ជនជាតិចាមនៅកម្ពុជា ដែលជាអតីតជនរងគ្រោះក្នុងរបបកម្ពុជាប្រជាធិបតេយ្យ បានថ្លែងឲ្យដឹងថា ពួកគេបានអបអរសាទរចំពោះអង្គជំនុំជម្រះវិសាមញ្ញក្នុងតុលាការកម្ពុជា ដោយជំរុញឲ្យតុលាការនេះរកយុត្តិធម៌ជួនពួកគេឲ្យបានឆាប់ៗ។
ការលើកឡើងដូច្នេះនៅបន្ទាប់ពីសាលាក្តីកាត់ទោសអតីតមេដឹកនាំខ្មែរក្រហម បានធ្វើសន្និសីទសារព័ត៌មានមួយ ប្រកាសចោទប្រកាន់មេដឹកនាំកំពូលៗ ក្នុងរបបកម្ពុជាប្រជាធិបតេយ្យទាំង៤រួប ពីបទប្រល័យពូជសាសន៍ជនជាតិចាម និងវៀតណាមជាផ្លូវការ កាលពីថ្ងៃទី១៦ ខែកញ្ញា រួមមាន នួន ជា អតីតប្រធានសភាតំណាងប្រជាជន, អៀង សារី អតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស, អៀង ធីរិទ្ធ រដ្ឋមន្ត្រីក្រសួងសង្គមកិច្ច និង ខៀវ សំផន ប្រធានគណៈប្រធានរដ្ឋ នៅក្នុងរបបកម្ពុជាប្រជាធិបតេយ្យ។
អតីតជនរងគ្រោះមួយរួប ឈ្មោះ ស៊េត ម៉ាលី ហៅ អាម៉ីណះ បានសម្ដែងសុទិដ្ឋិនិយមថា នេះជារឿងល្អមួយ ដែលសាលាក្តីខ្មែរក្រហម បានធ្វើការចោទប្រកាន់បន្ថែមជាផ្លូវការទៅលើអតីតមេដឹកនាំក្នុងរបបកម្ពុជាប្រជាធិបតេយ្យ ដែលនេះជាការបង្ហាញអំពីភាពយុត្តិធម៌ និងកើតមានចំពោះជនជាតិភាគតិចវៀតណាម និងចាម។
ហាកឹម ឬអ្នកដឹកនាំភូមិសាច់សូ នៅឃុំពាមជីកង ស្រុកកងមាស ខែត្រកំពង់ចាម លោក យូសុះ មហាំម៉ាត់ បានមានប្រសាសន៍ថា អ្នកភូមិសាច់សូ និងបងប្អូនរបស់លោក ត្រូវបានខ្មែរក្រហមយកទៅសម្លាប់នៅអូរត្រកួន ស្ថិតនៅក្នុងឃុំពាមជីងកង ដែលជាទីកន្លែងវាលពិឃាដរបស់ខ្មែរក្រហម។
លោក មហាំម៉ាត់ បញ្ជាក់ថា អ្នកភូមិរបស់លោកប្រមាណ ៣០០គ្រួសារ ខ្មែរក្រហមយកទៅសម្លាប់ទាំងអស់ ហើយសាលាក្ដីបានចោទប្រកាន់អតីតមេដឹកនាំខ្មែរក្រហមទាំង៤រួបនេះ ពីបទប្រល័យពួជសាសន៍ចាម និងវៀតណាមជារឿងត្រឹមត្រូវជាទីបំផុត។
សេចក្ដីប្រកាសព័ត៌មានរបស់សហចៅក្រមស៊ើបអង្កេតចេញផ្សាយកាលថ្ងៃទី១៦ កញ្ញា បានឲ្យដឹងថា សហចៅក្រមនៃអង្គជំនុំជម្រះវិសាមញ្ញក្នុងតុលាការកម្ពុជា លោកចៅក្រម យួ ប៊ុនឡេង និងលោក ចៅក្រម ម៉ាសែល ឡឺម៉ុង បានចោទប្រកាន់ជាផ្លូវការអតីតមេដឹកនាំទាំ ៤រួបនេះ គឺអំពើប្រល័យពូជសាសន៍ជនជាតិចាម និងវៀតណាម និងបទល្មើសផ្សេងៗ ទៀត ដែលស្ថិតនៅក្រមព្រហ្មទណ្ឌកម្ពុជា ឆ្នាំ១៩៥៦ ដូចជា មនុស្សឃាត ការធ្វើទារុណកម្ម និងការធ្វើទុក្ខបុកម្នេញខាងសាសនា។
