ការទៅដល់សហរដ្ឋអាមេរិករបស់សកម្មជនច្បាប់ចិនរូបនេះ គឺធ្វើឲ្យមានការចាប់អារម្មណ៍យ៉ាងខ្លាំងពីសហគមន៍អន្តរជាតិ ពិសេសជាការផ្ញើសារមួយដល់រដ្ឋាភិបាលកម្ពុជា ឲ្យយកចិត្តទុកដាក់ដល់សកម្មជនការពារសិទ្ធិមនុស្ស ដែលធ្វើការដើម្បីសិទ្ធិសេរីភាព និងសង្គមនោះ។
ប្រទេសចិន ត្រូវបានពិភពលោកទទួលស្គាល់ថា ជាប្រទេសរីកចម្រើនផ្នែកសេដ្ឋកិច្ច ប៉ុន្តែយ៉ាងនេះក្ដី ប្រទេសនេះ គឺស្ថិតនៅក្នុងចំណាត់ថ្នាក់ជាប្រទេសកុម្មុយនិស្តផ្ដាច់ការនៅឡើយ នៅក្នុងពិភពលោក។
ការទៅដល់សហរដ្ឋអាមេរិករបស់សកម្មជនច្បាប់ លោក ឈិន គ័ងឆេង នៅពេលនេះ ជាការផ្ញើសារល្អមួយទៅកាន់ពិភពលោក រួមទាំងប្រទេសកាន់របបកុម្មុយនិស្តនៅតំបន់អាស៊ីអាគ្នេយ៍ ពិសេសសម្រាប់រដ្ឋាភិបាលកម្ពុជា ឲ្យយកចិត្តទុកដាក់ការពារសកម្មជនការពារសិទ្ធិមនុស្ស។
អ្នកស្រាវជ្រាវផ្នែកអភិវឌ្ឍន៍សង្គម និងជាអ្នកវិភាគឯករាជ្យ លោក កែម ឡី មានប្រសាសន៍ថា សហរដ្ឋអាមេរិកបានចរចាយកសកម្មជនច្បាប់ លោក ឈិន គ័ងឆេង ទៅសហរដ្ឋអាមេរិកនេះ ជាការផ្ញើសារមួយទៅកាន់ពិភពលោក និងជាគំរូល្អមួយ ដែលសកម្មជនការពារសិទ្ធិមនុស្សនានា ពិសេសសកម្មជនការពារសិទ្ធិមនុស្សនៅកម្ពុជាជាដើម ឲ្យមានកម្លាំងចិត្តក្នុងការបំពេញការងាររបស់ខ្លួន ក្នុងបុព្វហេតុការពារសិទ្ធិមនុស្ស ដើម្បីធ្វើឲ្យប្រទេសកម្ពុជា ក្លាយជាប្រទេសប្រជាធិបតេយ្យពេញលេញ។
លោក កែម ឡី៖ «ជាសារមួយសម្រាប់រដ្ឋាភិបាលខ្មែរយើងគួរតែរៀបចំ យកចិត្តទុកដាក់ថែរក្សា អ្នកការពារសិទ្ធិមនុស្ស ជាពិសេសអ្នកការពារធនធានធម្មជាតិ ជាពិសេសដែលធ្វើការប្រយុទ្ធប្រឆាំងអំពើពុករលួយនៅកម្ពុជា»។
សកម្មជនច្បាប់ពិការភ្នែក លោក ឈិន គ័ងឆេង ត្រូវបានគេយកចេញពីមន្ទីរពេទ្យយ៉ាងប្រញាប់ប្រញាល់ ទៅព្រលានយន្តហោះចិន ញូវវើត លីបើធី (Neward Liberty) និងធ្វើដំណើរទៅដល់សហរដ្ឋអាមេរិក កាលពីថ្ងៃទី១៩ ខែឧសភា បន្ទាប់ពីអាជ្ញាធរចិនបានប្រាប់គាត់ឲ្យរៀបចំឥវ៉ាន់ និងឲ្យចាកចេញភ្លាមៗ ដោយដៃកាន់ឈើច្រត់ និងជើងស្ដាំរបស់គាត់អបស៊ីម៉ងត៍ពេទ្យ។
លោក ឈិន ត្រូវបានទទួលស្វាគមន៍យ៉ាងរាក់ទាក់នៅពេលលោកទៅដល់ទីក្រុងញីវយ៉ក និងទៅ ដល់ផ្ទះល្វែងនៅភូមិ មេនហាតថិន ហ្គ្រីនវិច (Manhattan's Greenwich) ជាទីដែលលោកនឹងរស់នៅជាមួយគ្រួសាររបស់គាត់នៅទីនោះ ហើយលោកក៏រំពឹងថា នឹងបន្តការសិក្សាផ្នែកច្បាប់នៅសាកលវិទ្យាល័យញីវយ៉ក។
