់លាស់ ទាក់ទងនឹងការអភិវឌ្ឍន៍ធនធានមនុស្ស៖ «យើងផ្ដោតទៅលើទី១ ប្រជាពលរដ្ឋដែលជាគ្រួសារ។ ទី២ ផ្ដោតទៅលើយុវជន។ ហើយទី៣ ផ្ដោតទៅលើអស់លោក លោកស្រី ដែលគាត់បម្រើការងារនៅក្នុងស្ថាប័នក្រុមហ៊ុនឯកជន ដែលគាត់ជាបុគ្គលិក ហើយគាត់ចង់អភិវឌ្ឍនូវសមត្ថភាព ការគិត ជំនាញ និងចំណេះដឹងរបស់គាត់ ដើម្បីក្លាយជាបុគ្គលឆ្នើម ជាបុគ្គលិកល្អ ដែលមានឋានៈខ្ពស់ ហើយមានប្រាក់បៀវត្សរ៍ខ្ពស់។ ហើយអ្នកដែលចូលរួម គឺយើងគ្រោងចំនួនពី ៨០០ ទៅ១.៥០០នាក់ ក្នុងមួយវគ្គ»។
លោកបញ្ជាក់ថា មូលនិធិដែលទទួលបានពីវគ្គបណ្ដុះបណ្ដាលចំនួន ៥ដុល្លារ ក្នុងសិក្ខាកាមម្នាក់ នឹងត្រូវប្រគល់ឲ្យវិទ្យុស្ត្រី FM 102 ចំនួន ៦០% ដើម្បីផលិតស្ពតអប់រំ និងផ្ដល់ចំណេះដឹងផ្សេងៗដល់ប្រជាពលរដ្ឋកម្ពុជា តាមរយៈវិទ្យុ និងទូរទស្សន៍មួយចំនួន ក្នុងរយៈពេល ១៨ខែ។
នាយិកាប្រតិបត្តិ នៃមណ្ឌលព័ត៌មានស្ត្រីកម្ពុជា អ្នកស្រី ជា ស៊ុនដាណែត មានប្រសាសន៍ថា គម្រោងបេសកកម្មសង្គមដែលចុះហត្ថលេខានៅពេលនេះ នឹងជួយឲ្យប្រជាពលរដ្ឋខ្មែរយល់ដឹងកាន់តែច្បាស់ អំពីសេចក្ដីថ្លៃថ្នូរ ក្នុងជីវិតរស់នៅប្រចាំថ្ងៃ ហើយកម្មវិធីនេះនឹងមានផ្សាយតាមវិទ្យុស្ត្រី FM 102 ក្នុងពេលឆាប់ខាងមុខ៖ «ទោះបីជាមណ្ឌលព័ត៌មានស្ត្រីកម្ពុជា គឺជាអង្គការមួយដែលកំពុងធ្វើការងារផ្សព្វផ្សាយអប់រំ និងផ្ដល់ចំណេះដឹងជួយដល់សង្គមហើយក្ដី ក៏ថវិកាដែលបានមកនេះរួមគ្នាបង្កើតជាកម្មវិធីវិទ្យុ ដែលយើងឲ្យឈ្មោះថា បេសកកម្មសង្គម»។
អ្នកស្រីបន្តថា នេះគឺជាលើកទី១ ដែលខាងវិស័យឯកជន បានជួយដល់ការផ្សាយដើម្បីបម្រើសង្គមជាតិ នៅគ្រាដែលជំនួយបរទេសបានកាត់បន្ថយមួយចំនួនពីវិទ្យុរបស់អ្នកស្រី។
ចំណែកប្រធានអង្គការកម្មវិធីអភិវឌ្ឍន៍ធនធានយុវជន លោក ជាង សុខា មានប្រសាសន៍ថា លោកមិនបានជ្រាបច្បាស់អំពីគម្រោងបេសកកម្មសង្គមរបស់ស្ថាប័នទាំងពីនេះទេ ប៉ុន្តែលោកថា គេគួរតែសិក្សា និងគិតឲ្យបានស៊ីជម្រៅ ទៅលើឫសគល់ នៃការអភិវឌ្ឍន៍សង្គម និងភាពអត់ការងាររបស់យុវជនកម្ពុជា នាពេលបច្ចុប្បន្ន។
លោក ជាង សុខា៖ «ការបណ្ដុះបណ្ដាលជំរុញសម្រាប់តែឲ្យយុវជនមានការងារធ្វើប៉ុណ្ណឹងទេ។ ប៉ុន្តែ តើការងារដែលយុវជនទទួលបានហ្នឹង វាអាចជំរុញទៅដល់លក្ខណៈមួយដែលធ្វើឲ្យយុវជននោះ ក្លាយទៅជាពលរដ្ឋមួយដែលមានលក្ខណៈសកម្ម ហើយជួយលើកកម្ពស់នូវបរិយាកាសប្រជាធិបតេយ្យ ហើយដើរតួជាពលរដ្ឋនៅក្នុងសង្គមប្រជាធិបតេយ្យ ដើម្បីឲ្យមានឥទ្ធិពលទៅលើសង្គម ឬសហគមន៍ទាំងមូលយ៉ាងដូចម្ដេច?»។
មជ្ឈមណ្ឌលសិក្សាដើម្បីជោគជ័យ និងមណ្ឌលព័ត៌មានស្ត្រីកម្ពុជា បានបង្ហាញនូវក្ដីសង្ឃឹមថា ក្រោយពីចុះអនុស្សរណៈបង្កើតគម្រោងបេសកកម្មសង្គម នឹងទទួលបានផលប្រយោជន៍ពីរ ក្នុងពេលតែមួយ គឺមានន័យថា ថវិកាដែលបានរំលែកពីប្រាក់ដែលសិស្សបង់ថ្លៃសិក្សានៅមជ្ឈមណ្ឌលរបស់លោក ឃីម សុខហេង យកទៅផលិតកម្មវិធីអប់រំសង្គមផ្សេងៗ និងទី២ អាចផ្ដល់ចំណេះដឹងដល់សិក្ខាកាមប្រមាណជាង ២ម៉ឺននាក់ ដោយសារថ្លៃសិក្សាទាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។