ការជំរុញឲ្យយុវជនជនជាតិចាមនៅតាមសហគមន៍ឲ្យសិក្សាផ្នែកចំណេះដឹងទូទៅនៅតាមសាលាសាធារណៈ និងសិក្សាស្វែងយល់អំពីសាសនារបស់ខ្លួន គឺជាតម្រូវការចាំបាច់របស់ក្រុមយុវជនជនជាតិចាម ដែលជាអតីតនិស្សិតបានបញ្ចប់ការសិក្សាកន្លងមក។
ការលើកឡើងដូច្នេះនៅក្នុងកិច្ចប្រជុំរួមគ្នាលើកទី២ របស់ក្រុមយុវជនជាតិចាម ដែលធ្វើឡើងនៅរាជធានីភ្នំពេញ ថ្ងៃទី២៤ កក្កដា ដែលមានអតីតនិស្សិតដែលទើបបញ្ចប់ការសិក្សាមកពីបរទេសចូលរួមសរុបទាំងអស់ជាង ៦០នាក់។
អតីតនិស្សិតបញ្ចប់ការសិក្សាផ្នែកច្បាប់ពីប្រទេសបារាំង លោក នាគ សាគីរីន ដែលបច្ចុប្បន្នជាមន្ត្រីផ្នែកច្បាប់នៅក្នុងសាលាក្ដីកាត់ទោសអតីតមេដឹកនាំខ្មែរក្រហម បានមានប្រសាសន៍ថា ការបណ្ដុះបណ្ដាលក្មេងនៅសហគមន៍ជនបទ ជាកត្តាស្នូលដែលយុវជនត្រូវរកមធ្យោបាយជួយពួកគេ។
ប្រធានកម្មវិធីវិទ្យុផ្សាយជាភាសាចាម និងជាអតីតនិស្សិត ដែលបានរៀបចំកម្មវិធីជួបជុំនិស្សិតនេះឡើង បានមានប្រសាសន៍ថា អតីតនិស្សិតដែលបញ្ចប់ការសិក្សា ដែលបានបម្រើការងារមកពីស្ថាប័នផ្សេងៗ គ្នានោះ ពួកគេ បានកំណត់ទិសដៅជាច្រើនទាក់ទងនឹងសហគមន៍ជនជាតិចាម ក្នុងគោលបំណងជំរុញលើកទឹកចិត្ត និងទិសដៅអភិវឌ្ឍធនធានមនុស្សឲ្យបានកាន់តែច្រើនថែមទៀត ដើម្បីរួមចំណែកអភិវឌ្ឍសហគមន៍ និងសង្គមជាតិ។
នៅក្នុងការពិភាក្សាគ្នា និងការចែករំលែកបទពិសោធន៍គ្នាទៅវិញទៅមករបស់ក្រុមយុវជនជាតិចាម ពួកគាត់ក៏លើកនូវចំណុចខ្វះខាតជាច្រើនរបស់មេដឹកនាំសហគមន៍ជនជាតិចាមនាពេលបច្ចុប្បន្ន ដូចជាករណីការប្រើប្រាស់ថវិកាជំនួយមិនចំគោលដៅ ក្រុមយុវជនទទួលបានព័ត៌មានអំពីការអភិវឌ្ឍសហគមន៍នៅមានកម្រិត ការប្រព្រឹត្តិអំពើពុករលួយរបស់ថ្នាក់ដឹកនាំជនជាតិចាម ទៅលើថវិកាជំនួយមួយចំនួន និងមានកត្តាមួយផ្សេងៗទៀត។
ប៉ុន្តែទោះជាយ៉ាងណាក្ដី ក្រុមយុវជនទាំងនោះមិនបានបង្ហាញថា តើការប្រព្រឹត្តិអំពើពុករលួយនោះបានកើតឡើងចំពោះថ្នាក់ដឹកនាំណាមួយនោះឡើយ។ ហើយក្រុមយុវជនទាំងនោះគ្រោងនឹងលើកចំណុចខ្វះខាតទាំងនេះ ឲ្យថ្នាក់ដឹកនាំរបស់ពួកគេដឹងនៅពេលខាងមុខ ដើម្បីជាប្រយោជន៍របស់សហគមន៍។
អតីតនិស្សិតដែលបានបញ្ចប់ការសិក្សាមកពីប្រទេសជប៉ុន លោក អាប់ឌុលរ៉សម៉ាន បានលើកឡើងថា ការទទួលជោគជ័យទៅបានរបស់ក្រុមយុវជនក្នុងការកំណត់គោលដៅអភិវឌ្ឍសហគមន៍ជនជាតិចាម ពិសេសលើវិស័យអប់រំនោះ លុះត្រាណាយុវជនមានទំនាក់ទំនងល្អ និងគិតពីប្រយោជន៍រួមជារឿងសំខាន់។
នៅក្នុងអង្គប្រជុំនោះ ក្រុមយុវជនក៏បានកំណត់រយៈពេល ៦ខែ ជួបគ្នាម្ដង ដើម្បីស្វែងរកវិធីផ្សេងៗ ទៀត សម្រាប់អភិវឌ្ឍសហគមន៍របស់ពួកគាត់ និងចំណុចខ្វះខាតដែលកើតមាន។ ទោះជាយ៉ាងណាក៏ដោយ ក្រុមយុវជនទាំងនេះ បានសម្ដែងសុទិដ្ឋិនិយមថា ពួកគាត់មិនចង់ពឹងផ្អែកលើជំនួយទាំងស្រុងដើម្បីអភិវឌ្ឍសហគមន៍ទេ ពួកគាត់ចង់ធ្វើអ្វីដោយខ្លួនឯង ដោយកើតមកពីការសហការគ្នាជាកត្តាចម្បង។
អតីតនិស្សិតជនជាតិចាមដែលបញ្ចប់ការសិក្សានៅក្នុងស្រុក និងក្រៅប្រទេសមានប្រមាណជាង ៣០០នាក់ ហើយនិស្សិតកំពុងសិក្សាបច្ចុប្បន្នមានប្រមាណ ៦០០នាក់ ប៉ុន្តែតួលេខនេះនៅមានកម្រិតតិចនៅឡើយបើប្រៀបធៀបប្រជាពលរដ្ឋជនជាតិចាមនៅកម្ពុជាមានចំនួនប្រមាណ ៧សែននាក់៕