វគ្គបណ្តុះបណ្ដាលនេះ ត្រូវបានរៀបចំឡើង ដោយអង្គការ កាដុក ក្រោមការគាំទ្រថវិការបស់អង្គការអូស្រ្តាលី សង្រ្គោះកុមារ ហៅថា ស្កា និងអង្គការ កូយកា ដែលបានកំណត់យកកុមារ ៦០០នាក់ ដែលកំព្រា និងងាយរងគ្រោះក្នុងឆ្នាំដំបូង សម្រាប់គោលដៅ ហើយបានជ្រើសរើស ក្រុមមិត្តអប់រំមិត្ត ចំនួន ៣៤នាក់ ជាជនបង្គោល មកពី១៧ឃុំ ក្នុងស្រុកក្រចេះ សម្រាប់វគ្គបណ្ដុះបណ្ដាលដំបូង ។
នាយិកានៃអង្គការ កាដុក គឺអ្នកស្រី ងួន សុផានី បានផ្ដល់សម្ភាសន៍ពេលសម្រាកថា ការបើកវគ្គបណ្ដុះបណ្ដាលនេះឡើង គឺអង្គការអ្នកស្រីសង្កេតឃើញកុមារនៅជនបទងាយរងគ្រោះ ដោយសារការរំលោភសិទ្ធិផ្សេងៗ ដូចជាសិទ្ធិរស់រាន សិទ្ធិចូលរួមក្នុងការអភិវឌ្ឍ សិទ្ធិការពារ និងសិទ្ធិអប់រំមិត្ត ។
អ្នកស្រី ងួន សុផានី មានប្រសាសន៍ថា ៖ «អង្គការបានមើលឃើញថា កុមារនៅតាមមូលដ្ឋាន វាងាយក្នុងការរងគ្រោះ ។ កាលណាពួកគេមិនបានយល់អំពីសិទ្ធិ គេអត់បានជួយខ្លួនឯង ហើយគេអត់បានជួយមិត្តគ្នាគេ ក៏ដូចជាគេអត់បានជួយគ្រួសារ និងសង្គមផងដែរ ។ បញ្ហានេះហើយបានជាយើងលើកគម្រោងនេះ ដើម្បីធ្វើការអប់រំឲ្យបានយល់ ឲ្យពួកគេបានជួយខ្លួនគេ» ។
កុមារី ចន្នី អាយុ ១៤ឆ្នាំ មកពីសាលាជួរក្រូច ឃុំថ្មអណ្ដើក ដែលបានចូលរួមក្នុងវគ្គបណ្ដុះបណ្ដាលនោះដែរ បានផ្ដល់សម្ភាសន៍ថា គ្រួសារកុមារីបែកខ្ញែកគ្នារប៉ាត់រប៉ាយ ដោយសារតែភាពក្រីក្រ ហើយមានចិត្តរីករាយណាស់នៅពេលដែលអង្គការជ្រើសរើសមកបណ្ដុះបណ្ដាលជាកុមារបង្គោលសម្រាប់មិត្តអប់រំមិត្ត ។
កុមារី ចន្នី រៀបរាប់ដូច្នេះថា ៖ «អត់ចេះស្រលាញ់គ្នា និយាយជេរគ្នា វ៉ៃគ្នា អត់ចេះជួយគ្នា ហើយខ្លះគេចពីសាលា ខ្លាចគ្រូ ។ ខ្ញុំសប្បាយចិត្តដែលអង្គការជ្រើសរើសយកមិត្តអប់រំមិត្ត ទៅបង្រៀនគេបន្តទៀត ។ ពេលធ្វើខុសឲ្យចេះទទួលខុសត្រូវ» ។
នាយិកានៃអង្គការកាដុក បានឲ្យដឹងបន្ថែមថា ដោយសារតែការអប់រំមិនដិតដល់ ទើបកុមារមួយចំនួនងាយត្រូវគេអូសទាញយកទៅជួញដូរផ្លូវភេទ ឬជួញដូរពលកម្មជាដើម ។
អនុប្រធានការិយាល័យអប់រំស្រុកក្រចេះ គឺលោក យូ គឹមឡាយ ដែលចូលរួមក្នុងវគ្គនោះដែរ បានជម្រាបថា កម្មវិធីនេះមានសារសំខាន់ក្នុងការជួយលើកស្ទួយដល់កុមារ ដែលមានផលលំបាក ដូចជាមានការជួយឧបត្ថម្ភជាស្បៀងអាហារ និងសម្ភារៈសម្រាប់ការសិក្សាជាដើម ។
លោក យូ គឹមឡាយ មានប្រសាសន៍ថា ៖ «ជាថ្នាក់ដឹកនាំគាត់មានការព្រួយបារម្ភ ពីព្រោះគាត់ខ្លាចក្រែងលោវាអត់ចំគោលដៅ តែដល់ពេលអង្គការគាត់ធ្វើទៅ ឃើញថាចំគោលដៅរបស់គាត់ ដូច្នេះខាងប្រធានមន្ទីរក៏គាត់សប្បាយចិត្តដែរ ដោយសារការជ្រើសរើសហ្នឹងត្រឹមត្រូវល្អ» ។
នាយិកានៃអង្គការកាដុក គឺអ្នកស្រី ងួន សុផានី បានឲ្យដឹងថា អង្គការសង្គ្រោះកុមារអូស្រ្តាលី និងអង្គការកូយកា បានផ្ដល់ប្រាក់គាំទ្រគម្រោងសាកល្បងប្រមាណជាង ១សែនដុល្លារនៅឆ្នាំដំបូងដើម្បីពង្រឹងសិទ្ធិកុមារតាមមូលដ្ឋាន ក្នុងស្រុកក្រចេះ និងស្រុកព្រែកប្រសព្វ ៕