ពលរដ្ឋខ្មែរអ៊ិស្លាមទៅចូលរួមពិធីបុណ្យហាជ្ជ

ដោយ ហ្សាការីយ៉ា

2009-11-05

នៅព្រឹកថ្ងៃ៥ វិច្ឆិកា មានសាសនិកអ៊ិស្លាមជាច្រើនរយនាក់មកពីតាមបណ្តាខែត្រនានា កកកុញនៅឯព្រលានយន្តហោះអន្តរជាតិភ្នំពេញ ជូនដំណើរសាច់ញាតិរបស់ខ្លួនទៅធ្វើបុណ្យហាជ្ជនៅទីក្រុងម៉េក្កៈ ប្រទេសអារ៉ាប់ប៊ីសាវអូឌីត។

AFP Photo

អ្នកធ្វើដំណើរជាខ្មែរអ៊ិស្លាម ដែលរង់ចាំការហោះហើរទៅទីក្រុងបាងកក អង្គុយក្បែរអីវ៉ាន់របស់ខ្លួននៅព្រលានយន្តហោះអន្តរជាតិភ្នំពេញនៅថ្ងៃទី២៦ វិច្ឆិកា ២០០៨។

យ៉ាងហោចណាស់មានប្រជាជាពលរដ្ឋខ្មែរអ៊ិស្លាមជាង៦០នាក់ ទៅចូលរួមក្នុងពិធីបុណ្យហាជ្ជនៅទីក្រុងម៉េក្កៈ នៃប្រទេសអារ៉ាប់ប៊ីសាបអូឌីត នៅថ្ងៃទី៥ វិច្ឆិកា ក្នុងចំណោមខ្មែរអ៊ិស្លាមរាប់រយនាក់ ដែលនឹងចូលរួមបុណ្យនៅក្នុងឆ្នាំនេះ ស្របពេលដែលសាសនិកអ៊ិស្លាមនៅលើសកលលោក គ្រប់ជាតិសាសន៍ជាច្រើនលាននាក់បាននាំគ្នាប្រារព្ធពិធីនេះ។

អ្នកដឹកនាំទៅធ្វើបុណ្យហាជ្ជ ឈ្មោះ សារ៉ន ដែលដឹកនាំមនុស្សចេញលើកនេះ៦០នាក់ ក្នុងចំណោម១៧០នាក់បញ្ជាក់ដូច្នេះ ៖ «ត្រូវបែងចែកជា៣ក្រុម មានក្រុមថ្ងៃ៥ ថ្ងៃ១៦ និងថ្ងៃ១៧ (វិច្ឆិកា)។ នៅក្នុងថ្ងៃនេះជាលើកទី១»។

លោក សារ៉ន បានបញ្ជាក់ទៀតថា អ្នកដែលទៅធ្វើបុណ្យហាជ្ជគឺត្រូវបង់លុយក្នុងម្នាក់៣.៨០០ដុល្លារ ដែលទៅរយៈពេល៤០ថ្ងៃ នឹងវិលត្រឡប់មកកម្ពុជាវិញ បន្ទាប់ពីបានបំពេញកាតព្វកិច្ចបុណ្យហាជ្ជនេះរួច។ លោកបានឲ្យដឹងថា បានជាសាសនិកអ៊ិស្លាមចំណាយថវិកាច្រើនក្នុងការទៅធ្វើបុណ្យហាជ្ជ គឺជាកាតព្វកិច្ចទី៥នៅក្នុងសាសនាអ៊ិស្លាមចំពោះអ្នកដែលមានលទ្ធភា។

លោក សារ៉ន បានឲ្យដឹងដូច្នេះ ៖ «បើអ្នកអត់លទ្ធភាពក៏អត់មានបាបកម្មអីដែរ អ៊ីចឹងអ្នកដែលមានបាបកម្ម គឺលើអ្នកដែលមានលទ្ធភាពហើយមិនទៅ»។