ទីប្រឹក្សាច្បាប់ព្រហ្មទណ្ឌអន្តរជាតិនៃសាលាក្តីកាត់ទោសអតីតមេដឹកនាំខ្មែរក្រហម និងជាមេធាវីជនរងគ្រោះវៀតណាម អ្នកស្រី លីម៉ា ង្វៀន បានមានប្រសាសន៍ថា ការសម្លាប់ជនជាតិវៀតណាម ជាអំពើឧក្រិដ្ឋកម្ម ហើយជនជាតិវៀតណាម ក៏ជាជនរងគ្រោះដែរ ដូច្នេះអំពើឧក្រិដ្ឋកម្មលើជនជាតិវៀតណាម ត្រូវគិតនៅទូទាំងប្រទេស គេមិនអាចនិយាយតែក្នុងតំបន់ដែលមាននៅក្នុងខែត្រមួយចំនួននោះទេ ៖ «មូលហេតុដែលតុលាការទទួលស្គាល់ការសម្លាប់ជនជាតិវៀតណាម មិនមែនជាករណីសម្លាប់រង្គាលជនជាតិវៀតណាមដែលកើតមាននៅក្នុងខែត្រកំពង់ឆ្នាំងនោះទេ ប៉ុន្តែតុលាការទទួលស្គាល់ជនជាតិវៀតណាមជាជនរងគ្រោះ ដោយសារខ្មែរក្រហមបានបង្ខំជនជាតិវៀតណាមឲ្យរៀបការជាមួយជនជាតិដទៃទៀត ដូចជានៅក្នុងខែត្រកំពង់ឆ្នាំងជាដើម»។
លោកចៅក្រម យួ ប៊ុនឡេង បានមានប្រសាសន៍ថា ឧក្រិដ្ឋកម្មដែលបានកើតមានឡើងនៅក្នុងរបបកម្ពុជាប្រជាធិបតេយ្យ មានវិសាលភាពធំធេង គ្របដណ្ដប់ទូទាំងប្រទេស និងមកលើប្រជាជនកម្ពុជាទាំងមូល ប៉ុន្តែការស៊ើបអង្កេតមិនអាចទៅគ្របដណ្ដប់គ្រប់ទីកន្លែង និងគ្រប់សកម្មភាពនៃឧក្រិដ្ឋកម្មបានទេ។ សហចៅក្រមស៊ើបអង្កេតបានប្រតិបត្តិការស៊ើបអង្កេតតែនៅទីតាំងជាក់លាក់មួយចំនួនទេ។
ប្រធានគម្រោងតាមរយៈការចុះសួរនាំនៃមជ្ឈមណ្ឌលឯកសារកម្ពុជា កញ្ញា សូ ហ្វារីណា បានមានប្រសាសន៍ថា ការចោទប្រកាន់អតីតមេដឹកនាំខ្មែរក្រហមទាំង៤រួប ពីបទប្រល័យពូជសាសន៍ជនជាតិចាម និងវៀតណាម គឺជារឿងត្រឹមត្រូវតាមច្បាប់ និងប្រវត្តិសាស្ត្រ ពីព្រោះថាខ្មែរក្រហមមានការរើសអើងជាតិសាសន៍ទាំង២នេះ។
កញ្ញា សូ ហ្វារីណា បានអះអាងថា ជនជាតិចាមរងគ្រោះខ្លាំងជាងគេនោះ ដោយសារតែនៅក្នុងឆ្នាំ១៩៧៥ ជនជាតិចាមនៅភូមិកោះផល និងអ្នកភូមិស្វាយឃ្លាំង ស្ថិតនៅស្រុកក្រូចឆ្មារ ខែត្រកំពង់ចាម បានប្រឆាំងតទល់នឹងគោលនយោបាយខ្មែរក្រហម ហើយខ្មែរក្រហមបានជម្លៀសជនជាតិចាម នៅភូមិដទៃទៀតមិនឲ្យផ្តុំគ្នាទេ ហើយគេក៏បានចាប់ផ្ដើមសម្លាប់ជនជាតិចាមតាំងពីពេលនោះមក។
លុះដល់ឆ្នាំ១៩៧៧ ខ្មែរក្រហមបានសម្លាប់រង្គាលជនជាតិចាមកាន់តែច្រើនឡើង ដូចជានៅតំបន់អូរត្រកួន ក្នុងស្រុកកងមាស ខ្មែរក្រហមបានយកជនជាតិចាមទៅសម្លាប់នៅទីនោះច្រើនជាងប្រជាពលរដ្ឋទួទៅ។
ប្រធានក្រុមជំរុញឲ្យមានការទទួលខុសត្រូវនៃមជ្ឈមណ្ឌលឯកសារកម្ពុជា លោក ឡង់ ដានី បានលើកឡើងថា ជនជាតិវៀតណាម ដែលខ្មែរក្រហមបានសម្លាប់នៅក្នុងរបបកម្ពុជាប្រជាធិបតេយ្យ អស់ប្រមាណ ៣សែននាក់ ព្រោះថា ខ្មែរក្រហមបានចាត់ទុកជនជាតិវៀតណាមជាសត្រូវ។
ឯកសារស្រាវជ្រាវរបស់លោក អ៊ីសា ឧស្មាន អ្នកស្រាវជ្រាវឯករាជអំពីជនជាតិចាម បានបង្ហាញថា ជនជាតិចាមដែលខ្មែរក្រហមបានសម្លាប់នៅចន្លោះឆ្នាំ១៩៧៥ ដល់ឆ្នាំ១៩៧៩ប្រហែលជា ៤សែន ទៅ ៥សែននាក់។ ឯកសារដដែលបានបញ្ជាក់ថា ជនជាតិចាមដែលធ្វើការបះបោរនៅភូមិស្វាយឃ្លាំង នៅកោះផល នៅភូមិទ្រា គឺមិនទទួលបានជោគជ័យទេ ផ្ទុយទៅវិញខ្មែរក្រហមបានសម្លាប់ជនជាតិចាមចោលស្ទើរតែទាំងអស់នៅក្នុងភូមិដែលបះបោរទាំងនោះ៕