លោក ឈិន គ័ងឆេង មានប្រសាសន៍តាមរយៈអ្នកបកប្រែថា៖ «រយៈពេល ៧ឆ្នាំកន្លងទៅ ខ្ញុំមិនដែលមានពេលសម្រាកទេ ដូច្នេះខ្ញុំមកទីនេះដើម្បីឲ្យបានធូរស្បើយខាងផ្លូវកាយ និងផ្លូវចិត្ត»។
លោក ឈិន ត្រូវបានសហគមន៍អន្តរជាតិចាត់ទុកថា ជាសកម្មជនសិទ្ធិមនុស្សដ៏ឆ្នើមនៅក្នុងប្រទេសចិន។ លោកបានធ្វើការទាមទារសិទ្ធិសេរីភាពពីរដ្ឋាភិបាលជូនប្រជាពលរដ្ឋចិន ហើយលោកជាអ្នកមាននិន្នាការនយោបាយសេរី ប្រឆាំងរបបកុម្មុយនិស្ត។ លោក ឈិន គ័ងឆេង មានឥទ្ធិពលខ្លាំងទៅលើនិស្សិតបញ្ញវន្ត ដែលធ្វើការនៅក្នុងរដ្ឋាភិបាល ពិសេសលោកធ្វើនយោបាយបែបទំនើប គឺលោកបានប្រើប្រព័ន្ធសារអេឡិចត្រូនិកក្នុងការទាក់ទងគ្នា។
សកម្មជនច្បាប់ពិការភ្នែក លោក ឈិន គ័ងឆេង មានវ័យប្រមាណ ៤០ឆ្នាំ ជាអ្នកប្រឆាំងមួយរូបនៅក្នុងបក្សកុម្មុយនិស្តចិន ដែលគណបក្សកុម្មុយនិស្តចិនមើលឃើញថា ជាការគំរាមកំហែងរបបនយោបាយប្រទេសចិន។ លោកត្រូវបានរដ្ឋាភិបាលចាប់ឃុំខ្លួនក្នុងផ្ទះ និងក្នុងពន្ធនាគារអស់រយៈពេល ៧ឆ្នាំ។ លោកបានលួចរត់គេចខ្លួនដោយសេចក្ដីក្លាហានមួយ ចេញពីភូមិរបស់គាត់កាលពីខែមេសា ទៅកាន់ស្ថានទូតអាមេរិក។ ស្ថានទូតអាមេរិកបានផ្ដល់កន្លែងស្នាក់នៅជូនលោកនៅក្នុងស្ថានទូត តែម្ដង។ តែក្រោយមកស្ថានទូតសហរដ្ឋអាមេរិកបានបញ្ជូនគាត់ទៅនៅផ្ទះរបស់គាត់ វិញ។
ភ្ជាប់ទៅនឹងបញ្ហានេះ អ្នកវិភាគបានលើកឡើងថា វានៅមានភាពអាថ៌កំបាំងនៅឡើយទាក់ទងនឹងរដ្ឋាភិបាលចិនបានអនុញ្ញាត ឲ្យសកម្មជនច្បាប់រូបនេះចាកចេញពីប្រទេសចិនទៅកាន់សហរដ្ឋអាមេរិក ដើម្បីបន្តការសិក្សានោះ។
លោក កែម ឡី បានពន្យល់ថា ប្រទេសមហាអំណាចទាំងពីរអាចមានលក្ខខ័ណ្ឌណាមួយ ដើម្បីដោះដូរគ្នាក៏អាចថាបាន ចំពោះករណីលោក ឈិន គ័ងឆេង ដ៏ចម្រូងចម្រាសនេះ។
លោក កែម ឡី៖ «មន្ទិលសង្ស័យថា ផ្លូវការទូតមួយចំនួនទាក់ទងជម្លោះមហាសមុទ្រចិន ឬមួយក៏ទាក់ទងឥទ្ធិពលចិន ផ្នែកសេដ្ឋកិច្ច នៅប្រភពអារ៉ាប ប៉ុន្តែយ៉ាងនេះក្ដី ប្រជាពលរដ្ឋខ្មែរយើងគួរតែក្រឡេកមើលសកម្មជនចិន ប្រជាពលរដ្ឋយើងគួរតែហ៊ានបញ្ចេញមតិ លើកអំពីបញ្ហាពិតដែលកំពុងកើតមាននៅក្នុងសង្គម»។
ប្រជាពលរដ្ឋចិនបានគាំទ្រលោក ឈិន គ័ងឆេង កាន់តែខ្លាំងឡើង បន្ទាប់ពីលោកបានធ្វើការទាមទារសិទ្ធិជនពិការ និងសិទ្ធិកសិករក្នុងការប្រយុទ្ធប្រឆាំង ក្នុងការរំលូតកូននៅសហគមន៍របស់គាត់នៅតំបន់ជនបទ ដែលធ្វើឲ្យអាជ្ញាធរកាន់តែខឹងសម្បានឹងលោកថែមទៀត។
