តុលាការសាលាឧទ្ធរណ៍នៅថៃ្ង២៧ វិច្ឆិកានេះ បានផ្តន្ទាទោសកំបាំងមុខ លោកស្រី ជា រដ្ឋា ឧត្តមសេនីយ៍ត្រីនៃកងរាជអាវុធហត្ថ ឲ្យជាប់គុក១៨ឆ្នាំ និងគូកនចំនួន៦នាក់ទៀតឲ្យជាប់គុករវាងពី១៥ឆ្នាំទៅ១៨ឆ្នាំ ក្រោមបទចោទប្រកាន់ថា មានការពាក់ព័ន្ធក្នុងរឿងវាយប្រហារដោយទឹកអាស៊ីតលើម្តាយមីងរបស់អតីតបវរកញ្ញាទេសចរណ៍ នាង អ៊ិន សូលីដា ដែលមានទំនាក់ទំនងស្នេហាភេទដូចគ្នាជាមួយលោកស្រី ជា រដ្ឋា នោះ កាលពីដើមខែឧសភា ឆ្នាំ២០០៨កន្លងទៅ។
លោក សេង ស៊ីវុត្ថា ជាប្រធាននៃចៅក្រមប្រឹក្សាចំនួនបីនាក់នៃតុលាការសាលាឧទ្ធរណ៍នោះ បានអានសាលដីកានៅថៃ្ងសុក្រនេះថា តុលាការសម្រេចផ្តន្ទាទោសលោកស្រី ជា រដ្ឋា កំបាំងមុខឲ្យជាប់គុក១៨ឆ្នាំ និងគូកនចំនួន៦នាក់ទៀតឲ្យជាប់គុករវាង១៥ឆ្នាំទៅ១៨ឆ្នាំ ក្រោមបទចោទអំពីមនុស្សឃាតគិតទុកជាមុន និងបទរំលោភលើសិទ្ធិបុគ្គល។
តុលាការសាលាឧទ្ធរណ៍បានបង្គាប់ឲ្យអ្នកទាំងនោះរួមគ្នាបង់ប្រាក់ចំនួន១០ម៉ឺនដុល្លារអាមេរិកចំពោះការព្យាបាលនានារបស់ជនរងគ្រោះ ហើយតុលាការដដែលបានបង្គាប់ឲ្យសមត្ថកិច្ចតាមចាប់ខ្លួនអ្នកទាំងនោះដើម្បីឃុំខ្លួនក្នុងគុក។
លោក ណាច គ្រី ជាមេធាវីការពារក្តីឲ្យលោកស្រី ជា រដ្ឋា បានមានប្រសាសន៍នៅខាងក្រៅតុលាការថា វាជាការសម្រេចដោយអយុត្តិធម៌ ៖ «បើនិយាយតាមផ្លូវច្បាប់វាអយុត្តិធម៌ ព្រោះវាអត់មានភស្តុតាងតាំងពីដំណាក់កាលដំបូងរហូតមកដល់សាលាឧទ្ធរណ៍នេះ គ្មានភស្តុតាងថ្មីណាដែលបញ្ជាក់ថា កូនក្ដីខ្ញុំជាជនល្មើសផង ព្រោះឥឡូវនៅចំពោះមុខសវនាការគឺគ្មានភស្តុតាងណាដាក់ថ្មី។ ខ្ញុំបានសំណូមពរទៅក្រុមប្រឹក្សាហើយថា ទី១ សុំឲ្យគេដាក់ភស្តុតាង ទី២ សុំឲ្យជនរងគ្រោះហ្នឹងមកបំភ្លឺថា គាត់មិនសុខចិត្តត្រង់ចំណុចណា ហើយចំណុចណាដែលគាត់ទទួលយកមិនបានហ្នឹង។ និយាយបានន័យថា គាត់ឆ្លើយទាំងអស់ផ្ទុយនឹងឆន្ទៈរបស់គាត់»។
សុខ សេរី ៖ បន្តរឿងនេះទៅតុលាការកំពូលទៀត? ណាច គ្រី ៖ រឿងបន្តឬមិនបន្តវាអាស្រ័យទៅលើកូនក្ដីទេ។ កូនក្ដីពឹងពាក់ខ្ញុំ ខ្ញុំនឹងចាត់ការបន្ត។
លោក អំ សំអាត ជាប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាល ហៅកាត់ថា លីកាដូ ដែលបានតាមដានសំណុំរឿងនេះកន្លងមក បានមានប្រសាសន៍ស្វាគមន៍ថា ៖ «អ៊ីចឹងយើងឃើញពេលនេះ គឺសាលាឧទ្ធរណ៍បានផ្ដល់នូវយុត្តិធម៌ទៅដល់ជនរងគ្រោះដ៏ពិតប្រាកដ»។
ការសម្រេចផ្តន្ទាទោសជនជាប់ចោទចំនួន៧នាក់ខាងលើនេះ គឺផ្ទុយពីអ្វីដែលតុលាការសាលាដំបូងរាជធានីភ្នំពេញ កាលពីថៃ្ង៥ ខែសីហាកន្លងទៅ បានសម្រេចលើកលែងការចោទប្រកាន់ និងដោះលែងជនសង្ស័យចំនួន៧នាក់ឲ្យមានសេរីភាព ហើយបានញ៉ាំងឲ្យក្រុមគ្រួសាររបស់នាង អ៊ិន សូលីដា មានការភ័យព្រួយយ៉ាងខ្លាំងអំពីសុវត្ថិភាពផ្ទាល់ខ្លួន និងរស់នៅក្នុងការលាក់ខ្លួន។
លោកស្រី យ៉ា សុខនីម ជាម្តាយមីងរបស់នាង អ៊ិន សូលីដា បានរងការវាយប្រហារដោយទឹកអាស៊ីតកាលពីថៃ្ងទី៨ ខែឧសភា ឆ្នាំ២០០៨កន្លងទៅ នៅក្នុងសង្កាត់ផ្សារទួលទំពូង១ ក្រុងភ្នំពេញ ដោយមនុស្សដៃដល់ចំនួន២នាក់និងអ្នកសមគំនិតមួយចំនួនទៀតសរុបទាំងអស់៧នាក់ រាប់ទាំងលោកស្រី ជា រដ្ឋា ផង ដែលជាឧត្តមសេនីយ៍ត្រីនៃកងរាជអាវុធហត្ថ។
ការវាយប្រហារដោយទឹកអាស៊ីតនោះបានកើតមានទ្បើងក្រោយពីនាង អ៊ិន សូលីដា អតីតបវរកញ្ញាទេសចរណ៍ កាលពីឆ្នាំ២០០៦កន្លងទៅ បានបែកចិត្តឬគេចខ្លួនពីទំនាក់ទំនងស្នេហាភេទដូចគ្នា រវាងឆ្នាំ២០០៥និងឆ្នាំ២០០៨កន្លងទៅ៕