រដ្ឋលេខាធិការក្រសួងការពារជាតិ លោកនាយឧត្តមសេនីយ៍ ម៉ឹង សំផន ទទួលបន្ទុកភស្តុភារ និងហិរញ្ញវត្ថុនៃក្រសួងការពារជាតិ តំណាងភាគីកម្ពុជា បានចូលរួមក្នុងពិធីចុះហត្ថលេខាទ្វេភាគីនោះ។
សម្ភារៈយោធាសំខាន់ៗទាំងនោះត្រូវបានភាគីចិន បានសម្រេចផ្តល់ឲ្យតាមសំណើភាគីកម្ពុជា សម្រាប់បំពាក់ដល់កងកម្លាំងយោធាកម្ពុជា ក្នុងការបណ្តុះបណ្ដាល និងហ្វឹកហ្វឺនដើម្បីបង្កើនសមត្ថភាពយោធា និងបានផ្តល់សម្ភារៈត្រែទ័ពសម្រាប់ព្រះរាជពិធីព្រះបរមសព នៃព្រះមហាវីរក្សត្រព្រះបាទសម្ដេចព្រះ នរោត្តម សីហនុ ខាងមុខនេះ។
ដោយឡែក ភាគីយោធាចិន ក៏បានសម្រេចផ្តល់ឲ្យកម្ពុជា នូវឧទ្ធម្ភាគចក្រចំនួន ១២គ្រឿង ក្រោមជំនួយកម្ចីសម្បទានរបស់ចិន ស្មើនឹងតម្លៃ ១៩០លានដុល្លារអាមេរិក សម្រាប់បម្រើការសង្គ្រោះបន្ទាន់ និងការពារបូរណភាពដែនដី ដែនទឹក និងដែនអាកាសកម្ពុជា។
រដ្ឋមន្ត្រីក្រសួងការពារជាតិកម្ពុជា លោកនាយឧត្តមសេនីយ៍ ទៀ បាញ់ និងជាឧបនាយករដ្ឋមន្ត្រី ដែលបានចូលរួមជាសាក្សីក្នុងពិធីចុះហត្ថលេខានេះ បានមានប្រសាសន៍ប្រាប់អ្នកកាសែតនៅក្រសួងការពារជាតិ ថា ជំនួយទាំងនោះ គឺនៅចំពេលដែលកម្ពុជា កំពុងតែខ្វះខាត និងតាមសំណើរបស់កម្ពុជា៖ «គឺយើងនៅខ្វះមធ្យោបាយដើម្បីហៅថាប្រើប្រាស់សម្រាប់សង្គ្រោះក្តី ក៏ដូចជាបង្ក្រាបនូវរាល់បទល្មើសខ្លះនៅក្នុងទីឆ្ងាយៗ ដូច្នេះយើងខ្វះមធ្យោបាយ។ ដូច្នេះ រាជរដ្ឋាភិបាលបានរៀបចំ ហើយហ្នឹង គឺហៅថា គិតគូរហៅថាបំពាក់ឧបករណ៍ទាំងនេះ គឺមកខាងកងទ័ព ដើម្បីបំពេញកិច្ចការងារទាំងនោះ ជាពិសេស គឺថាសម្រាប់មធ្យោបាយមួយសម្រាប់គ្រោះអាសន្ន មានការជួយសង្គ្រោះ គឺជាពិសេស គឺរឿងហ្នឹង»។