ប្រធានមជ្ឈមណ្ឌលសិទ្ធិមនុស្សកម្ពុជា (CCHR) លោក អ៊ូ វីរៈ បានលើកឡើងថា បើគិតអំពីគោលការណ៍សិទ្ធិមនុស្ស ជារឿងបរាជ័យវិញទេ នៅពេលសហរដ្ឋអាមេរិកបានរំដោះ លោក ឈិន ទៅសហរដ្ឋអាមេរិកនោះ ពីព្រោះថា លោក ឈិន គ័ងឆេង ជាសកម្មជនច្បាប់ ធ្វើការទាមទារសិទ្ធិដ៏ខ្លាំងអំពីការគោរពសិទ្ធិមនុស្សនៅក្នុង ប្រទេសចិន។
លោក អ៊ូ វីរៈ៖ «អាមេរិកត្រូវតែមានកាតព្វកិច្ចសកម្មជនសិទ្ធិ មនុស្ស អ៊ីចឹងហើយ អាមេរិកមិនអាចឲ្យគេចាប់ខ្លួនលោក ឈិន ដាក់គុកវិញ ដូច្នេះហើយបានជាអាមេរិកចរចាជាមួយចិន ឲ្យលោក ឈិន ចាកចេញទៅក្រៅប្រទេស។ ការពិតជារឿងល្អវិញទេ សម្រាប់ប្រទេសចិន ដើម្បីជៀសវាងការរិះគន់ពីសហគមន៍អន្តរជាតិ អំពីការឃុំខ្លួនលោក ឈិន នៅក្នុងប្រទេសចិន»។
ទោះបីជាយ៉ាងនេះក្ដី ក្រុមអ្នកវិភាគបានឡើងថា រដ្ឋាភិបាលចិនបានអនុញ្ញាតឲ្យសកម្មជនច្បាប់ដែលប្រឆាំងនឹង រដ្ឋាភិបាលចាកចេញពីប្រទេសរបស់ខ្លួននៅពេលនេះ ជាការប្រសើរ។ ដោយឡែកបើក្រឡេកមើលប្រទេសកម្ពុជាវិញ សកម្មជនការពារសិទ្ធិមនុស្ស អ្នកកាសែតមួយចំនួន ត្រូវបានឃាតកបាញ់សម្លាប់ទៅវិញ។
ឆ្លើយតបទៅនឹងបញ្ហានេះ លោក កែម ឡី បានលើកហេតុផលដូច្នេះ៖ «នៅ កម្ពុជាចាប់គេដាក់គុកដាក់ច្រវាក់ ដូច្នេះខ្ញុំគិតថា មិនល្អទេ វិធីសាស្ត្រចាប់ខ្លួន ឃុំខ្លួនក្នុងផ្ទះ ឬការចរចាយកចេញក្រៅ ខ្ញុំគិតថាជារឿងល្អជាង ពីព្រោះយកវិធានការច្បាប់ក្នុងហេតុផលនយោបាយខ្ញុំគិតថា មិនល្អទេ ឬយកវិធានការច្បាប់ក្នុងរឿងឧក្រិដ្ឋកម្ម ពិសេសការបាញ់សម្លាប់វាមិនមែនជាគំរូល្អទេ រដ្ឋាភិបាលកម្ពុជាគួរតែយកគំរូល្អៗពីគេ»។
ក្រុមអ្នកវិភាគបានលើកឡើងថា សម្រាប់ប្រទេសកម្ពុជាវិញ ករណីដូច លោក ឈិន គ័ងឆេង នេះ រដ្ឋាភិបាលមានការបត់បែនភ្លាមៗ រដ្ឋាភិបាលមិនអនុញ្ញាតឲ្យទៅប្រទេសក្រៅទេ រដ្ឋាភិបាលសុខចិត្តធ្វើការសម្របសម្រួល និងមានការលើកទឹកចិត្តមួយរយះ តែក្រោយមករដ្ឋាភិបាលនឹងរឹតត្បិតឡើងវិញ។
ទោះបីជាយ៉ាងណាក៏ដោយ លោក ឈិន គ័ងឆេង បានឲ្យដឹងថា លោកមិនសប្បាយចិត្តចំពោះការចាកចេញពីប្រទេសចិននេះទេ លោកមានកិច្ចការជាច្រើនទៀតដែលត្រូវធ្វើ រួមទាំងលោកព្រួយបារម្ភខ្លាចគេសងសឹកទៅលើសាច់ញាតិ ឬក្រុមគ្រួសាររបស់គាត់នៅប្រទេសចិន ដូចជាក្មួយប្រុសរបស់គាត់ ឈ្មោះ ឈិន ក្វី ត្រូវគេចោទប្រកាន់ថា បានផ្ដល់ដំណឹងអំពីការបាត់ខ្លួនគាត់ជាដើម។
លោក ឈិន គ័ងឆេង បានបញ្ជាក់ថា លោកចង់ត្រឡប់ទៅប្រទេសចិនវិញ ប៉ុន្តែគាត់នៅមិនទាន់ច្បាស់ទេ ថា តើរដ្ឋាភិបាលចិននឹងរារាំងគាត់ ដូចដែលរដ្ឋាភិបាលធ្លាប់ធ្វើដូចសកម្មជននិរទេសខ្លួនជាច្រើននាក់ទៀត ឬយ៉ាងណានៅឡើយ?
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។