តំណាងរាស្រ្តគណបក្សប្រជាជនកម្ពុជា លោក ស្មាន ទៀត ដែលបានជូនដំណើរបងប្អូនរបស់លោកនៅឯព្រលានយន្តហោះអន្តរជាតិភ្នំពេញដែរនោះ បានលើកឡើងថា ការធ្វើបុណ្យហាជ្ជកាលពីប៉ុន្មានឆ្នាំមុន គឺស្តេចនៃប្រទេសអារ៉ាប់ប៊ីសាវអូឌីត បានឧបត្ថម្ភដល់សាសនិកអ៊ិស្លាមនៅកម្ពុជាទៅធ្វើបុណ្យហាជ្ជចំនួន២០០នាក់ក្នុង១ឆ្នាំៗ ដូចជានៅក្នុងឆ្នាំ២០០១ និងឆ្នាំ២០០២ជាដើម។ ប៉ុន្តែក្នុងឆ្នាំនេះ គឺមានសប្បុរសជននៅប្រទេសអារ៉ាប់ប៊ីសាវអូឌីត ជួយតែប្រមាណ២០នាក់ប៉ុណ្ណោះ។

លោក ស្មាន ទៀត មានប្រសាសន៍ថា ៖ «ការជូនដំណើរនេះវាអាចបាត់សណ្ដាប់ធ្នាប់សង្គមនៅក្នុងទីសាធារណៈ អ៊ីចឹងសូមការយោគយល់ពីបងប្អូនប្រជាពលរដ្ឋរបស់យើងទូទៅ»។

អ្នកទៅធ្វើបុណ្យហាជ្ជមួយរូបក្នុងចំណោមជាង៦០នាក់នោះ លោក យ៉ាក់ ហ្វើរ បាននិយាយថា លោកមានជីវភាពធូរធារ ដូច្នេះជាកាតព្វកិច្ចរបស់លោកត្រូវតែទៅធ្វើបុណ្យហាជ្ជដើម្បីបំពេញនូវច្បាប់ទី៥ នៃសាសនាអ៊ិស្លាមដែលតម្រូវឲ្យធ្វើបុណ្យហាជ្ជនោះ។

លោក យ៉ាក់ ហ្វើរ មានប្រសាសន៍ដូច្នេះ ៖ «ផ្ដាំផ្ញើឲ្យបងប្អូនទាំងអស់ដែលមិនទាន់បានទៅ អ៊ិស្លាមយើងវាត្រូវតែទៅហើយ ទាំងស្រីទាំងប្រុស បើយើងមានលទ្ធភាពត្រូវតែទៅ»។

កាលពីឆ្នាំ២០០៨ ចំពោះអ្នកទៅធ្វើបុណ្យជាលក្ខណៈឯកជននេះ គឺមានពីរវគ្គ។ វគ្គទី១ចំនួន២៥ថ្ងៃ ត្រូវបង់លុយថ្លៃធ្វើដំណើរ ថ្លៃស្នាក់នៅនិងហូបចុកចំនួន២.៥០០ដុល្លារ ហើយវគ្គទីពីរមានរយៈពេល៤០ថ្ងៃ គឺតម្លៃ៣.០០០ដុល្លារតែប៉ុណ្ណោះ។

ជាមួយគ្នានេះ កាលពីឆ្នាំ២០០៨ដដែល គឺមានប្រជាពលរដ្ឋខ្មែរអ៊ិស្លាមប្រមាណ៣០០នាក់ផងដែរ ខកខានមិនបានទៅបំពេញកាតព្វកិច្ចធ្វើបុណ្យហាជ្ជ ដោយសារហ្វូងបាតុករថៃបានធ្វើបាតុកម្មប្រឆាំងនឹងរដ្ឋាភិបាលថៃ ដែលឡោមព័ទ្ឋព្រលានយន្តហោះក្នុងក្រុងបាងកក ប្រទេសថៃ បានធ្វើឲ្យជើងយន្តហោះនៃការហោះហើរពីភ្នំពេញនិងសៀមរាប-បាងកក បានផ្អាកបណ្តោះអាសន្នកាលពីថ្ងៃទី២៦ វិច្ឆិកា ឆ្នាំ២០០៨កន្លងទៅ៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។

មើលមតិទាំងអស់.

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព
	ចែករំលែករឿងនេះ