ជាមួយគ្នានេះ នាយរងសេនាធិការកងទ័ពរំដោះប្រជាជនចិន លោកឧត្តមសេនីយ៍ឯកផ្កាយ២ លោក ឆី ចៀនគួ (Qi Jianguo) បានមានប្រសាសន៍ប្រាប់អ្នកកាសែតជាភាសាចិន ហើយត្រូវបានប្រែសម្រួលជាភាសាខ្មែរថា ភាគីយោធាចិន ជួយកម្ពុជា នៅពេលណាដែលកម្ពុជា កំពុងតែត្រូវការឲ្យចិន ជួយនៅគ្រាលំបាក៖ «យើងសម្រេចចិត្តក្នុងការផ្តល់ឧទ្ធម្ភាគចក្រនោះ គឺដើម្បីជួយដល់ការអភិវឌ្ឍដល់ប្រទេសកម្ពុជា ដូចឯកឧត្តមឧបនាយករដ្ឋមន្ត្រីអម្បាញ់មិញបានមានប្រសាសន៍ហើយថា នៅពេលណាប្រទេសកម្ពុជា មានគ្រោះធម្មជាតិ យើងអាចប្រើឧទ្ធម្ភាគចក្រនោះទៅសង្គ្រោះ»។
ទាក់ទងនឹងវត្តមាននៃនាយរងសេនាធិការកងទ័ពរំដោះប្រជាជនចិន នៅកម្ពុជា នេះ អ្នកវិភាគឯករាជ លោកបណ្ឌិត សុខ ទូច បានមានប្រសាសន៍ថា នាយករដ្ឋមន្ត្រីថ្មីរបស់ប្រទេសជប៉ុន លោក សីនហ្សូ អាប៊េ (Shinzo Abe) បានមកបំពេញទស្សនកិច្ចនៅប្រទេសសមាជិកអាស៊ាន (Asean) មួយចំនួន ដូចជាប្រទេសវៀតណាម ថៃ និងប្រទេសឥណ្ឌូនេស៊ី កាលពីសប្ដាហ៍កន្លងទៅនេះ ដូច្នេះចិន មកកម្ពុជា ដើម្បីបង្កើនទំនាក់ទំនងដែរ៖ «ទោះបីជាជប៉ុន មិនចូលមកក៏ដោយ ប៉ុន្តែមានចិន ជាសម្ព័ន្ធមិត្តដ៏ជិតស្និទ្ធនៅក្នុងរឿងសមុទ្រចិនខាងត្បូង ក៏ដូចជារឿងនយោបាយការបរទេស។ ចិន បង្ហាញអំពីវត្តមានខ្លួនចូលមកកម្ពុជា ហើយពង្រឹងកងទ័ពរបស់ខ្លួន»។
ជំនួយសម្ភារៈយោធារបស់ចិន នៅពេលនេះ គឺក្រោយពីភាគីយោធាចិន បានផ្តល់ឲ្យក្រសួងការពារជាតិកម្ពុជា នូវរថយន្តយោធាចិន ចំនួន ២៥៧គ្រឿង និងសម្លៀកបំពាក់យោធាចំនួន ១០ម៉ឺនកំប្លេ កាលពីថ្ងៃទី២៣ ខែមិថុនា ឆ្នាំ២០១០ កន្លងទៅ តាមសំណើរបស់ប្រមុខរដ្ឋាភិបាលកម្ពុជា លោក ហ៊ុន សែន។
ក្រោយមកទៀត ភាគីចិន បានដឹកជំនួយសម្ភារៈសង្គ្រោះបន្ទាន់តាមជើងយន្តហោះចំនួន ២ជើង មកឲ្យកម្ពុជា នូវសម្ភារៈដែលតម្លៃ ៨លានដុល្លារអាមេរិក មានដូចជា ថ្នាំពេទ្យ បរិក្ខារពេទ្យ មុង ភួយ កន្សែងពោះគោ និងសម្ភារៈប្រើប្រាស់ប្រចាំថ្ងៃជាដើម។
ជំនួយទាំងនោះ គឺសម្រាប់សង្គ្រោះបន្ទាន់ប្រជាពលរដ្ឋខ្មែររងគ្រោះដោយសារទឹកជំនន់ ចំនួន ១លាន ៥សែននាក់ នៅក្នុងខេត្តចំនួន១៩ កាលពីខែតុលា ឆ្នាំ២០១១ កន្លងទៅនេះ តាមសំណើរបស់លោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។